-أمس ساهرنا في الونسة عشان كدا ..

-م تكوني فوتي صلاة الفجر حاضر بس ..

عاينت ليه وسكتت مسافة حتى قلت ...

-م عارفة الحصل لي شنو ..فجأة صحيت لقيت الساعة 8 ...

-دا م عذر يا معين كان تضبطي المنبه ..معقولة لكن تصلي الساعة 8 ؟

انا أصلاً زعلانة من نفسي ومن الصباح بلوم فيها ..جا حسسني بالذنب زيادة ..عاينت للأرض وم قلت حاجة ...

-ربنا يسامحك يا معين وتاني م تتكرر ي حبيبي .. تمام ؟

-م حتتكرر بإذن الله..

-تمام م أوقفك كتير ..

-ااا تميم...بعدين ماشة المركز القريب دا أفحص ..

-ليه ..مالك ؟ حاسة بشنو ! خلينا هسي نمشي ! في شي واجعك ؟

كان لسه ح يتكلم وقفتو وقلت ليه ..

-أهدا اهدا ...م واجعني شي ...لكن حاسة بفتور وصداع وماشة اشوف الحاصل ..وبعدين ميس ماشة معاي ..

-متأكدة انك تمام ؟

-(إبتسمت) ...ايوة تمام م تقلق ..

-اا صح ..بكرة ناس أبوي جايين ...يداب تصريح الاجازة طلع ليهم ل 15 يوم بس ...أما وليد عندو شهرين إجازة ..

وليد شغال مدرس في الجامعة وعضو في مجلس الكتاب الدولي ..

تميم انتظرني لما دخلت بيت عمو خليل حتى دخل بيتنا ...
لقيتهم شغالين في الخبايز ..قعدت اشتغل معاهم والصداع كان لسه في زيادة ..لما تعبت خالتو إيمان قالت لي خلينا نمشي المركز ...ميس ولدها كان ببكي وم خلاها عشان كدة مشيت مع خالتو إيمان...عملنا الفحوصات وبعد نص ساعة حتى النتيجة طلعت والحمد لله حمل ..وكمان ليه 3 اسابيع ...
قلبي كان برفرف من الفرح وخالتو إيمان مبسوطة وقالت "لو بعرف ازغرد كان زغردت بالمناسبة الحلوة دي " .
أخدنا الأدوية والفيتمينات الكتبوها لي ورجعنا البيت...
لما كلمنا البنات طارو من الفرح واي وحدة عبرت عن فرحتها بطريقتها ..
انا كل همي كان اشارك تميم الفرحة دي....لأنو بحب الأطفال جداً ومنتظر خبر حملي بفارغ الصبر ..
بالمساء أبوي وفراس كانوا في الشغل وباقي أخواني في بيوتهم..لبست توب ومشيت الصالون ...لقيت تميم قاعد في المصلاية وبسبح ...

-السلام عليكم ورحمة الله وبركاته..

إلتفت علي ورد السلام ..أشر لي بيدو عشان أجيهو ..مشيت ليه وقعدت جنبه في الأرض ...مسح على راسي وقال ..

-ربنا يبارك فيك ويحفظك ...

-اللهم آمين جمعاً..

مسك يدي وبقى يمرر يدو على أصابعي وهو بقول ..

-التسبيح كنز عظيم ..متى م لقيتي نفسك مضايقة أو فاضية أو مبسوطة سبحي ...تمام ..

-(إبتسمت) ..تمام .

فضل ماسك أصابعي وبسبح بيها ..لما شعر إني عايزة أقول ليه شي ..عاين لي ...

-عايزة تقولي شي ؟

إترددت مسافة حتى حكيت ..

-تميم ..اليوم أنا مشيت فحصت ..

عاين لي بقلق ظهر في صوته وهو بقول ..

-لعله خير ...في حاجة ؟

-أنا حامل ...

عاين لي بعدم استيعاب وتاني سأل ..

-شنو ؟

-(ضحكت)...حامل حامل ي تميم ...

سجد شكر لله وهو بردد "الحمد لله" ..مسك وشي بيدينو وباسني في جبيني ...نزلت دمعه في خدو مسحها وهو مبتسم وضماني لحضنه ...

-اللهم بارك لنا فيه وأحفظه ...

كان مبسوط لدرجة م قادر يعبر عن فرحته ...قرا لينا قرآن وحصني حتى رجعت غرفتي ...تاني يوم أهل تميم جو وصادف زيارة أهل أبوي لينا ...رجعنا للأيام الحلوة الكانت قبل عرسي ديك ...ربنا يديم جمعتنا يارب ...
خالتو شيماء لما عرفت بحملي إتبسطت شديد وقالت انو ح يكون أول حفيد ليها وربنا يحفظه ودا زاد فرحتها أكتر ...
المرة دي أهل تميم أجرو بيت كبير جنبنا عشان جزو من أهلهم البرا السودان جو للعرس ...

يوم عن يوم فرحتنا بتزيد ...وعرس وليد و وسن كان الفرحة الكبيرة ...كل تفصيلة فيه أحلى من التانية والأحلى من كدا إنو وسن طايرة من الفرح ...

مشينا مع تميم مرة وزرنا المدرسة حقت ذوي الإحتياجات الخاصة...كانت لسه تحت التشييد والعمال شغالين بهمة أكبر من الأولى ...

وسن و وليد سافرو هولندا لشهر العسل ...أهل تميم رجعوا والضيوف برضو ...فرقة وسن كانت كبيرة شديد...خصوصي عند خالتو إيمان...كل الوقت بتبكي وبتدعي ربنا يحفظها ...

محمود فاجأنا انو لقى ليه عقد عمل في الأردن ...جهز أوراقوا وسافر ...سفرتو دي فرقت مع أويس طبعاً وقال "لابد من انو يجي اليوم الأفترق فيه مع محمود " .

قعدنا شهر في السودان ...وكدا إجازة تميم بتكون خلصت ...من السودان لإيطاليا بنضطر نركب 3 طيارات ورحلة بتستغرق حوالي 16 ساعة ..والدكتورة منعتني من السفر يعني ح يضطر يسافر براه...

-3 شهور بس وح أجي أسوقك ممكن تصبري عشاني ؟

كنت في غرفتي وببكي لانو تميم بكرة مسافر ...وهو كان بحاول يخليني م أبكي ...كنت ماسكة في التيشيرت حقو وبعاين ليه وعيوني مليانة دموع..

-ممكن م تسافر ؟ أو خليني أمشي معاك بإذن الله م حيحصل للحمل شي ..

من بقيت حامل تعلقي بتميم زاد جداً..وكنت م متقبلة فكرة سفره دي خالص ...

-يا ريت لو بقدر أخلي الشغل وم أسافر لكن دا مستقبلنا ومستقبل البيبي الجاي دا لازم يتأمن ليه حياة كريمة ..ومافي داعي نعرض حياتكم للخطر كلها شهور بس وبجيك راجع أسوقك ...تمام ؟ م تبكي ي روحي ...