لما كان الإمام الكاظم (ع) في سجن الفضل بن الربيع كان الرشيد يراقب حال الإمام بنفسه فأطل يوما من أعلى القصر على السجن فرأى ثوبا مطروحا في مكان لم يتغير عن موضعه فقال للفضل: ما ذاك الثوب الذي أراه كل يوم في ذلك الموضع؟

گَد ما تِجرّع مِحَن وجروح
نَحلان جسمه وذايبه الروح
يشوفونه ثوب بگاع مطروح
وظل يسأل السجّان هارون
""""" """"" """"" """"" """""
هالثوب المَّن ها يسجان ؟
كل يوم اشوفه بهذا المچان ؟
مو ثوب گَلّه بَشَر ذبلان
هذا ابن جعفر يالتنشدون
""""" """"" """"" """"" """""
هذا مِچانه وما يِهدّه
كل يوم سجده اطويله عِنده
مِنّ الفجر للظهر سَجده
ومو يَمنه باله بربّه مفتون
""""" """"" """"" """"" """""
هارون صاح بنَفس ظالم
اي هذا راهب آل هاشم
(الفضِل) گله ان چنت عالِم
ضيقّت ليش اعليه السجون
""""" """"" """"" """"" """""
ظل يدعي والدمعه بعيونه
خلّصني ربي ارجو المعونه
من ظلم هارون وسجونه
وچان استجاب الدعوه مضمون
""""" """"" """"" """"" """""
اطلق سراحه الطاغي فَتره
وللسجن عاده وچان أمره
يضَيقون كون اعلي بكثره
وسجن (الفضل) چان اسهل يهون
""""" """"" """"" """"" """""
لسجن ابن شاهَك جابه يا ويل
وظل ما يمَيز انهار عن ليل
وشدّوه بگيود وزناجيل
وبحيدر گباله يشتمون
""""" """"" """"" """"" """""
يضِيگ الهَوه ويزداد هَمّه
وللباب يدْنَه يريد نَسمه
(السِندي) على وجهه يلطمه
اتذكّر الزهره ولطم العيون
""""" """"" """"" """"" """""
اتذكر الصاحت بويه اغِثني
الگال آنه من صَحبك هضمني
(آمر على عبده وضربني)
ورّم بسوط احقاده المتون
""""" """"" """"" """"" """""
فاطمه ما تنسه الذِكرهه
حضرته بلوعتهه وقهرهه
يم نعشه واتجدّد كسِرهه
وتصيح واويلي يمسجون
""""" """"" """"" """"" """""

ياسر حسن
رجب الاصب ¹⁴⁴⁶