كنت باسمع حاجة ع الساوند كلاود ... فالمحاضر كان بيتكلم عن [الإنهزام الرحيم ]

الانهزام الرحيم ... هو انك تسيب اللي قدامك يهزمك في نقطة معينة ....مش ضعف منك ولا قلة حيلة .... ولكن رحمة بيه.

المعنى ده مهم يكون موجود في بيوتنا

عادي جدا ... إن انت كزوج ... انك تسيب زوجتك تغلبك في الكلام في خناقة معينة ... وتعتذرلها .... مش لأنك غلطان او ضعيف الحجة ... ولكن رحمة بها ... عشان لو زنقتها أكتر هتتكسر .

وعادي كزوجة ...انك في وسط الخناقة تسكتي وتسيبيه يخرج الزعل اللي جواه من غير ما تكوني حريصة انك تثبتيله انه غلطان .. وتطيبي بخاطره بعدها وتقوليله [هذه يدي في يدك لا أذوق غمضا حتى ترضى ]... مش من باب الضعف ولكن من باب الرحمة بيه وبشعور حرقة الدم اللي حاسس بيه .

مش صح اننا ندخل كل مناقشة وكل خناقة بنفسية اننا عاوزين نعلم على بعض و نقلب الترابيزة في وش بعض .. و نبرر وندافع و نحط النقط على الحروف ونثبت موقف.... ده بيحول البيت من سكن لساحة حرب

لا تستقيم البيوت الا بوجود خلق التغافل والانهزام الرحيم .

وزي ما بانصح الأزواج دايما .... مهم في المشاكل إن الطرف الأكثر إتزانا يحتوي الطرف الأكثر إحتراقا .... وبشكل متبادل

ساعتها هانقدر نتجاوز كتير من مشاكلنا من غير ما نكسر بعض او نجرح بعض جرح عميق

#دفا_البيوت
#محمد_فتحي
#همسات_زوجيه