الدُعاء سلاحنا الوحيد، لما تتسكر علينا.. ولما معاش نلقوا منفذ؛
في أحلك اللحظات وحتى أحلاها ما عندناش سُوى الدعاء!

نقاوموا بيه في المشاعر الصعبة اللي منلقولهاش في تفسير
(يا ربّ فرّج، يا ربّ أستر، يا ربّ أني محتاجاتك)

في اللحظات الجميلة لما تحس فجأة بإدراك ( يا ربّ ما تحرمناش، يا ربّ ديما نقعدو هكي ولا حتى يا ربّ ما تختبرنيش فيهم)

الليالي الصعبة فاتت بالدعاء،
والمواد الصعبة نجحنا فيها برضو بالدُعاء!
حتى الأيام العادية الروتينية ما كانتش حتمّر بلا تفكير مفرط لولا الدُعاء..

ما نعرفش شعور أدفى من أنك تدعي،
لروحك.. للي تحبّهم، للمسلمين، حتى للغرباء اللي حتتلاقى معاهم مرة وحدة في الطريق!
تدعي بثقة أنك مسموع، وأنه فيه ربّ عظيم مش ناسيك ولا غافل عليك، بيقين أنه اللي خلق الضيق نفسه اللي حيطلعك منه للمساحات الشاسعة..

للدعاء لذة غريبة،مهما كانت صغيته،
مرتب مرة، ومفركس عشرة،
وحني خايفين ولا وحني نبكوا،
لما نرددوه في قلوبنا برُعب ولما ندسوه في سجداتنا الطويلة.

لولا الدعاء لما مرّ ألم والله،
الحمد لله ملء كل شيء 🤎