طلع من جيبه كرتين واداني ليهم ...عاينت للكروت وعاينت ليه وانا م مصدقة ...

-مش ممكن ...تميم انت جادي ! يعني عادي وممكن ؟

-ايوة ي حبيبي ممكن ..ليه م ممكن !...

كانت تذاكر لحضور مناظرة لذاكر نايك ...
ذاكر قدوة تميم في الدعوة إلى الله...كان بحكي لي عن المحاضرات الحضرها ليه وانها مفيدة شديد... قلت ليه متمنية احضر ليه مناظرة وم ركزت مع كلامي ولا اتخيلت إنو تميم ح يركز معاه ...
كنت فرحانة ومتحمسة للمناظرة دي شديد...

جهزنا مع تميم ومشينا ...كان في كمية تحير من الناس ...دخلنا وقعدنا ولسه أعداد الناس في زيادة ..لحدي م جا ذاكر داخل ...كنت م مصدقة انه حقيقة قدامي ...كانت بيتكلم إنجليزي ...وانا انجليزيتي لا بأس بها لأني إشتغلت فيها في الاجازة بعد التخريج ...

بجانب الحضور المسلمين كان في كتابيين وملحدين وكذا ديانة تانية ...
إبتدت المناظرة بواحد ملحد وبدا بمحاولة إقناع الموجودين بأفكاره وانه لا إله في الكون وكدا ...ذاكر أول جملة قالها ليه انت لحدي هنا تمام لانو باقي ليك بس لفظ الجلالة "الله" واداة الاستثناء "إلا" وتدخل الإسلام وبدا بعدها يرد ليه ويجيب في الأدلة لحدي م الملحد أسلم ..

بعد الملحد جا مسيحي وبرضو نفس الشي أقنعو واسلم..
إحنا كنا مندهشين صراحة لانو بدير المناظرة بذكاء وفطنة عجيبة ..بخلي الطرف التاني هو اليبحث عن البراهين لحدي م يلقى نفسه وصل لمفاهيم الإسلام ..
يعني رهابة رهابة تحير ...كنت م قادرة استوعب البحصل وانو هو مستسهل الموضوع ويومياً بسلم على يده عدد كبير من الناس ..

لما خلصت المناظرة كانت الساعة ماشة ل 1 مساءً .. طبعاً إحنا طلعنا بعد صلاة العشاء ...طول الطريق وانا بحكي ل تميم عن فرحتي وانو ذاكر انسان ذكي وفطين جداً...
وقف العربية قدام البيت وعاين لي ...

-نعسانة ؟

-لأا أبداً م جايني نوم ...

تمام انزلي ..

نزلنا وكنت ح أدخل البيت لكن وقفني ...

-خلينا نتمشى بما انك م نعسانة ...

كان ماسك يدي وماشين ..المنطقة الساكنين فيها كانت هادية وماف غير الاضاءة الفي الشارع ...تميم وقف وعاين لي ...

-طلعي جزمتك ..

-ليه !..

-السير حافي وسير الليل سنة ..

طلعت جزمتي وهو برضو وشلناهم في يدينا وفضلنا ماشين ونتونس ..
الأرض كانت باردة والجو حلو شديد ومتعة من نوع آخر ...

فجأة شعرت بيه سحب لي طرحتي وفكى ربطة شعري وخلاهو فاكي ..
عاينت ليه بصدمة إبتسم وقال ..

-بعد دا تاني مافي زول ح يكون صاحي في المنطقة دي أخدي حريتك واستمتعي ...

فضلت ألف في مكاني وأنا مبسوطة ...وتميم كان بضحك فيني وشايل تلفونه بصورني ...

-تميم نتسابق ؟

عاين لي بعدم تصديق ..

-(ضحكت)بعِد ل 3 ومن هنا للبيت..اذا وصلت قبلك ح تعفيني من تسميع بكرة ..واذا انت وصلت ح اضاعف عدد الأحاديث واسمعها ليك ..

-ي واثق انت ...

-م تتمسخر ، احتمال أصل قبلك ..

-طيب نشوف ..

بديت العد ولما وصلت لاتنين إلتفت ليه ..

-لو انت خليتني أفوز .. أقصد لو أنا فزت ح أبوسك عشرة مرات ...

-(ضحك) بتغريني هااا ..

كنت عايزة بأي طريقة أقنعو إنه يخليني افوز 🤣..بديت العد تاني وانطلقنا ...وكنت عارفة انه ح يخليني أفوز ..وصلت البيت ودخلت جوا حتى هو جا بعدي ..

-بما انك فزتي ف معفية من تسميع بكرة لكن بالمقابل ح تراجعي حفظك السابق ...
وخلينا نجي للمكافأة التانية ..

كان بعاين لي بنظرة خبيثة وهو متحمس وجاي علي..

-أي مكافأة تانية ! أنا قلت شي تاني ؟

-بعِد ل 3 م عملتي القلتيه ، ح أنسى كل شي وحأعتبر نفسي الفايز وزي م قلتي ح أضاعف ليك الحفظ بكرة ...

-لا لا خلاص خلاص ...

مشيت عليه وانا ميتة من الخجل ...ولمت نفسي على تسىرعي ..كان ماله لو أقنعتو بأي طريقة غير دي ...


(جهزوا مناديلكم للبارت الجاي 💔🔥 )
‏*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​