رافي:شبيج ،شنو يوجعج؟

نورزان:ماكوشي يوجعني ،بس حصلت دفره قويه هذا الضاهر ابنك وكح نار

شبيك رافي ليش ضجت ؟

رافي:ماضجت

نورزان:اعرف فرحتك بأطفالك بيها غصه بس همه ماألهم ذنب

جيب ايدك

رافي:شتسوين بيها؟

نورزان:اخذت ايده وحطيتها على بطني ماريده ينفر منهم ويكرهم بسبب ألي صار هاي دنيا اذا رحت على الاقل هو يوكف وياهم ويحبهم ويعوضهم

ها حبيبي دتحس بحركتهم؟

شفته دمعت عينه وايده رجفت

رافي:هاي طول الوكت هيج يتحركون؟

نورزان:لا اصلا هل الشهر يله حسيت بحركتهم كان بس رفه احس

رافي:كلتي ابنك يعني عرفتي جنسهم

نورزان:اي واحد ولد والثاني مابين بس يمكن بنيه

رافي:انتي بس كومي بالسلامه اي شي يجي رزق الله ،،، جوعانه مشتهيه شي اجيبه ؟

نورزان:لاماأريد شي بس انته

تدري طول هذيج الفتره اتنسى على عطرك ردتك بالروح وروحي فرفحت على حضنك

رافي: صدك والله،،، ياروحي ،لا واني مقهور كل هذيج الفتره لأن كلتي اكتشفت ماحبك

نورزان:منو هاي ألي متحبك ،ماانام ألااحضن هدومك خلص عطرهن من كد ماشميتهن،الناس تتنسى اكل واني روحي تلوب على حضنك

رافي:اني وحضني وكلي ملكج ،شوتعالي خلي احضنج وانام احنا وجهالنا

نورزان:الله ،شكد حلوه هل الكلمه احنا وجهالنا
هم يجي يوم وتصير صدك؟

رافي:انا عند حسن ضن عبدي بي ) ضني برب العالمين خير يبعثلج الخير شكد كنت احسج بعيده ومااكدر اوصلج بس ضني رب العالمين راح بيوم يجمعنا وتحقق هل شي وهسه هم ضني ألي حماج وحفضج ألي وخلاج تصيرين حلالي حاشى اسمه يفجعني بيج بعد هل الصبر بس انتي تفائلي الحاله النفسيه اكثر من العلاج

وهسه تعالي على ايدي خلي احضنج وادفى وياج وناخذلنه غفوه

**
سمر:يله امشو نرجع للغرفه
رحنا وصارت الدكتوره تبارك وكم وحده وياها

دكتوره تبارك:شلون صارت هسه ؟

سمر:الحمد لله احسن والصبح ان شاء الله نحولها للمدينه

دكتوره تبارك:الله كريم ،الدكتورات زميلاتها حابات يسلمن عليها ويتمنن ألها السلامه

سمر:اي اكيد اهلا وسهلا تفضلو

سيف:انتو دخلوا واني وعمي هنا باقين

سمر:دكينه الباب ودخلنا ويافشلة الفشله
نايمين على السرير ثنينهم نورزان نايمه على ايده وواحد حاضن الثاني ومتغطين

الدكتوره تبارك:ههههه ،الضاهر اجينا بوقت مومناسب الصبح كضوها صياح وهسه بالليل احضان امشو نطلع عيني

سمر:هههههه،همه هذوله رافي ونورزان وهاي سوالفهم

دكتوره :الله يحفضهم لبعضهم امشوا بعدين نجي نسلم عليها

سمر:خلينا وطلعنا والجماعه بغير عالم عبالك نايمين أبيتهم

سيف:ها اشو بسرعه طلعن؟

سمر:من الفشله غير،، من الصبح لسه عياطهم وصياحهم وهسه حاضنها ونايم

سيف:اشششش،منا ابوها عيب ،،لعد هوستهم وطلكني واني وانته كلها كلاوات كدامنا

ابوزيد:اي كلها كلاوات لعد كذب

سيف:ها عمي سمعتنا؟

ابوزيد:وين اروح لعد

سمر:راح افوت اكعده

ابوزيد:لاعمي عوفيهم قابل هو صاحبها وخجلانين هوزوجها يعني حلاله صح المكان مومناسب
بس اهم شي همه بخير ومتصافين خليهم منريد شي

**

نورزان:ثاني يوم من الصبح كعدت ورافي يمي الضاهر كلش تعبان ذب روحه مثل الميت ضليت اتأمل وجه ،ياترى هم راح نبقى سوا هم راح اصبح بيك وتصبح بيه لو وصلنا لنهاية طريقنه

اتمنى اعيش عمري وياك ونربي اطفالنا سوا ،اتمنى لحضاتنا متخلص بس بالنهايه احنا بشر فاني ولابد يجي يوم ونتفارك

ضليت اتلمس لحيته ووجها الى ان صحا

رافي:صباح الورد على حبيبتي

نورزان:صباح الخير

رافي:تدرين شكد مشتاق اصبح بوجهج صار اشهر وانتي بعيده عني

نورزان:اني هم مثلك

رافي:كومي يله نغسل ونحضر نفسنا اليوم ننتقل لغير مستشفى

نورزان:يووو ،شلون قهر هذا

رافي:لتضوجين ياعيني اعتبري رايحين لمكان وحاجزين غرفه بفندق وبالنهايه اهم شي نكون سوا

نورزان:يعني متعوفني نهائيا؟

رافي:اكيد لا اصلا وصيتهم يحضرون غراضنا راح اعيش وياج بالغرفه ماكو بعد طبخ ولامواعين ولاتنضيف بعد شتريدين

نورزان:فدوه لحبيبي ألي يحاول يهون عليه

رافي:قابل كذب الله عليج متضوجين من الشغل؟

نورزان:الصدك اي اضوج بس منكدر نعيش بدون منضف المكان اونغسل مواعين ألي ناكل بيهم
بس طبخ لا لأن كلش يعجبني اطبخ احلى هوايه عندي الطبخ

رافي:ولهذا تبدعين بالطبخ خليتيني مااحب اكل الا. من ايدج كل الاكل مااحس بطعمه

نورزان:لهذا ضعفان؟

رافي:اي والله هم فراگج وهم قهرج وهم متطبخيلي طيحتي حضي يله شدي حيلج اريد تصيرين زينه وتعوضيني مشتهي مندي لحم من ايدج وأريد دولمه وباجه

نورزان:حيلك ،حيلك هاي انته متحلفلي ممخلي شي مامشتهي خلي اموت احسن ألي ولاهل شلاع الكلب،،، هههههه

رافي:عبالج تخلصين مني من تموتين كبل ألحكج
وهم اخليج تطبخيهن حتى وأحنا ميتين

نورزان:يعني ماكو امل اخلص مووو

رافي:ابد ماكو،،، اختصري الطريق وصيري زينه
لأن مكابلج دنيا واخره اني براسج وانتي براسي
ماعوفج ابد ولهذا اريدج لخاطري تقاومين وتشدين حيلج