احمد:الله يحفضهم ألكم وتربيهم بعزكم ودلالكم وتفرح بيهم

رافي:اشكرك ويحفضلك بناتك ان شاء الله

سيف:صدك،،، چذب،،، صرتوا ابهات مثل الصدك

رافي:لازم معاجبك ياالمهتلف طبعا وينك وين الابوه انته اذا خلفت تطلع تزحف بيهم لحد متخليهم مثلك

براء:هههه اي والله خالي صدقت

سيف:ولي لج هسه انتي علساس شلونج اسرح بصخله احسن منج

ريام:يووووه فدوه لولد اختي يخبلون

رافي:وبالنسبه لسلمان خان ألي واكف كدامج مو ابوهم بس ولد اختج؟

ريام:لا طبعا انته الخير والبركه الله يخليهم ألك وتفرح بيهم ومن هسه دا اكلك حجزت واحد منهم لبنتي

احمد:لاعيني بنات عمهم اولى بناتي وين يروحن

سيف:ادري ياخذون بكد امهاتهم ليش خطيه ابوهم اخذله وحده اصغر منه بسنين وولده ياخذون اكبر منهم ثنينهم،،، لا عيني محجوزين لبناتي

رافي:واني اكول مين اجتك الحنيه وانته اكبر مصلحجي خلي اروح اشوف مرتي احسن ألي

سمر:ضلينه يوم كامل ماشفنه نورزان هي واعيه بس تعبانه منع الطبيب الزياره ثاني يوم نقلوها لغرفه خاصه والفرحه ماسايعتنا بسلامتها

رافي:حبيبتي نونو اكعدي شجاج شنو هل النوم
الحمد لله على سلامتج

نورزان:وين اني شنو صار شنو متت؟

رافي:اي متي واني متحملت ولحكتج

نورزان:وهسه احنا بالجنه؟

رافي:هلا،،، استلمو المدام ضامنه الجنه
اي حبيبتي احنه بالجنه متشوفين حور العين ألي ويانا. (ويأشر على الدكتورات والممرضات)

نورزان:ماكو حور عين رجال ؟

الكل:ههههههه

رافي:اني اعلمج طلعتي تدورين غيري حور عين رجال هاا خاتون

نورزان:لعد من سألتك ماصدكت كلت حور عين وتأشر على الدكتورات،،، بعدني مامتت كمت تدور عليه عبالك موواعيه

رافي:الحمد الله عالسلامه هسه اطمأنيت انتي بخير،،، ياجماعه أبشركم رجعت نورزان ورجعت تحاسبني وتنتضر عليه الزله حتى تهاجمني

الكل:هههههه

سيف:عفيه بزوجة اخويه متنطي مجال حتى وانتي مريضه

نورزان:بشروني شلونهم اطفالي

رافي:الحمد لله زينين لتخافين عليهم

سيف:وابشرج صاكين ومن هسه نحجزو

ريام:اي واحد منهم حجزته لبنتي

سيف:لاعيني بنتج چكمه طالعه عليج وولد اخويه صاكين وعيونهم زرگ

خالد:علساس هسه انته شلونك اجلح املح وتقلد على مرتي وبنتي انته بجمالهم

نورزان:رافي عفيه اريد اشوفهم صدك حلوين وعيونهم ملونه؟

سمر:من كثر ميحبج ويتغزل بعيونج ولدكم اجوي نفس العيون يعني صار 3 نورزان

نورزان؛لاعيني شنو اني وبس شنو واذا مثل عيوني

رافي:تغارين منهم نورزانتي ،لتخافين انتي اول فرحة عيني ماكو احد ياخذ مكانج

سيف،،، جماعه انسحبوا بهدوء الجماعه بده غزلهم خلي نحترم نفسنه ونطلع قبل لا ننطرد
.
.

نورزان:بعد ايام طلعت من المشفى وبعد فتره سمحولنا نطلع اولادنه ألي سميناهم واحد يوسف والثاني ياسين

الكل تعلق بيهم وهمه يخبلون ابويه وعمو نبيل مكابليهم وكاعدين ميفارقوهم

بدوا يكبرون وطهرناهم ومن صار عمرهم سنه بعنا بيتنه وأشترينا قريب من اهله واهلي لأن ميكدرون يفاركون يوسف وياسين

بعد ماصار عمرهم سنه سافرنه اني ورافي للهند وسويت عمليه على اثرها صحتي تحسنت بس موضوع الاطفال ملغي نهائيا بقينا على يوسف وياسين الحمد لله والشكر نعمه من رب العالمين

رافي تعلق بيهم واني من كل عقلي اغار اريده بس ألي وهو دائما يفهمني اني الاولى بحياته

سبحان الله كان هو يغار منهم وهسه صار العكس صح همه يشبهوني وعلى فكره همه توأم غير متماثل ميتشابهون بس ثنينهم بيهم شبه مني بس طباعهم واحد نسخه من رافي والثاني مثل سيف

سمر واخيرا وافقت على سامر طار من الفرحه وتزوجوا وكدر سامر بحبه يخلي سمر هم تحبه وصار عدهم ولد وبنيه

ريام بعد ماتخرجت صار عدها ولد والحمد لله سعيده ويا خالد بس تشكي من دوامه وطبعه البارد تريده يصير رومانسي مثل رافي هو الولد لاكي مجال يحك راسه من ورا عمله الصعب

سيف فاجئنه من طلب يخطب صديقتي ساكار اني ادري عينها علي بس هو ماكان مهتملها صار النصيب وتزوجو وصار عدهم بنيه وخابصنه بيها وحجز يوسف ألها لان مثل طبعه

احمد ومروه هم قبل فتره اجاهم ولد بعد 3 بنات وقررو انو يوقفون الانتاج

واني ورافي احلى أثنين والاحلى ثمار حبنه ياسين ويوسف هل سنه دخلو روضه ومامصدكين من الفرحه يعني ان شاء الله السنه الجايه مدرسه

واني وسيف فتحنه صيدليه سوا

وعمو وعمه فرحانين بالاحفاد ألي ملو عليهم البيت

اما والدي فكلش متعلق بولدي ميكدر يفاركهم صارت روحه بيهم وصراحه امي هم تعلقت بيهم وخصوصا ماعدهم احد بالبيت لأن زيد مقضيها سفر يوميه ببلد ولغى سالفة الزواج نهائيا واني ماسامحته لأن ماتغير ولاطلب مني السماح على افعاله

سمعنه برفل تزوجت واحد متزوج ومشاكل هي وزوجته الاولى وماخذها للونسه ومانعها تخلف لأن عنده اطفال

براء انخطبت لأبن عمتها ودتحضر للزواج

لكن مع الاسف باحداث كورونا جدي توفى بسبب المرض كان هل شي جدا مؤلم ألنا كلنا هل الانسان هوايه وكف ويانا وكان بمثابة اب للكل