واحد من أكتر السرطانات اللي بتسبب وفيات على مستوى العالم ومشكلته إنه صامت في البداية يعني غالبا مفيش أعراض واضحة إلا لما المرض يكون تطور جامد
وحوالي 10% من وفيات السرطان هو سببها وهو Colorectal Cancer

عادات الأكل يعتبر العامل الأساسي والأهم في القصة دي والأبحاث أثبتت إن الناس اللي بتاكل Low Fiber Diet أو أكل قليل الألياف ومعاه High Fat Intake يعني دهون مشبعة كتير وبتعتمد على اللحوم المصنعة زي البرجر واللانشون بيكونوا معرضين للإصابة بسرطان القولون 2 لـ 3 مرات ضعف غيرهم

ليه بيحصل الكلام؟

ده لأن الألياف الطبيعية بتساعد على زيادة حركة القولون وبتقلل مدة بقاء الفضلات اللي ممكن تكون فيها مواد مسرطنة ومع قلة الألياف الفضلات بتقعد أكتر فبتسبب التهابات مزمنة وتراكم لمواد بتضر الخلايا
و الدهون الكتير بتزود إفراز Bile Acids ودي لما تتكسر ممكن تأثر على ال DNA بتاع خلايا القولون وتسبب تحولات خبيثة في الخلايا

أما اللحوم المصنعة زي اللانشون فيها نيتريت وNitroso Compounds والاتنين دول معروفين انهم مواد المسرطنة

ومع الوقت بيبدأ يظهر Adenomatous Polyps بس للأسف نسبة منها بتحول لسرطان خلال فترة ممكن توصل لعشر سنين أو أكتر شوية ودي الفرصة اللي لو لم تكتشف هتتحول للأسف

كل ده بيقول إن الوقاية أهم بكتير من العلاج ومش أي نزيف شرجي تطنشه وتقول بواسير وخلاص
ومش كل مغص تقول أكلت أكل تقيل وخلاص
و لازم تزود Fibers سواء خضار أو فواكه
ولازم تقلل الدهون الحيوانية واللحوم المصنعة