لما صحيت للمرة التانية لقيت تميم صاحي وبتأمل فيني ..

-فاذا وقفت أمام حسنك صامتاً
فالصمت في حرم الجمال جمال
كلماتنا في الحب تقتل حبنا
إن الحروف تموت حين تقال
حسبي وحسبك أن تظلي دائماً
سراً يمزقني وليس يقال

عجزت عن التعبير طبعاً ...قعدت أعاين ليه والفرحة ظاهرة في وشي...
لمحت في السرير هدية و ورد ...لما شافني بعاين ليها قال ..

-شايف أنسب يوم تتقدم فيه هدية هو اليوم دا ...

أداني البوكس لما فتحته كان فيه مصحف ذهبي ومنقوش فيه إسمي بماء الذهب ..

-مصحف برواية ورش عشان يسهل عليك القراية ...

طلع بوكس تاني واداني ليه فتحتو..كان فيه طقم دهب ومجموعة من الشوكلت الكان بجيبها لي ...

-بيقولو حب الدهب في جينات البنات (ضحك) والشوكلت دي تعويض عن لقاءات كتيرة مفروض تتم لكن بسبب سفري م تمت ...وآخر شي ..

شال الورد ومداهو لي ..

-ورود الخزامى بتشبهك شديد ...رقيقة وصافية زيك ورؤيتها بتريح الأنفاس ..

لحدي هنا استوب ...كمية لطافة واهتمام خلوني عاجزة عن شكره ..إتمنيت بس تميم يفضل معاي لآخر العمر ..
إستعدلت في قعدتي وحضنته بكل حب ...

-شكراً .. شكراً.. شكراً...بسطتني شديد يا تميم والله ..

………

مواعيد طيارتنا جات جهزنا ومشينا المطار ...أي زول نلاقيه بجي بتصور مع تميم ...
كنا في صالة الإنتظار ومنتظرين يتنده على رحلتنا بس ، وطبعاً للآن م عارفة ماشين شهر العسل وين ...تميم قال مفاجأة ...

لمحت شاب جاي علينا وكان بشبه تميم شديد ..عرفتو انو دا رايان لانو قبل كدا شفت ليه صور ...
كان جاي ووراهو بوديقارد ...تميم لما شافو م صدق ..قام وسلم عليه بالأحضان وهو م مصدق ..شكله م عارف انه جاي ...سلم علي من بعيد وبارك لينا ...

-آسف يا شباب حاولت أجي أحضر عرسكم لكن م لقيت طريقة ...وجينا مع النادي الكويت وقلت لازم أبارك ليكم..وليد قال لي إنو دي مواعيد رحلتكم وحاولت استعجل عشان أحصلكم والحمد لله لقيتكم ...

إتونس معانا شوية وم طول بسبب انه عندهم إجتماع هنا وبرضو مضايقة الناس ليه وانهم عايزين يتصورو معاه ...ودا نفس الحصل مع تميم طول تواجده في المطار ...على قول وسن الشهرة متاعب ..

ندهو لرحلتنا وكانت ل روما ...

-ماشين روما يعني ؟

-قلت ليك مفاجأة ..اصبري بس ...

لما وصلنا مطار روما...تميم مشى يعمل اجراءات رحلتنا الجاية ...بعد فترة جا ومدا لي التذكرة ...قريت عنوان الرحلة لقيتها للبندقية ...قربت أصرخ وأنطط في المطار ...حلم حياتي إني أزور البندقية...

-إنت بتحقق لي في أحلامي هااا ..

-(ضحك) لانو البرنسس تستحق ..وإتأكدي يا معين انو اي حاجة نفسك فيها وانا بإستطاعتي أعملها م ببخل عليك بيها ...

شفتو اللطافة !! في أحلى من كدا ؟

•.•.•.•

أحلى أيام حياتي هي القضيتها مع تميم في البندقية ...المدينة الإيطالية الساحرة ...القنوات المائية الفي كل حتة ...المباني الملونة ..المكتبات والكافيهات الكلاسيكية ...وكل دا في جانب وتميم جانب براهو ..خلال الفترة البسيطة دي خلاني أهيم بحبه ...

بعد اسبوع من وصولنا البندقية تميم قال لي إنو الاسبوع الجاي ناس أبوه ماشين السودان عشان يخطبوا وسن ل وليد ...
أصلاً من لما جينا الكويت للعرس إتناقشوا في موضوع الخطوبة دا ..

اتواصلت طوالي مع وسن ..كانت طايرة من الفرح ومبسوطة شديد رغم انها فاقداني وانا كذلك ..

أكتر حاجة أحزنتني إني م حأحضر خطوبتها واشاركها فرحتها دي ...

اها يوم الخطوبة الحصل شنو ؟ ميس تعبت وودوها المستشفى وولدت ...كويس انو الخطوبة تمت وميس جابت ولد سموه عبد الرحمن ..
دي كلها تفاصيل حلوة فاتتني للاسف ...

وسن كل م تنسى الموضوع ترجع ترسل لي "مرت أخوك الخسيسة صبرت 9 شهور لكن من جا يوم خطوبة وسن قررت تولد ...ولا قالت دا يوم مربوط بذكرى مميزة م لازم أفوتو ؟! " .
"وكمان ولد أخوك الشفقة ليه شنو م ينتظر اليوم دا يمر بسلام حتى يطلع ..الاستعجال لشنو ؟" .
وهكذا ..ميس قالت لي يومياً احنا في نفس السيرة دي ..
لما هدت شوية رجعت بمكنة جديده "خطيبة وليد النجمي مفروض تاكل شنو ؟ " و "انا لو عرست وليد تاني إتصالاتكم م برد عليها وامسحوا ارقامي بالله 😏" .
غايتو وسن مجنونه ربنا يهديها 😂 .

………

بعد شهر ونص حتى رجعنا روما ...الشقة كانت خرافية والحلو انه عامل لي فيها مرجوحة ...اي يوم بمر علينا بكون أحلى من التاني والحمد لله...

-تميم أنا خلصت ...

-طيب تعالي ..

مشيت قعدت معاه في نفس الكنبة وبديت أسمع ليه الأحاديث الحفظتها ...
بما إننا في إجازة وماف موضوع إقترح علي إني أبدا أحفظ في صحيح البخاري ومسلم ...كانت فكرة سمحة واتشجعت لانو هو كان بحمسني وكل م أسمع ليه بجيب لي هدية ك مكافأة ...
بعد خلصت مسح على راسي بحنان وإبتسم ...

-أحسنتي طالبتي النجيبة ...

-نجيبة دي منو ؟

-(ضحك) اذا فتحنا موضوع نجيبة الاصلاً انا م بعرفها دي م حنخلص وح تفوت عليك المكافأة ...

-طيب يلا قول ..جبت لي شنو ؟