کتێبخانەی کوردستان

‍ تۆ ئەفسانە بمێنەوە
.
یوونس ڕەزایی
.
.
تۆ ئەفسانە بمێنەوە بۆ سبەینێ
کچی خاک بژێنەوە بۆ ئێستا
مەل بڵێوە بۆ تەنیایی ئەمن
نیشتمان ئەفسانەی خاکێکی تەنیایە.

رۆژی سەرەتا
دارێک لەدایک بوو
لە کەلەکەی چەپی زەوی
مەلێک خوڵقا
لەسەر دوا لقی ئێوارێ
کچێک لە کەلەکەی راستی شێعرم دا
زمانی پشکووت

رۆژی دار لە ئێوارەی کچەوە
هەڵدێ و
لە نیگای دا ئاوا دەبێ کە دەریایە.

من ئەوڕۆ دەچمە راستەڕێی شاریی
قەڵەمێک فڕێ دەدەمە بەر دەمی تاریکیی
هەتاوێک لەدایک دەبێ

وشەیەک فڕێ دەدەمە سەر زاری بڵوار
هەزار گۆرانی شین دەبێ

دەستی کچێک دەگرم
سەراپا دەبم بە ئاور
ئەوە ئەفسانەی خوڵقانی گڕە
لە مێژووی کاتژمێرێک دا
کە ئێستایە.

تۆ رووت بەوە لە زمانی چیادا
خاکی ئەو وەرزانە لەبەر کە
کە بە خوێنی پەنجەرە سوورن
نامەیەک بنووسە بۆ کیژە چاوەڕوانەکان؛

بنووسە؛ تاڵێک لە بسکتان فڕێ دەنە دەریاوە
با ئاو شلوێ بێ و زەمانیش
بنووسە؛ ئاوێنەکانتان بەتاڵ کەن لە تەنیایی
لە سووچێکی دار بچێنن
با جەنگەڵ لە دەستتان دا بێ.

من قەڵەمێک بەدەستەوە دەنووسم ئاوێنە
دار شین دەبێ
دەڵێم کچ
مانگێک هەڵدێ لە ناو شێعرم دا
دەبێژم خاک
دەفتەرەکەم ئاور دەگرێ و
بەدەوری دا هەزار ماسی
نەورۆزانەی دەریا دەکەن.

من هەر دەوامەی بڵێسەی خۆم دەبم لەوڕۆدا
تۆش ئەفسانە بمێنەوە بۆ سبەینێ
نیشتمان مێژووی رووناکی دەوێ.


@younesrazaie

بەفرێك به‌ ڕاوێژی به‌هار

ڕابوون ڕۆژهەڵات

شه‌وێک، زستان به‌ئاور كه‌وتبوو؛ شار، مه‌ستی مه‌ستی مه‌ست
له‌پڕ هه‌رچی شه‌قامی شه‌و، له‌ شێعرا به‌ستی به‌ستی به‌ست

شه‌وێک، زستانی ساڵێک بوو؛ كه‌ رێبه‌ندان له‌ كۆڵاندا
له‌گه‌ڵ كیژان به‌هاری بوو؛ به‌هارێک، خه‌ستی خه‌ستی خه‌ست

شه‌وێک، گورگێک له‌سه‌ر زامێک ده‌نوست، پڕ بوو له‌ ڕۆژئاوا
مهابادێک؛ به‌كاتی رۆژهه‌ڵات،  په‌یمانی جوانیی به‌ست

شه‌وێک، من بوومه‌ حیزبی ڕۆژ، دروشمێک بووم هه‌تا ده‌ریا
وه‌ كۆماری بزه‌ی ته‌نیاییه‌كان بوو، تا به‌یان سه‌ربه‌ست

شه‌وێك، ڕۆژنامه‌ بوو، پڕ بوو له‌ وانه‌ی كۆتر و ساماڵ
شێعر بوو كووچه،‌ چیرۆک شار و به‌یتی نیشتمانێک هه‌ست

شه‌وێک، خه‌نجه‌ر  له‌سه‌ر بێده‌نگی ده‌خزا و  ئێمه‌ هاوار بووین
ئه‌وی تاریک بوو ته‌نیا ما، له‌ وێستگه‌ی بێكه‌سیی بنبه‌ست

سبه‌ینێ؛ بوو به‌ دووی مانگێک، كه‌ ڕێبه‌ندانه‌ سه‌ربه‌ندی
سبه‌ینێم من! سبه‌ینێی تۆ! سبه‌ینێیه‌ک؛ پڕی هه‌ڵبه‌ست

به‌ره‌و كام شار بڕۆم ئێستا؟ دره‌نگانی سبه‌ینێیه‌
ونم له‌و شاره‌دا، وا نوێژی پڕ به‌فرم به‌ گڕ دابه‌ست

https://t.me/kurdistanbooks

‍ سیزیەف و ئاوەدانییەکانی سبەینی
.
یوونس ڕەزایی
.
.
دەنگت لە ئاوەدانییەوە هات
چڵێکت تەنیایی دامێ
سەرت خستە ناو هەورێکی دوورەدەست و
چووی سەرقاڵی بارانە بی.

دەنگت لە ئاسۆی دارەوە دەهات
کە تازە بەهار ئەنگاوتبێتی
چڵێک گەزیزە و
قولێک بیرەوەری ئەو گەڵایانەی
یەستا رۆژێک لە تەمەنیان نەچەشتووە.

ئاوەدان بەوە لە لای من
مینا دەریا
کە لەخەونمدا شەپۆلەکانی یاخین
سمکۆڵ لە تۆفان دەکەن و
هەرەس دێنن بەسەر کات دا.

بینا بەوە
وەک شارێک لەپاش وێرانەی پاییز
بەرد بە بەردی خەزەڵوەر بسڕەوە
لە کۆڵان
خشت بە خشتی بادەوە ڕادە
لە شەقام
دیوار بە دیواری شەکەتیی بن کۆڵ کە.

لەسەر وێرانەی زەمان راوەستە و
دوور بڕوانە دەنگێک
کە باخی پێوەیە و
وەرزێکی واش
لانیکەم درەنگ نییە پاش باران.

من لەسەر شارێکی وێران ڕا
رووم کردەوە نیشتمان
لەسەر باخێکی گیرۆدە بە رووتیی
رووم وەرگێڕا لە داوەرین و
دیسان سنوووری خۆمم دانا.

لە نێوان دەریا و رووباردا
رستەکانم سەرپشک کرد
کات تینوو بوو بە رووناکیی ئەو بارانانەی غەریبن
دەست بۆ کامیان بەرم
کە تۆزی رێگای دوور
کاتی درەنگ
مەیدانی شەڕە نامۆکان بشواتەوە
لە سبەینێ.
هەرکام زووترم بگاتێ
تاقانەی وڵاتم دەبێ.

لە نێوان کەروێشکەی کچ و شنینەوەی باخەکانیشدا
سەرپشک بوو رستەی ئەمن
کچی بە سەمای باخەوە، هەڵبژارد
تا سنووری نیانیی بەرینتر بێ بۆ ئێستا.

هەر کەس دەنگ هەڵبڕێ لەو شارەی هەنووکەدا
ئاوەدانە گۆرانییەکانی ئێوارەی
حەیرانەکانی بەیانیی.

یاسای سبەینێی نیشتمان؛ شەقامێکە
ناوی دەریای لەسەر نووسرابێ و
چۆم بدوێ.
کچێکە؛ بسکی پەلکە کردبێ و
با بژی.
کوڕێکە؛ چرای بە دەستەوە گرتبێ و
پیادەڕێیەکان بسڕێتەوە لە شەو
وێرانییەکان روون کاتەوە لە کات.

وێرانیش بێ ئەو کاتژمێرەی لە زمانم دایە
ئەو رۆژژمێرەی لەخاکمدا
خشت بە خشتی کووچەکانی
بە نیگای رۆژێکەوە دادەنێنمەوە
دەنگەکان تا دوورەدەست بۆنی بەهاریان لێبێ
دەستەکان تا درەنگان
رەنگی تاو بگرن.

شەکەت نیم لە تەنیاییش تەنانەت
لقێک بزەی ئەو نیشتمانەم بەسە
تا سەرلەنوێ لە بناری شەقامەکانەوە
کێشی دونیا بخەمە سەر شانی شێعر و
بەرەو بەرزایی تێهەڵبچمەوە.

قورسە ئەو هەموو ئێوارەیەی دەگەڕێمەوە؛ بەتاڵ
سبەینێ دیسان دەرفەتم هەیە
تا باران بدوێ
بۆ ئاوەدانیی سەر لەنوێ.

@younesrazaie