-دكتور مرحبا دمدومي شو مو كلش بالروضه احسه مشتت و ما يفتهم !
= شكد عمره دمدومي؟
- 5 سنوات دكتور !
= شنو مشكلته ؟
- ماكو شي هو ذكي و شاطر و يخبل بس ما يقبل يكتب و يقرا بالروضه !
= حبيبي انت شاسمك؟
- دمدومي
= لا اسمك الحقيقي؟ مو الدلع
- دمدومي
= ما يعرف اسمه ام دمدومي ؟
- هههه لا دكتور هو متعود على هذا اسمه
= دمدومي هذا اي لون 🔴؟
- اخضر
= دمدومي هذا اي لون 🔵؟
- اصفر
- دكتور ما معلمته الالوان و الله !
= دمدومي وين بيتكم؟
- بعيد
= دمدومي انت بنيه لو ولد؟
- ما يعرف دكتور شمدريه
= شكد عمرك دمدومي ؟
- ما يعرف دكتور شنو السالفه
.
.
شوفي يا ام دمدومي
الذكاء مو بفتحه الموبايل او بالاجهزه الالكترونيه
الذكاء هو من تعليم الطفل الاساسيات
لازم يعرف اسمه اولا قبل أسم الدلع
لازم يعرف يسمي لون واحد بعمر ٣ سنوات و يعرف ٣ الوان بعمر ٣ سنوات
لازم يعرف جنسه بعمر ٣ سنوات
و يعرف يجاوب عن سكنه بعمر ٣ سنوات
و يعرف عمره بعمر ٤ الى ٥ سنوات
يعرف يحسب للعشره بعمر ٤ الى ٥ سنوات
هذه اشياء اساسيه
و الا كلنا نكول اولادنا اذكياء
كلنا نكول اولادنا ماكو مثلهم
بس هم اساسيات الاشياء ما يعرفوها
نخلي بالنا يم الاساسيات لغد افضل و مستقبل اكثر اشراقا
د. سيف سمير البياتي اخصائي طب الاطفال