كيف صابني مرض السكري 😔
انا ابو توفيق، عمري ٤٨ سنة، بأحد الزيارات الروتينية للعلاج سألني الدكتور كيف كشفت السكري فكان جوابي بهالقصة الصغيرة ..

من ٥ سنين كان ابني الكبير صف خامس شطور بالمدرسة وبيسمع الكلمة وبياخد العقل ومرضي وشايفو ومو مسدق..

بيوم من أيام كنت بالورشة (محل فروج) وكان ابني معي وفجأة قلي راس معدتو عم يجعو وقلي رح اطلع ارتاح بالبيت شوي ..
طلع لعند امو عالبيت وفات عغرفتو ومافي دقيقة الا منسمع صوتو وقع عالارض وعم يهز كل جسمو ..

متل لمح البصر اسعفناه لمشفى قريبة كتير ..

بس وصلنا عالاسعاف لقوا عندو رجفان بطيني بالقلب .. تعرض ل ٤ صدمات كهربا بس ضل عم يرجف قلبو لحد ما طلع طبيب وخبرني انو ابنك توفى للأسف 😭

كيف وشلون ما بعرف

ما فجرت .. بالعكس كبتت وبين عليي اني مستوعب الوضع ورضيت بقضاء رب العالمين ..

ضليت طبيعي لبعد سنتين، بعدها بتبلش قصتي الغريبة 🥹

بأحد الصباحات كنت عم اشرب القهوة عالشارع بمحلي وبيمروا رفقات ابني قدامي كانوا رايحين عالمدرسة .. هون بيتهيألي انو ابني ماشي معهم ..

بلشت شوفو كل يوم معهم واستناه الصبح والضهر 😔

وبلشت احصر واكبت وابكي مابعرف كيف هيك وخلال أسبوعين فقط من هالحادثة وهالكبت ببسعفوني عالمشفى بوجع بطن شديد ونفسي سريع واستغراغ ووقتها بيشخصولي حماض سكري وبدأت علاج السكري من يومها لهلأ ..

#ملاحظة يحرّض الكبت النفسي على المدى الطويل ظهور بعض الأمراض الجسدية مثل ارتفاع الضغط والسكري للأشخاص المؤهبين فيكون العامل المحرض لاكتشاف الأعراض...

السلامة للجميع 🌹
#لا_تحليها_زيادة
حملة أطلقتها وزارة الصحة للتخفيف من استهلاك السكر الأبيض لما له من أضرار

د. سومر شلبي somar shalaby🌹 ♥️