هادِم بيوت الشِرِك واهل النِفاق
يمته تحكُم دولِتَك بارض العراق
≈≈≈ ≈≈≈ ≈≈≈ ≈≈≈ ≈≈≈ ≈≈≈
يا مُبيد افسوقهه وطغيانهه
يا مُزيل الجَورهه وعدوانهه
يا مهّدم اهل الظلُم بنيانهه
يمتَه تحصِد افرُع الغَي والشِقاق
≈≈≈ ≈≈≈ ≈≈≈ ≈≈≈ ≈≈≈ ≈≈≈
بانتظارك يا مُعز الاولياء
تكسر ظهور اللِّي نِصبتلك عَداء
الهِدرت من اشياعكم اطهر دماء
تسوّي بيهم ركضه عالموت وسباق
≈≈≈ ≈≈≈ ≈≈≈ ≈≈≈ ≈≈≈ ≈≈≈
يمته تَورثها الارض يبن الهُداة
وتلجِم حلوگ التگول المهدي مات
وتاخذ بثار الضِمَه بجنب الفرات
وثار الاخذوهن سبي بظَهر النياق
≈≈≈ ≈≈≈ ≈≈≈ ≈≈≈ ≈≈≈ ≈≈≈
يا وكِت يبن الچِتَل مرحَب تعود
دارت اعلينه النواصب واليهود
استكبرو واتجاوزو كل الحدود
واعلَه سفك دمانه عِقدو اتفاق
≈≈≈ ≈≈≈ ≈≈≈ ≈≈≈ ≈≈≈ ≈≈≈
عجّل واملي الارض قسط وعدل
وفَرّح بجيتك الميّت والعدِل
وعِزنه بالدوله الكريمه الما تِذِل
ينذل العاشق من يطول الفراق
≈≈≈ ≈≈≈ ≈≈≈ ≈≈≈ ≈≈≈ ≈≈≈
(النَوّىٰ) وين استقرت بيك وين
يم رسول الله وام الحَسنين
لو بوادي الغري لو يَم الحُسين
لو بسامره طُفح بينه اشتياق
≈≈≈ ≈≈≈ ≈≈≈ ≈≈≈ ≈≈≈ ≈≈≈
ان شاء الله نشوفك بكل هَيبه ووِقار
تحكُم الكون ومِن الكوفه القرار
وتنشُر بزودك لواء الانتصار
بينه لهفه الشوف نصرك لا تُطاق
≈≈≈ ≈≈≈ ≈≈≈ ≈≈≈ ≈≈≈ ≈≈≈
اني اعرفك قادم وما عندي شَك
وادري لو ما انتّ مادار الفلَك
بس اگول شلون خِدر الله انهتَك
وانت صابر چا مَتَه تفك الوِثاق
≈≈≈ ≈≈≈ ≈≈≈ ≈≈≈ ≈≈≈ ≈≈≈
بنُص خرايب گِعدن بلايه سگُف
السياط اهون بِديهن تنصرُف
النظره عالنسوان بيمن تنشگف
يحقلك ابدال الدمع دمّك يُراق
≈≈≈ ≈≈≈ ≈≈≈ ≈≈≈ ≈≈≈ ≈≈≈
وعگب نوگ وحبِل وسياط وحديد
گبر عمتك تدري صاير هسّه بِيد
شمُر وابن زياد واِسنان ويَزيد
مالهه غيرك بعد والصدر ضاق
≈≈≈ ≈≈≈ ≈≈≈ ≈≈≈ ≈≈≈ ≈≈≈

ياســر حـســن
جمادى الآخرة¹⁴⁴⁶