📌 السؤال:
السلام عليكم.
بس حبيت اقدملك نصيحة من شخص يحبك ،
منشورك مال العلوين لان مو شيعة ميصير نتعاطف وياهم جفصة قوية من سماحتك ياريت تراجعها
الموضوع انساني و فطري واحد من يشوف ابرياء ينقتلون يتفاعل ويه قضيتهم و يتعاطف وياهم.

📝 الجواب:
عليكم السلام ورحمة الله.

يبدو سماحتك كلش مو فاهم سماحتي..

أنا گلت لا تتعاطفون وي الضحايا ؟

جبت طاري التعاطف ؟

(چا) إحنه غير تعاطفنه ويه أهل غزة وتألمنا عليهم وهمه من أهل السنة؟

چا غير من نشوف ضحايا قصف مدنيين بأوكرانيا المسيحية تنكسر گلوبنا ؟

هو إحنه الشيعة نگدر ما نتعاطف ويه المظلوم والمغلوب على أمره ؟

لكن سماحتك مو منتبه للهدف من كلام سماحتي..

ومجاي تشوف محاولات جر المجتمع الشيعي إلى المطحنة ..

يوم من بوابة اليمن
يوم من بوابة سوريا
يوم من بوابة لبنان

وگلنا ميخالف عبرنا هاي المرحلة .. والفصائل عرفت خطورة الموقف (ولو متأخراً)

لكن بهذا الموضوع السوري ما عاد التدخل العسكري وحده يشكل خطر .. حتى الكلمة صارت تشكل خطر على الشيعة بسوريا .. حتى التعليق ممكن يتحول رصاصة برؤوس أهلنا بسوريا..

لأن أكو شحن مدفوع عليه مليارات .. ولأسباب ممكن نشرحها بعدين لسماحتك.

زين عوف سوريا

عوف الشرق الأوسط كله

قبل فترة كنت في جزيرة من جزر جنوب شرق آسيا وكنت أكلم بعض الشيعة هناك عن أحوالهم .. وشنو نظرة المجتمع السني لهم ..

فكان جوابهم أن موضوع سوريا وتدخل إيران لصالح بشار شكل علينا ضغط رهيب وصرنا مكروهين ..

وما خف هذا الضغط وشويه صرنا مقبولين بالمجتمع إلا بشهادة سيد حسن وضربة إيران لتل أبيب.

فالخلاصة يا صديقي

ما قلنا لا تتعاطف .. قلنا لا تساهم بشحن السوريين ضد الشيعة بحجة نصرة العلويين .. لأن العلوي عافك من عهد السفراء الأربعة وما يعترف بيك ولا مستعد يلتزم بتوجيه مرجعيتك .. يعني كتلة بشرية مستقلة ولها حسابها الخاص ..

فأنا على أي أساس أرهن مصيري ومصير جماعتي بيدهم ؟ وبقرار السلم والحرب الي همه يتخذونه ؟

للعلم هذا مو كلامي .. هذا كلام شيعة سوريا نفسهم .. لمن كنت بدمشق مرة من المرات وسألتهم عن الوضع .. واشتكو من محاولات العلويين جر شباب الشيعة وياهم للمعارك.

ما أدري صار واضح عد سماحتك لو لا؟

الچفصة مو كلامي .. الچفصة الحقيقية هو أنه جاي نچفص بالتعليقات والشحن الطائفي ويه مجتمع كلشي ما نعرف عن توزيعه الاجتماعي.