السلام عليكم
#يتيمة_المشاعر....#بارت٤٧الأخيرررر
نور ال زياده
****

سمر:شعندك كاعد هنا؟

رافي:وين اروح مااكدر اعوف المستشفى

سمر:موهذا قصدي اذا تعبان روح ارتاح بالبيت احنا هنا

رافي:مااكدر اعوفها واروح

سمر:لعد ليش تاركها وكاعد هنا اذا متكدر تعوفها؟

رافي:اني منعول سلفه سلفاي وهي حايره الاطفال ليصير بيهم شي

سمر:طبيعي يااخي هي ام واكيد من هسه تتعلق بيهم

رافي:ليش تحسسوني اني بدون گلب ومااريدهم ولاخايف عليهم؟

سمر:شجاك ياعيني موهذيج الايام زين وكلشي تمام،شنو ألي تغير؟

رافي: ألي تغير تعبان تعبت انو امثل دور الشخص المامهتم ومتفائل وكلشي تمام والامور طبيعيه واني بالحقيقه جاي اموت تعرفين شنو جاي اموت بطئ هاي مشاعري الحقيقيه

اكابر واضغط على نفسي حتى لتحس واحاول اقدملها طاقه ايجابيه بس بداخلي غير شي توصيني على الاطفال وخايفه عليهم وناسيه اني بشنو احس من خوفي عليها

كلكم متصورين مامهتم لأطفالي ولارايدهم صدكوني موهاي الحقيقه من يوم حبيتها واني اتمنى تصير ام اولادي صرت احب الاطفال لأن اتخيل هي امهم

تدرين هسه من احس بحركتهم جوا ايدي احس گلبي يرجف من الفرحه بس فرحتي ناقصه لأن خايف عليها خايف اخسرها واني مااعيش بدونها
هاي فرحة عمري

تكوليلي ام وخايفه على اطفالها واني هم اب
وخايف على بنته اني عرفت الابوه ومشاعرها من سنين طويله من يوم تعلقت بطفله وربيتها على ايدي وحملتني المسؤوليه وحسستني بالأبوه هي اول فرحة عيني

حتى لو حاب اصير اب واحب اطفالي ماراح احبهم ولااخاف عليهم مثلها

ولو يرجعون يخيروني هم اختارها لواعرف اضل طول عمري مااصير اب والناس كلها تلومني اكلهم عندي بنيه ماليه كل حياتي وروحي وگلبي

سمر:نزلت دموعي على حالهم جاوبته....

_الله على گلبك شكد شايل هموم وحب
تدري حبك نادر ماعاد موجود بهل زمن واني اتهمتك وشككت بحبك واعتبرتك اناني سامحني

رافي:ماكو داعي للاعتذار الانسان يحكم على ألي يسمعه ويشوفه واني كل الادله كانت ضدي اب
تخلص من ابنه بنفسه ولهذا ماشلت بگلبي لاعليج ولاعليها

بعدين منو كال ماموجود مثل حبي احنا من نحب نحب بكل جوارحنا ونتعلق هاي انتي صار سنين من مات مانسيتي ومنال نفس الشي واحمد وابسط مثال سامر ألي مع كل رفضج للان متمسك بيج

سمر:شجاب سامر بالموضوع؟

رافي:لأن هم حبه نادر مثل متكولين ومنتضرج صار سنين وانتي ماحسيتي بي.. خطيبج راح الله يرحمه صار 10سنين ولامتزوجين ولاعندج طفل من ريحته حتى تبقين على ذكراه عيشي حياتج وحسي بسامر هو هم تأذى وأنغدر من اخته

اسألج سؤال لو خيروج قبل بين خطيبج الله يرحمه وبين سامر منو تختارين؟

سمر:اختار سامر لأن افضل واقرب

رافي:مازال هذا تفكيرج يعني سامر مهم عندج واكو مجال تتولد مشاعر بداخلج أله فكري بكلامي

لتضيعي منج لأن الحياة قصيره فلتضيعين الناس المهمه عندج وألي همه يهتمون لأمرج

سمر:مااوعدك بس افكر بالموضوع اما انته فكافي تفكر لأن من التفكير ضغطك مدينزل خليها على الله ولتخاف وان شاء الله خير

واتاكدانو الخوف ميمنع الموت بس يمنع الحياة مهما خفنا اقدارنا متتغير بس مخاوفنه تمنعنا نعيش ايام حلوه ويا احبابنا توكل على الله وان شاء الله ميضيع لاتعبكم ولاصبركم وتفرح بسلامتها

رافي:امييين ،الله يسمع منج والله طول الوقت ادعي والله كريم

سيف:هاي شنو هاي عيني اني ادور عليكم وانتو كاعدين هنا تقصقصون كوم يمعود مرتك خبصت الدنيا عليك تريدك عبالك مضيعه ابوها وهو يمها شكد عيب من ابو زيد هوحاير بيها وهي تدورك

سمر:قابل كذب رافي ابوها اكثر من ابوها الحقيقي

رافي:كومو خلي نروح

سمر:مرت الايام ونورزان وضعها من سيء الى اسوء ومن دخلت السابع بدت المعاناة الحقيقيه وضعها صار كلش سيء وكل مره تتخربط وتختنك
توصل للموت ورافي يموت ويعيش وياها وماطلع خارج المستشفى نهائيا صارت الغرفه هي بيتهم

هو حاير بيها يوكل ويشرب ويسبحها وحتى يمشط شعرها ميرضى احد يداريها غيره

المشكله صارت حتى من تدخل الحمام تختنك
جابلها اوكسجين وخلا بالحمام صارت عايشه على الادويه والمغذيات والاوكسجين

وبلشوا يضربوها ابر ببطنها عن طريق المشيمه غذاء للاطفال وهي الله يساعدها تعاني وتتعب وكل متتعب تتخربط

بكل مره تتخربط نكول راحت من ادينه كانت ايام لاتنسى منتمناها حتى للعدو ورافي حال الضيم حاله

من تنام يختلي بنفسه وألكى كاعد يدخن ويبجي مثل الطفل اكعد ابجي ويا

بالاسبوع الاخير من السابع تخربطت الى درجه وصلت للموت رسمي وهنا قرر دكتورها انو صار لازم تولد لأن بعد متتحمل اكثر بأي لحضه نخسرها،، وفعلا ضربوها ابر حتى تكمل رئة الاطفال

ألتموا الكل بالمستشفى رحنا نحضرها للعمليه بس رافي رفض وكالعاده هو ألي يحضرها

دخلنا عليها وانتبهنا لعيونهم ثنينهم حمره من البجي

نورزان:صار الوقت مووو؟

ابوزيد:اي بابا شدي حيلج ورجعيلنا بالسلامه