ښکلا لري څه ښکلی مو هېواد دی
په دنګو ښائستو زلمو آباد دی
امنیت ته یې په فکر هر الحاد دی
الحمدلله شکر چي آزاد دی

نه جنګ شته نه چاپې شته نه بمونه
په امن دي اوس ټوله اولسونه
خوشحاله دي زموږ ټول افغانان وروڼه
وروري ده اخوت او اتحاد دی

ښکلا لري جنت جنت وطن دی
د ښکلو ښائستو څهرو مسکن دی
هېواد مي دی او زړه مي پرې مئین دی
ورک شوی ترېنه شکر شر فساد دی

ډېوې د خوشحالۍ پکي بلېږي
ګلونه رنګارنګ پکي ځلېږي
د امن سپین بیرغ پکي رپېږي
په خپلو شازلمیو باندي ښاد دی

لرمه خاص له زړه ورسره مینه
رګو کي مي جاري ده لکه وینه
هرخوا او هره سیمه یې حسینه
غزل د (هلالي آغا) کي یاد دی

هلالي آغا