شوط كربلائي لإستشهاد الإمام الكاظم ع

****


لاصارت ولادارت ::: بطاموره إنسجن قرآن

مصيبة سابع أهل البيت ::: عجيبه تشيب الرضعان

****

تكرم عن بني العباس !!!! ورثو آل أميه أحقاد

أحفاد الذي گادو !!!! بالطف العلي السجاد

اللقب بس يختلف هُمّه !!!! نفس الگوم والأصفاد

الذرية النبي ظلمو

سلبو ذبحو وسمو

وگبور إشكثر هدمو

السقيفه الأسست هالجور ::: من چتل أم حسن للآن

****

سجنه ضَيِّگوه إعليه !!!! وحتى إِزيارته ممنوع

النهار يخلصه مثل الليل !!!! إِبظلمه وبالعطش والجوع

ساگه رَضَّه ثقل الگيد !!!! وغده عظم وجلد وضلوع

نَحَّل جسمه كِثرِ الهم

چبده يفور حار السم

إنمرد وإِتگَطَّع إِتخَذَّم

تِگَلَّب والأَجَل وافاه !!!! فگده فَطَّر الحيطان

****

خليفة جعفر الصادق !!!! سلام الله على موسى

الگمر والشمس والجنه !!!! تشم إِبّابه وتبوسه

وتشوف الدول كلها !!!! زوار الصحن هوسه

إِعتنينه أفواج مشايه

ومواكب خدمته هوايه

تِرِف گلوب والرايه

العلا حُبَّه شهيد يموت !!!! لا واللّٰه موخسران

****

ربنه إنتقم من هارون !!!! والكاظم رفع قدره

أمير الكاظميه أصبح !!!! القبب تشهدله والحضره

بجنحانه مسح جبريل !!!! الشباچ العلا گبره

ولقب باب الحوائج زاد

إبن جعفر أسد بغداد

وإذا أهله عليه إبعاد

الشيعه الخُلَّص أولاده !!!! والخدام والجيران

****

من أرض العراق اليوم !!!! المدينة قم وإلى مشهد

تعازي نبعث أويه الريح !!!! المعصومه ولأبو محمد

موبس مرقد القاسم !!!! حزين إِتوشح بأسود

العشاگه الحزن شامل

وبالأغصان الورد ذابل

الشرع لوسامح وقابل

نطبر عالنحور بسيف !!!! لأجل العذبه السجان

****

خادم العليله وخادمكم هادي العگيلي الناصري

https://telegram.me/aabas78
قصائد لكل ايام محرم اشترك بالقناة