هاي السنه نتسحر فراگ
لهل المحنه هواي نشتاگ
رمضان اجانه وهمه ميتين
ما ينحمل ضيم البعيدين هاي السنه

------------------------------------------

هل الاهلال وي البواچي
تذكرنه حلوين المحاچي

لمتنه راحت ويه الاحنان
ياهو اليگلهم جانه رمضان
هذا المچان الهم على الزاد
بنص الگلب هم الهم امچان

ياهو اليجيب الراحو ابعيد
يكمل وجعنه بليلة العيد
كل عام واحنه بهذا الونين
ما ينحمل ضيم البعيدين هاي السنه

---------------------------------------


تاخذنه كل ليله المحنه
نذكر كلام وطيب اهلنه

نحظن صورهم نغفى ونام
وننطر محاچيهم بالاحلام
اخ الفراگ شسوى ويلاه
بالساعه نكبر مية الف عام

زغار ومشينه تگول شياب
حدب ظهرنه لفگد الاحباب
لا متنه لا بالدنيا عدلين
ما ينحمل ضيم البعيدين هاي السنه


-----------------------------------


راحو بعد نامو بالتراب
ايس يگلبي بدكة الباب

هو اليموت ترده الدموع ؟
بس هيه نغزه ابين الاضلوع
لا من تكتلك لا تخليك
ثاري الوجع مشيوف مسموع

واضح على الما يمه ناسه
شاب النظر مو شعر راسه
ما صح دوى للروح للعين
ما ينحمل ضيم البعيدين هاي السنه

-----------------------------------------


تانينه بس ياهو اليجينه
جوه التراب الناطرينه

مگروده روح المالهه اعزاز
صاحبهه يبقى الموت يعتاز
تنام البشر بس هوه بالليل
يگضيهه بين النايم وفاز

چندوب بله اتخلص شلون
لامن نروح ولا يردون
طالت هواي وخنگه الاسنين
ما ينحمل ضيم البعيدين هاي السنه


----------------------------------------

مثل الزرع نذبل بلا ماي
عافونه ماظن غيمهم جاي

لا صوت لا من شوفة الراح
مثل البعيده الصعبه تنلاح
هيچ العمر يخلص حرامات
حلوه السمى بس مامش جناح

بس بالاسم عدلين ننشاف
وللموت صرنه انحسب انخاف
ثاري البشر والله مساكين
ما ينحمل ضيم البعيدين هاي السنه



تمت -- رعد الفريجي
16/شعبان /1446
الى روح والدتي