٧ حاجات مش بتعدي معانا في العلاقات

واذا تغافلنا عنها في البداية هيجي وقت و مش هنقدر نتعامل في العلاقة دي أكتر من كده وهنبعد

Emotional abuse 💢
ابتزاز عن طريق المشاعر
أو اساءة بالألفاظ شتايم أو ضرب و مد ايد تحت بند الهزار و التهريج
(ايه ده انتِ قموصه و بتزعلي)
(انتِ حساسه زيادة عن اللزوم)
(علي فكرة عادي يعني كل الناس بتعمل كده انتِ الي عايشه في دور ست الناظرة)
(خلاص انا مش ههزر معاكي تاني ولا هتكلم خالص طالما بتزعلي)

ده كله يتحط تحت بند الابتزاز العاطفي لو احنا بنعمل الحاجات دي او حاجة منهم نوقفها تماماً
ولو بتتعمل معانا نقول اننا مش بنقبل ده و نرفضه بشكل حازم

💢 النقد
النقد قادر يموت اي علاقة مهما كانت قوية
▪️نقد تحت بند التشجيع ان اللي بتعمله مش كافي و لما انتقدك هتبذل اكتر
▪️سخرية بهزار قدام الناس او التقليل من صفة او تصرف الطرف التاني بيعمله

النقد مبيوصلش لأي حاجة غير الرفض والهجر في النهاية
الإنسان بيحب الي يشجعه ويمدحه مش الي يقلل منه و يهينه..

💢أسلوب قلب الترابيزة
اما بانه ينكر تماما الغلط وانه محصلش وانت بيتهيألك
وبوصل للي قدامي انه مجنون وان كله الي بيقوله ده ماحصلش
أو انه يكون في رد فعل عنيف و غضب كبير وغير مبرر ان ازاي أصلاً انت شايفني غلطان و فجأه نلاقي الموضوع اتقلب ان انت اللي طلعت غلطان ومطلوب منك تعتذر وتراضي الطرف التاني بدل ما تتراضى

الأزمة ان اللي بيلعب اللعبة دي بيكون متخيل ان محدش فاهم غيره وهو اللي ماسك خيوط اللعبه كلها في ايده وان محدش يقدر يثبت عليه حاجة
وعايش في دور الضحية بشكل مخليه هو نفسه مصدق فيه ومتخيل ان مستحيل الطرف التاني مايصدقش!

لكن الحقيقة ان لو أتحملنا ده مره او اتنين او عشرة هيجي وقت وبندور وشنا ونمشي حتي لو معندناش دليل
والحقيقة اننا من أول مرة فاهمين وبنتغاضى لسبب تاني خالص غير اننا مش فاهمين..

💢 بدخل في علاقة جديدة وانا نيتي تغيير الطرف التاني
📍انا هتجوزها صغيرة عشان أربيها انا علي ايدي
📍هو شكله ملهوش في الخروج و السفر بس لما نكمل مع بعض ده أكيد هيتغير مش بمزاجه
📍هي بتشتغل بس لما اتجوزها هشترط عليها ما تشتغلش
📍هو عصبي و لسانه طويل بس انا هصبر عليه لحد ما يتغير و يهدى واكيد هيتغير عشان بيحبني

صعب جدا ارتبط بشخص او ادخل في علاقة صداقة مع طرف تاني وانا داخل بعقلية اني هغيره محدش بيتغير غير لما هو يكون عايز يتغير وبنسبة

لو الطرف التاني وصله طول الوقت انه مش راضيك و مستنيه منه طول الوقت تغير و اختلاف عن الشكل الي هو عليه الأكيد انك هتخسره..

💢 تعدي الحدود
اما حصار بالأسئلة في كل حاجة و بشكل فيه تعدي علي خصوصيات الطرف التاني
أسئلة تخص حياته الشخصية او أسئلة عن شغله ده لو في علاقات الصداقة
او حتى مع ولادنا إلحاح اننا عاوزينه يحكلنا كل حاجة و اصرار علي المُحاصرة بالاسئلة مع اننا شايفينه انه مش عاوز يرد او بيرد بشكل مختصر
لو ده بيحصل معانا نرد بشكل في وضوح اننا مش حابين نحكي او نتكلم في الموضوع ده
ولو احنا الي بنعمل محتاجين أكيد نوقف!

💢 التواصل المحدود
بتواصل بمزاجي وزي ما أنا عاوزة
حتى في طريقة الحب بحب زي ما أنا عاوزة أحب مش زي ما الطرف التاني عايز او محتاج
الي رايح جاي في التواصل فيه مشكلة
ولو حاولنا نتكلم الموضوع بيقلب بمشكلة أكبر
ده معناه ان العلاقة دي علاقة سامة و فيها مشكلة

💢 التلاعب والسيطرة
عاوز يقطعك من الناس الي حواليك
يبوظ العلاقات مع أهلك أو مع أصحابك
مش عاوز يكون للطرف التاني علاقة بأي حد
عاوزه له لوحده!

لو بنعمل حاجة من دي ناخد خطوة مع نفسنا ونوقفها ولو بتتعمل فينا نرسم حدودنا ونوضح اننا مبنقبلش الشكل ده من التعامل..
ماترهنوش على مكانتكوا عند الناس حتى المحبة ممكن تخلص لو أستمر الأذى..

النفس تميل لمن يزكيها ويلطف بها ويدللها ويستثنيها 🤍

#منصّة_إنسان
#إنسان_بلس
#noha_zahra

#همسات_زوجيه