قالت : هل لو حسيت بالونس فى الوحدة انا كدة مش هبعد عن الناس ؟

محدش قال كدة

أنا دايما بتكلم عن طريقة تفكير خاطئة منتشرة طريقة ( يا إما كذا يا إما عكسها )

و دى طريقة بتخنقنا فى طريقة واحدة بس صح فى الحياة

و بتلخبطنا هو احنا المفروض نكون ازاى ؟

الونس مع النفس و انك تقدر تقعد لوحدك و انت مش خايف و مطمن دى مهارة

و انك تقدر تقعد مع الناس و تتواصل معاهم بشكل جيد دى مهارة تانية

و دى مش هتبوظ التانية
و لا دى عكس دى

انت لما بتكتسب المهارتين بتكون عندك مرونة عالية فى تقبل ظروف حياتك

انت لوحدك مبسوط و حالتك النفسية كويسة
و انت مع الناس مبسوط برده و حالتك النفسية كويسة

لكن هتلاقى كل واحد فينا يميل الى جانب معين بشكل فطرى و دا طبيعى

انت بتاكل الارز
و بتاكل المكرونة

لكن فيه حد بيفضل الرز و حد تانى بيفضل المكرونة و مفيش تعارض او تضارب بينهم

احنا اتعودنا و اتدربنا للاسف على ان فيه صح واحد بس و التانى غلط

و دى طريقة هتتعبنا فى حياتنا لو تبنيناها

الحياة محتاجة مرونة فى قبول الاختلافات
و الصح مش الى انت بتتبناه فقط

#دعاء_راجح
#همسات