نورزان:ادعولي واريدكم تسامحوني اذا فد يوم غلطت بحق احد واني مسامحه الكل ماعدا ثلاث اشخاص مامبرين الذمه زيد ورفل وحسام
عمه وانتي وسمر واحمد ومنال،، ،رافي بأمانتكم لتركوا وحده وتوكفون ويا

وانت رافي اطفالنا امانه برگبتك تدير بالك عليهم
وتحميهم وتتمسك بالحياة علمودهم حتى تربيهم

رافي:لتحجين هيج الله يخليج وكأنما دتودعينا
ان شاء الله ترجعيلنا سالمه ونربيهم سوا

نورزان:كلشي بيد الله واذا صار شي اريدك تعرف
أنته احلى شي صار بحياتي وانته كل حياتي وحتى لوعشنا سوا فتره قصيره هل شي كان بالنسبه ألي
عمر كامل لأن اني فتحت عيني وعرفت الدنيا من خلالك الخاطري اريدك تدير بالك على نفسك

الممرضه: يله صار الوقت لازم ننقلها لصالة العمليات

نورزان:نقلوني واني الخوف سكني واشوف نضرات الخوف ومحاولتهم اخفاء دموعهم عني بس كلها بكفه وعيوني مافاركت محبوبي اريد اخر شخص عيوني تشوفه احس نفسي اريد اشبع منه الى ان دخلت للصاله وبلشوا يچيكون ضغطي ويشوفون نبضاتي وبعدها أنطوني منوم حتى ابتعد عن التوتر لأن البنج موعام موضعي الى ان غمضت عيوني ورحت للمجهول

سمر:دخلت نورزان للعمليه وشبعت قهر من شفت نضراتها متوجهه باتجاه رافي حسيتها كأنما تودعه وهو هم نفس الحاله

بعدها بدت رحلت المعاناة ويا الوقت والخوف مسيطر علينه بس رافي وابو زيد كانو منهارين من الخوف احسهم على ساعه يوكعون حتى وجهم صار اصفر ضلينا بس ندعي

امارافي فأخذ زاويه وكعد يقرا قران وكل شويه
تروح ايده على عيونه يمسحها

مر الوقت بطيء الى ان طلع الدكتور بس احنا منكدر نوكف من التوتر والخوف

رافي:بشر دكتور ؟

الدكتور:ان شاء الله خير الحمد لله للان الوضع تمام ماواجهنه مشاكل صعبه اثناء العمليه الضاهر ارادتها قويه ومتمسكه بالحياة ورب العالمين وكف وياها ان شاء الله بس تعدي 24 ساعه الامور تكون طبيعيه وتكون عدت الخطر

رافي:الحمد لله والشكر ياربي زين والاطفال؟

الدكتور:اضن زينين تطلع دكتورتهاتبلغكم اني جراح قلبيه وكلمن ضمن حدود اختصاصه و عمله

رافي:شكرا دكتور شكرا ألك ماقصرت

الدكتور:عفوا هذا واجبي ومن تعدي هل الفتره ان شاء الله لازم نبدي وياها رحلة علاج حتى تعود لصحتهه

رافي:ان شاء الله

سيف: الفرحه غمرت الكل ماصدكنه ناس تبجي من الفرح وناس تضحك

اما رافي وابو زيد واحد حضن الثاني وعبرو عن فرحتهم بالدموع منشوف بس اكتافهم تهتز
بچونا كلنا وياهم

رافي:مامصدك عمي مامصدك رحمتك ربي احمدك واشكرك ياألاهي قدرت ولطفت ومافجعتني بيها

ابوزيد:الحمد لله ابني

ام رافي:هسه نطلع منا نطعم ٦٠ محتاج

سيف:بربج بدينج وين نلكالج هسه ٦٠محتاج

سمر:لتعيش الدور صح احنا بلد الخير بس ياكثر الارامل واليتامى والمساكين بي واقل شي نقدمه لوجه الله وفضله علينه

سيف:على كيفجن اكلتني بكشوري
اشش،،،، سكتن طلعت الدكتوره

ام رافي:ها دكتوره بشري ؟

رافي:بشرينا؟

الدكتوره:اول شي الحمد الله على سلامتها وبالنسبه للاطفال اجه دكتور اطفال چيك وضعهم بصوره عامه زينين بس لأن قبل وقتهم اجو لازم يبقون بالحاضنه (الخدج) يضلون فتره وان شاء الله خير

رافي:يعني ماعليهم شي؟

الدكتوره:ربك ألي حماها ورجعها من الموت هي واطفالها قادر يحميهم ويحفضهم ألك

رافي:شكرا دكتوره كلكم ماقصرتوا ويانا رغم كل الاطباء ايسونا من حالتها وخطورتها بس انتو ماقصرتو

الدكتوره:هذا واجبنا وبعدين كلام الاطباء صحيح
بالدين والطب ثنينهن ماكو مجامله لازم نكون حديين لأن غلطه وحده تنهي كل شي

الدين واضح وصريح والخطا لايجوز والطب كذلك
بس ثنينهن تبقى رحمة رب العالمين هي ألي تغير مجرى كل شي والحمد لله معجزت رب العالمين شملت زوجتك

رافي:الحمد لله والشكر لرب العالمين اولا والشكر ألكم لأن حتى ألي سويتوا واجبكم يبقى الانسان من يسمع كلمة شكر على افعاله الزينه يحس بقيمة لي يسوي ويجتهد بي اكثر

الدكتوره:كلامك صح

ام رافي:شوكت نكدر نشوف جهالنا البنيه والولد ونطمن عليهم

الدكتوره:هاي بقت يم دكتور الاطفال المسؤول عليهم ها وعلى فكره ماكو بنيه نورزان ولدت ثنين ولد يعني صرت اب لولد ثنين الله يحفضهم ألك

ام رافي:صلاوات على النبي،،، ماشاء الله

ام زيد:ماشاء الله الله يحفضهم

رافي:بابتسامه.. الحمد لله اهم شي تمام الخلقه

سمر:ها عيني فرحت بالولد

رافي:عندي بنيه وماليه حياتي ومااريد غيرها

الدكتوره:هاا يعني عندك بنيه زين عبالي هاي اول طفل ألك؟

سمر:ههههه لادكتوره فهمتينه غلط فعلا همه اول طفل ألهم بس قصده على نورزان لأن هو ألي رباها
وقصده عليها بنوته

الدكتوره:هههه هنا السالفه يله من رخصتكم

رافي:دكتوره بدون زحمه اخر شي شوكت تطلع نورزان

الدكتوره:هسه راح ينقلوها للعنايه الى ان نتاكد كلشي طبيعي وراها تكدرون تشوفوها

سمر:طلعت وخلوها بالعنايه ورحنا على الاطفال بالحاضنه شفناهم يخبلون بس صغار كلش
اما ألي كان مارايدهم وخابص نفسه دمعت عيونه من شافهم

ها رافي شنو شعورك ؟

رافي:مااعرف اوصفه مامصدك صرت اب احلى شعور