مزراویلکە

گەڕانەوە
حەمەسەعید حەسەن

دێمه‌وه‌ و دڵ نه‌ک پێ
ده‌نێمه‌ سه‌ر خاکی خاوێنت
دێمه‌وه‌ و گشت گیانت ماچ ده‌که‌م
له‌ ته‌وقی سه‌رته‌وه‌ هه‌تاکوو داوێنت

دێمه‌وه‌ و هێنده‌ بۆ دیدارت
عه‌زره‌تی و تامه‌زرۆم
به‌ لێزمه‌ی فرمێسکم
ڕووخساری یه‌که‌مین گابه‌ردت
پاک ده‌شۆم

دێمه‌وه‌ و له‌ ئاوی سه‌رچاوه‌ت
تینوێتیی ساڵانی غه‌ریبیم ده‌شکێنم
دێمه‌وه‌ و به‌ شانه‌ی مژۆڵم
په‌رچه‌می ده‌وه‌نت دادێنم

دێمه‌وه‌ و به‌ گرد و چیاتا هه‌ڵده‌زنێم
دێمه‌وه‌ و چی شار و لادێته‌ ده‌گه‌ڕێم

دێمه‌وه‌ و ئه‌وه‌نده‌ شه‌که‌تم
به‌ردێکت ده‌که‌مه‌ بالیف و
لێی ده‌نووم
دێمه‌وه‌ و ڕۆحی پڕ حه‌سره‌تم
له‌ دار و له‌ به‌ردت هه‌ڵده‌سووم
*

#حوسێن خالیدی

(هەدبا)ی کچې نزار قەبانۍ بە باوکی دەگوت: تۆ ژیانی منت تێکداوە، هەرکات تەماشاۍ پیاوێك دەکەمـ و بە تۆۍ بەراورد دەکەمـ، لەبەر چاومـ دەکەوێ.

لە کۆتاییەکانې ژیانیدا کە نزار قەبانۍ نەخۆش کەوت و هەدەبا زۆر خزمەتی دەکرد، نزار دەیگوت: “هەدبا دایکمە”


@mzravilka

چیرۆکی خۆم و مام عەوڵای.
#مەلای حاجی ڕەسوی
لە کۆڕی زایەڵە وەرگیراوە
ماڵمان لە مامکاوێ بوو، ئەو کاتی لە گوندەکان ئێواران کە خەڵک لە سەر ئیش و کەساباتی خۆی دەگەڕایەوە، لە سەربانەکان کۆ دەبوونەوە، جا هەر کەسە دەگەڵ هاوپیشەی خۆی ڕادەوەستاو باسی کاری ڕۆژانەی خۆیان دەکرد، یا ئارۆچکەیەک دەکرایەوە بە کۆمەڵ لە دەوری ئاورەکە ڕادەوەستان و قسەی خۆش و نستەقیان دەگێڕایەوە، بەڵام زۆربەی زۆری خەڵک کاروانچی بوون بە قاسمەڕەشی دا بارمان دەبرد بۆ بازاڕی سونێ لە باشوری کوردستان و ئێوارێ دەگەڕاینەوە، مامکاوێ پیاوێکی بە تەمەنی لێبوو نێوی مام عەوڵا بوو، مام عەوڵا هیوایەتی ئەوە بوو ڕۆژانە خەبەرێک وەر گرێ و لە مزگەوت بڵاوی پکاتەوە، من کە هاتوو چۆی قاسمەڕەشیم دەکرد و ئەگەر خەبەرێک ڕوداوێک هەبایە بۆ مام عەوڵام دەگێڕایەوە، هەر بۆیە مام عەوڵا ئۆغری من ببوو هەموو ڕۆژێ کە دەگەیشتمە سەربانان مام عەوڵا دەهاتە لام و پرسیاری لێدە کردم، چ خەبەرە، دیژبان چۆن بوو، کرێ بار بە چەندی بوو؟ زۆر پرسیاری دیکە، منیش هێندێک ڕۆژان کە ماندوو بێتاقەت دەبووم پێم خۆش نەبوو مام عەوڵا هێندە پرسیارانم لێپکات، ڕۆژێکی گوتم فکرێکی بۆ مام عەوڵای نەکەم چیتر پێم دەرناچیت، دووسێ خەبەری درۆی پێ دەڵێم دوایە کە زانی خەبەرەکانم درۆن چیتر داوای خەبەرانم لێناکات.
ڕۆژێکی گەیشتمە دەرکی مەدرەسەی مام عەوڵا گەیشتە لام، سڵاوی کرد و زەردە خەندێکی بۆ کردم وگوتی خەبەرو باس؟ گوتم مام عەوڵا ئەوڕۆ خەبەرێکی زۆر ناخۆش هەیە، مام عەوڵا دوو هەنگاو هاتە پێش گوتی چۆن چۆن؟ گوتم ئەوڕۆ لە کانیە زەردێ ماشێنێک هەڵدێراوە شەش حەوت نەفەری تێدا مردوون، مام عەوڵا گوتی پەککوو ئەوە خەڵکی کوێ بوون؟ گوتم وەڵا نازانم جارێ مەعلووم نییە، مام عەوڵا دەستی بە پشت قوونێ وەگرتنوو ڕۆیشت بۆ مزگەوتێ خەبەرەکەی بڵاو کردبۆوە، ڕۆژی دوایی دووبارە گەیشتەوە لام، گوتی ئیشااللە خەبەری ئەوڕۆت خۆشە، گوتم وەڵا مام عەوڵا خەبەری ئەوڕۆم زۆر لە هی دوێنێ ناخۆشترە بۆ نەتزانیوە؟ گوتی ناوەللا بۆ چی بووە؟ گوتم کوڕە ئەوڕۆ مام جەلال لە ڕەزاییە سواری عەلی کۆپتەری بووە ویستوویەتی پچیتە تارانێ، کاتێک عەلی کۆپتەرەکە بڵیند بووە بۆ هەوای دەرگای عەلی کۆپتەری لێبۆتەوە مام جەلال لە هەوایڕا بەربۆتەوە، مام عەوڵا تۆزێک پێکەنی و گوتی کوڕە شتیوا چۆن دەبێت، گوتم بۆ نابێت مام عەوڵا، قەزاو قەدەری خودای ئەگەر هات پیاو فکریشی بۆ ناکات، مام عەوڵا سەرەتا بەگومان بوو بەڵام دوایە باوەڕی کرد و ڕۆیشت بۆ مزگەوتێ.
نوێژی شێوان بابم لە مزگەوتێ ڕا هاتەوە کە دەرگای کردەوە زەردە خەندەی لە سەر لێوان بوو، گوتم نا، خەبەری مام عەوڵای پێیە، هەر دانیشتوو گوتی ئەرێ عەوڵای برایمی ئەوان خەبەرە قۆڕان لە کوێڕا دێنیت؟ دوێنێ گوتی ماشێنێک هەڵدێراوە شەش حەوت نەفەری تێدا مردوون درۆ بوو، ئەوڕۆ هاتەوە دەیگووت مام جەلال لە عەلیکۆپتەری بەر بۆتەوە، دەڵێ مەلای ئێوەشم ئەو خەبەرانە پێدەڵێ، گوتم کوڕە مام عەولای فشاری بۆ هێناوم بۆ خەبەران، گوتم دووسێ خەبەری درۆی پێ بڵێم بەڵکو وازم لێبێنیت، ڕۆژی دوای مام عەوڵا هاتەوە لام ڕوی دەلا نەدەکردم گوتی وەڵاهی هەتیوە بەوان درۆیانت منیش بێ ئیحتوبار کردووە، ئێستا کەس باوەڕ بە خەبەرەکانم ناکات.
باش بوو پلانەکەم سەری گرت مام عەوڵا وازی لێهێنام.

@mzravilka

#شێعرێکی کوردی بە شێوەی پێنج خشتەکی لە وەرگێڕی بەناوبانگ "محەممەد قازی "
وەرن کوردینە تاکەنگێ کە ئێمە غەرقی گێژاوین
لە دەستی میللەتی غەیرە پەرێشانحاڵ و داماوین
لە بازاڕی جەهالەتدا بەبێ پووڵی هونەر ماوین
وەکوو دارێکی بێ ڕیشە هەموو وشکین و بێ ئاوین
بە پەیکانی بەڵا ئەمڕۆ هەموو مەجرووح و پێکاوین
٭٭٭٭٭٭٭٭٭٭٭٭٭٭٭×٭
لەبۆ مە عەیبە تاکەنگێ بمێنین وا دەزیللەتدا
بە لەفزی کوردی کوردین ئەمما نەک دەمیللەتدا
بەڵێ کوردیش کەسێکە گەر بەبێ میسلە دەغیرەتدا
نە وەک ئێمە هەموو وەختێ کە تێماوین دەقیللەتدا
وەکوو خانم دەخەڵوەتدا، هەمیشە غەرقی سووراوین
٭٭٭٭٭×٭٭٭××٭٭٭٭٭٭
خەریکی عەیشی شاران و خەریکی نۆشی بازاڕین
لە لایەکدا موتیعین و لەژێر ئەحکامی ئەغیارین
لە لایەکدا دەگەڵ یەکتر هەموو خەسمین و وەک مارین
نە دۆستیی و ئیتیحادێکە وەکوو دێوانە وا هارین
خودایا چەند خراپین و لەبۆیە هێندە شێواوین
٭٭٭٭٭٭٭٭٭٭٭××××٭
تەماشای میللەتی ئینگلیس لەسایەی عیلم و مەعریفەت
لەسایەی عیلم ئەمڕۆکە بەرەو ژوورە لەگشت دەوڵەت
لەسایەی عیلم بێدارە لە خابی جەهلەت و غەفڵەت
لەسایەی عیلم مەحفووزە لە شەڕڕی جوملەی میللەت
فەقەت هەر ئێمە بەدبەختین تەباری جەهل سووتاوین
٭٭٭٭٭٭٭٭٭٭٭٭٭٭٭٭٭٭٭
وەرن ئەمڕۆکە خۆ تاکەی ئیدی وەختی هونەرمانە
لەخابی غەفڵەتا ماوین بەسە وەختی حەولدانە
لە کەسبی مەعریفەت سەعیی بکەین وەک مەرد و مەردانە
"ئیمامی" کوردە بۆیە وا تەعەسسوب کێشی کوردانە
هەزاران حەیف بۆ ئێمە کە بێ شوێنین و بێ ناوین
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
ئەم هونراوەیەی "محەممەد قازی " وا لێرەدا دەیخەینە بەرچاوی خوێنەران، لە کەشکۆڵێک وەرگیراوە کە بە دەستخەتی خۆی بەر لە جێهێشتنی سابڵاغ لە تەمەنی 15 - 16 ساڵاندا نووسراوەتەوە. ئەم کەشکۆڵە جگە لە چەندین هونراوەی خۆی بە کوردی و فارسی،شێعری هێندێک لە شاعیرانی دیکەشی تێدایە.
وا دەردەکەوێ ئەم کەشکۆڵە لەسەر داوای شەهید "محەممەد حوسێنی سەیفی قازی "نووسرابێتەوە.هەر وەک کاک محەممەد قازی لە "بیرەوەرییەکان"ی خۆیدا باسی دەکا بەر لە چوونی تاران و جێهێشتنی کوردستان ماوەیەک لە "گوێکجەلی" میوانی "حەمەحوسێنخان" بووە.لە سایەی بەرپرسیاری "فەڕوخ لەقا خانمی مەلیک قاسمی"هاوسەری سەیفی قازی ئەو کەشکۆڵە لە نێو نەچووە و گەیوەتە سەردەمی ئێستا.
حەسەن قازی
ژێدەر: گۆواری گزینگ، ژمارە ۱۹ بەهاری ۱۳۷۷ی هەتاوی.

@mzravilka

#م ا

نوکتەیەکی ئەدەبی زۆر شیرین


ڕۆژیک خوالێخۆشبوو خاڵ لەزەمانی نووسینەوە کتێبی ناڵەی دەروون، بە هەڵکەوت لەسلێمانی تووشی ڕەحمەتی ماموستا قانعی شاعیر دەبێت،
لەنێوان قساندا ماموستا خاڵ ئەو چوارینە فارسییە دەخوێنێتەوە و داوا لە قانع دەکات بۆی بکات بەکوردی و دوو ڕۆژیشی مۆڵەت پێ دەدات.

شێعرە فارسیییەکە  ئەوەیە.

زاسباب نجات اندر قیامت
نخستینش رضای مادرانست
بلی این نکته را از خود نگویم
خدا فرمود رضای ما، در آن است
ـــــــــــــــــــــ

قانع هەر ئەوکات وڵامی دەداتەوە و ئاوا دەیکات بەکوردی.

ئەوەی ڕزگار دەبین پێی، ڕۆژی قیامەت

یەکەمیان دڵ بەدەست هێنانی دایکە.
خودا فەرمووی بە ریزوانی بەهشتێ
ئەوەی زانیت عەزیزی دایکە، دایکە.
چاوکانی: کتێبی ناڵەی دەروون
✍محەممەدی خاڵ





.@mzravilka

#هاوڕێ


دێی زەلیلان ڕێک لە نێوەڕاستی نەغەدە و شنۆ هەڵکەوتووە و بەپێی وەیکە دێیەکی چووکەیە و حەشیمەتی کەمە مەلایان نەبوو و مەلا زیرەک بە هۆی وەیکە بێکەس و بێ ژن و ماڵ و منداڵ بوو پێشنوێژی و شتی وای بۆ دەکردن و هەر لە مزگەوتیش دەماوە.

ڕۆژێکیان مەلا زیرەک کیلۆمیترێک لە دێی دەچێتە سەرەوە و لە چۆمی گادەر جلوبەرگی دەشوا و هەڵیان دەخا و مەلەی دەکا، هەر کە جلوبەرگەکانی ئیشک دەبنەوە دەبەریان دەکات و دەگەڕێتەوە بۆ دێ.
لە پێش مزگەوت کە خەڵک خڕ دەبنەوە پیاوێک دەڵێ مامۆستا ئەو هەموو مێروولە چییە بە گیانت وەیە؟
مەلا پەرۆشی دەبن و یەکسەر ئەو یەک کیلۆمیترە دەگەڕێتەوە و مێروولەکان ڕێک لە شوێنی خۆیان دادەنێتەوە!😊

ئەوەش ڕوحم و بەزەیی مەلا زیرەک بۆ مێروولان(میازار موری کە دانە کش است/ کە جان دارد و جان شیرین خۆش است).

خۆ دەیتوانی هەر لەپێش مزگەوت خۆی بتەکێنێ دوور لە لانەی خۆیان، بەڵام دڵی نەهاتووە.

@mzravilka

#HASSAN


پاییزان کە لە کڕوکاش و کاری مەزرا دەبووینەوە، بابم دەیبردم کەوش و کەواوپاتۆڵی بۆ دەکڕیم. کاعەوڵا لە سێ‌ئاشانی مهاباد دووکانی خەیاتی هەبوو   کە لەسەر ڕێگای هاموشۆی مەدرسەم بوو. قەتم مشتەری لێ نەدیتبوو.
لەگەڵ بابم لە دووکانی کاعەوڵا وەژوور کەوتین. کوتی : دەستێکم کەواو پاتۆڵ بۆ ئەو کوڕەم بدروو بەڵام با بڕێک فش‌و فۆڵ و گەورە بێ و بۆ ساڵێکی دیکەش تەنگ نەبێتەوە و لەبەری‌ کا.
کا عەوڵا پرسی: تەمەنی چەندە؟
- سێزدەی نەحس!
: ئیشەڵا نەحس نابێ و بۆتان ببێتە داری بەری. شان و شەپیلک و قەد و باڵای پێوام و لە هاتنە دەرێدا بابم وەبیری هێناوە کە لە ئەندازە و معیارەکە بڕێک گەورەترم بۆ بدروێ چونکە مێرمنداڵم و زوو هەڵدەدەم، با ساڵێکیتریش لە بەری‌ کەم؛ دەڵێی گۆڵەکەرە ڕۆژ لەگەڵ ڕۆژ غللورتر دەبێ و زوو هەڵدەدا.
دوای حەتوویەک کەواوپاتۆڵم وەرگرتەوە.  ، ئەوەندە فش بوو نێفەکم لە عەرزی دەخشا. کە بای هاتبا، چوون ئایڕۆدینامیک نەبوو! یا با دەیبردم یا هێزی بەربەرکانی لە گەڵ بام نەبوو  و نەمدەتوانی بەرەو با بڕۆم. دەردی بێ پشتێندیش سەربار بوو و حەوتوویەک هەر ئاوا لەبەرم کرد تا لە کراسە کۆنی دایک و خوشکان پشتێندێکیان بۆ ساغ کردمەوە و ئەوجار توانیم لە بن پشتێندەکەدا بڕێکی هەڵوێزنم. 
کێشەی گەورەم لەگەڵ گیرفانی چاکەتەکم بوو؛ گیرفانی ڕاستم پێنج سانت لەوەی چەپم لە خوارتر بوو، یانی خۆم کە ڕاست دەستم تەواو بە دەستە چپم ڕاهاتبووم و لەوانە بوو بتوانم پێشی بنووسم. دووایی زانیم هوونەرەکەی وەستا عەوڵایە کە وای کردووە  پەپوو لە دووکانی دەخوێنێ و کەسی وێنەکەوێ!!!!!



👉@mzravilka👈

#م. سلێمان سەلیم

کۆبونەوەی سێ قۆڵی .

دەگێرنەوە پارە و زانست و ڕەوتار کۆبوونەوە دوای تەواو بوونی کۆبوونەوەکە وتیان بۆجارێکی تر لەکوێ کۆبینەوە یان کارمان بە یەکتر بوو لەکوێ یەکتر ببینینەەوە.
پارە گوتی من دەڕۆم  هەرکاتێک کارتان بە من بوو لەبازار دەمبیننەوە.
زانست گوتی منیش لە قوتابخانە و زانستگا و ناو کتێبەکان و .. . دەمیبنەوە .
ڕەوتار بێدەنگ بوو؟
پرسیاریان لێکرد ئەگەرئیشمان پێت بوو لەکۆی بتبینینەوە ؟
وتی: ئەمن بڕۆم جارێکتر نامیبننەوە.
بەداخەوە ڕۆژ بەڕۆژ ڕەوشت و ئەخلاق و شەرم و حەیا ماڵئاوایمان لێدەکات .
علیم و زانیستیش ڕۆژبەڕۆژ بارگەی خۆی دەپێچێتەوە
بڕوانامەمان  زۆربووە بەڵام کرداری لەگەڵدا نییە.


@mzravilka

#ئەمین سێفی

ئەگێڕنۆ کە حەمەلاوبەگی ولەژێر کە بەقیافە بچووک پیاو بووە خواعەفووی کات زۆر قسە خۆش بووە لە یەکێ لە بەسەرهاتەکانیا ئەڵی دوو مامەم  ڕۆژێ لەسەر بەینەزەوی بوو بە شەڕیان کە یەک لە یەک زەبەلاحتر بوون بۆ ناو جێیی کەوتمە بەینیان مامە گەورەکەم شەقێکی داهێنا و بۆ ئەویان بەرمن کەوت.
بردمی بەحەوایا کاتێ کە هاتمۆ خوارۆ ئاشتیان بوبۆوە ئەم لاولای یەکیان ماچ ئەکرد .
یا جارێ تر باسی ژنیان کردووە وتوویە دە بەخوا ژن لەشیرینی خۆیا شەقی بردوو.


@mzravilka

چرای نیشتمان

زامی کامیان بەسوێترە؟
ژنێ جێگەی
سەرنجی پیاوان نەبووبێ؟
یان شاعیرێ
هیچ شیعرێکی
جوان نەبووبێ؟

بڕوام بە سێ دەرمان هەیە
بۆ هەموو دەردێ دەست دەدەن
هەم بۆ ئازاری دەروون و
هەم هی بەدەن
یەکەم: موزیک
دووەم: شیعر
سێیەم: دایکی
جوان و دلۆڤانی وەتەن

ئەی نیشتمان
هەر چییەکم دەست کەوتووە
لەگەڵ تۆدا بەشیان دەکەم
چی مەدالیام وەرگرتووە
لە بەرۆکی تۆیان دەدەم

بە مندا دەناسرێنەوە
گەل و وەتەن
کەچی کە دەگەڕێمەوە
داوای ناسنامەم لێ دەکەن

وەکوو چۆن جوانترین گۆزە
لە گڵی ئاسایی دەکرێ
جوانترین شیعریش بە وشەی
ئاسان و سادە دەنووسرێ

کێشە نییە کە ناتوانی
ببی بە ئەستێرەی ئاسمان
هەوڵ بدەی
دەبی بە چرای نیشتمان

سواری ئەسپی خەڵکی مەبە
چونکە دەبێ درەنگ یان زوو
لێی دابەزی
ئەسپی بیری
کەسانی دیکە زین مەکە
ئاخر بەوە دەڵێن: دزی
*
شیعری: ڕەسوول حەمزاتۆڤ
و. حەمەسەعید حەسەن

#مامۆستا خۆشناو

شەوێدی لە نوێژێدا بووم خێزانم گووشیەکەمی هەڵگرت
بە دەنگێکی بەرز گوتم: ایاک نعبد و ایاک نستعین
دیتی ڕەمزی لەسەرە
ئەویش کە ئاوا گوێی لە من بوو، گوتی:اهدنا صرات المستقیم و گووشیەکەمی داناوە
نوێژەکەم تەواو بوو، بە پێکەنینەوە چاوێکم لێ کرد
ئەویش پێش ئەوەی هیچ بڵێم گوتی: باشە حکوومەت فلتێری لەسەر واتساپ لابردوە، تۆ بۆ ڕەمزەکەی لانابەی؟

هیچ ئیدی، جوابێکم نەبوو.


@mzravilka

مامۆستا هێمن
کۆپەڕی پاشەرۆک
شێعری : بەهار هەر دێ


لە گیاندانا دەگوڕێنم بژی هەر کورد و کوردستان
بەگوللەی دژمنانی گەل دڵیشم بێتە ڕاوەستان

پشووی دواییم دەخوێنم بۆ گوڵ و گوڵزاری ئەم خاکە
لە سایەی ئەم گوڵ و گوڵزارەیە بوومە هەزار دەستان

دەزانن زامی دیلی چەند بەئێش و چەند بە ئازارە!
دەبێ ڕابێین هەتا ئێمەش دەگەینە ڕێزی سەربەستان

خەتای خۆمانە تا ئێستا کە هەروا کۆیلە و دیلین
ئەوانەی شاد و ئازادن کەمێ زووتر لەخەو هەستان

نەتاندیوە کە ڕووباری خوڕێن بەردی دەقەڵشێنێ
وەهاش هەر زۆرداری دەسووتێنێ گڕی هەستان

لە مەیدانی شەڕانخێوی خەباتی قەڕنی بیستەمدا
سەرم سووڕما کە ئەسپی سووکەسواری کوردی بۆ وەستان

وەڵامی دامەوە پیرێکی ئازادەی جهاندیدە:
خەتای سواران نەبوو پێش سوارەکانمان قورس و ناوەستان

هومێدێ بەرمەدەن ڕێگەی خەبات بگرن بڕۆنە پێش
تەماشای خەڵکی تێکۆشەر بەدیکتاتۆری چۆن وەستان

هەتا کەنگێ سیاچاڵی بەسامی دژمنی زاڵم
پڕاوپڕ بێ لە ڕۆڵەی گەل جمەی بێ وا لە دەس بەستان؟

هەتا کەی ئەشکی خوێنینی کچە کوردی برا کوژراو
لە جێی بادە و لە بەزمی دژمنان بدرێتە دەس مەستان

مەترسن ڕۆڵەکانی قارەمانی گەل لە گیانبازی
لە کۆڕی ئەم خەباتە بێ وچانە تاقە یەک کەستان

سەهۆڵبەندانی بێدادی ئەگەرچی تووش و دژوارە
بەڵام لێم سوورە وەک ڕۆژێ بەهار هەر دێ لەدووی زستان

بەخەڵکی عالەمی سەلماندووە تاریخی ئازادی
دەبێ زاڵم لەبەر تێکۆشەران بەرداتەوە دەستان

#A Karami

پیاوێک ماسییەکی ڕاو کرد، بردییەوە ماڵەوە، بە خێزانەکەی وت: ئەم ماسیە سوور بکەوە.

خێزانەکەی وتى: ڕۆنمان نییە.

پیاوەکە وتی: مادام وایە  بیبرژێنە.

ژنەکە وتى: خەڵووز و دارمان نییە.

پیاوەکە وتی: کەواتە  بیکوڵێنە.

ژنەکە وتی: غازمان(گاز شهری) نییە.

پیاوەکە کە ئەمانەی بیست، ماسییەکەی بردەوە لێواری دەریا و فڕێیدایەوە ناو ئاو.

ماسییەکە سەری دەرهێناو ڕوو لە پیاوەکە وتی: بژی حکومەت!

"عزيز نسين"

@mzravilka

دوو ڕۆحی بریندار
‌حەمەسەعید حەسەن

ئه‌وه‌ کام به‌ردی کینه‌ بوو
گۆزه‌ڵه‌ی دڵمانی شکاند؟
ئه‌وه‌ کام چه‌قۆی تۆڵه‌ بوو
خوێنی جه‌سته‌مانی ڕژاند؟

به‌ ئاگری شه‌ڕێ سووتاین
به‌ر له‌ ئێمه‌ هه‌ڵگیرسابوو
به‌ تاوانێ سزا دراین
ڕووی نه‌دابوو

ده‌ڵێی ته‌یری ئه‌نگێوراوین
ده‌ڵێی شیعری باڵکراوین
ده‌ڵێی له‌ لووتکه‌ی شاخه‌وه‌
هه‌ڵدێراوین
نه‌ ده‌نگمان ده‌گاته‌ که‌سێ
نه‌ به‌ هانامانه‌وه‌ دێ
فه‌ریادڕه‌سێ.

بڵێی ڕۆحی بریندارمان
له‌ ئاسماندا به‌ یه‌ک بگه‌ن؟
بڵێی په‌ری و فریشته‌کان
له‌ چیرۆکی
خۆشه‌ویستیمان تێبگه‌ن؟

مه‌گه‌ر ئاگری ئه‌ڤینمان
شه‌وه‌زه‌نگی
عاشقێ ڕوون بکاته‌وه‌
ئه‌گه‌رنا هیچ
سه‌بووریمان ناداته‌وه‌
*
ئه‌نگێوراو: پێکراو.

#مەلای حاجی ڕەسوی

چیرۆکی حەمەخاڵە وحەمەزیڕۆ.

جادەوبان نەبوو، حەمەخاڵە وحەمەزیڕۆ بەپێیان دەچوون بۆمیراوێ، گەیشتنە پردێ کاک ئاڵڵای لەدەشتێ وەزنێ، گەزەخامێک (میترێک پارچە) لەسەر ڕێگا کەوتبوو، هەر دووکیان بەیەکەوە تاویاندایە لێیان بووبەکێشە، حەمەخاڵە دەیگوت من زوتر تاوم دایە حەمەزیڕۆ دەیگوت من زوتر تاوم دایە، هەریەکە گۆشەیەکیان گرتبوو خەریکبوو لێیان ببێت بەشەڕ، حەمەخاڵە گوتی کاکەگیان ئێمە لەو چۆلوو هۆلە بیکەین بەشەڕ کەس نییە لێکمان پکاتەوە، ئێمە هەردەچیین بۆمیراوێ، لەوێ دەچیین بۆلای مامۆستای مزگەوت بامامۆستا شەرعەکەمان بۆپکات بەشەرع وەبەرکێهەمان کەوت با هی ئەو بێت،
حەمەزیڕۆ بەپێشنیارەکەی حەمەخاڵە ڕازی بوو، ڕۆیشتن بەرەومیراوێ، گەزەخامەکەش هەریەکە گۆشەیەکی گرتبوو تاگەیشتنە ماڵێ مامۆستای، دوای سڵاوو چاکووچۆنی، داوایان لەمامۆستا کرد کە شەرعەکەیان بۆپکات، مامۆستا گوتی بەشەرع هەرچی درۆیان زیادترپکات وەبەروی دەکەوێت، حەمە خاڵە گوتی مامۆستا ساڵێکی گەنمم بەوەڵاخان گێرە دەکرد، لەناوەڕاستێ گێرەدا گاسورم لێ بزر بوو، ئەولای گاسورو لایدی گاسور! گەنمەکەم گێرە کرد کاو دانم لەیەک جیا کردەوە، بارێکم گەنم برد بۆ ئاشی کردم بەئارد و هێنامەوە، منداڵەکانم سێ چوار ڕۆژ بوو نانیان نەخواردبوو زۆر برسی بوون، خێزانم تەشتێکی ئارد کرد بە هەویر دەستی کرد بەنان کردن، هەرنانێک کەسازی دەکرد منداڵەکان تاویان دەدایە و دەیانخوارد، نانی دوایی بلۆقێکی گەورەی دەرکرد هێندەی یەک خانوو، پتێکم لەبلۆقەکە دا گاسوور بە هۆقەهۆق دەرپەڕی!
حەمەزیڕۆش گوتی: مامۆستا ساڵێکی خەڵک ترێیان دەبرد بۆ ئەو دێهاتانەی لاجانێ، یەک ودوو بەگەنمیان دەگۆڕیەوە، منیش ترێم هەبوو وەڵاخم نەبوو، کەڵەبابێکی گەورەم هەبوو، کورتانم کرد ودوو سەوەترێم لێنان و ڕۆیشتم بۆلاجانێ، ترێیەکەم یەک ودوو بەگەنم گۆڕیەوە، دوو تەلیسی پڕ گەنمم وەرگرتبوو، گەنمەکەم لەکەڵەبابەکە بارکردو  لێی سوار بووم، گەیشتمە چۆمی بادیناوێ، هێندێک باران باریبوو چۆم زیادی کردبوو، ئاودەگەیشتە سەرپشتی کەڵەبابی، بارە گەنمەکەم تەڕ دەبوو، گەنمەکەم لەسەر پشتی کەڵەبابەکە هێنایە خوار دانک بەدانک هاویشتمە ئەوبەری، لەوبەری دانک بەدانک کۆم کردەوەو لەکەڵەبابەکەم بار کردەوە و لێی سوار بووم هاتمەوە ماڵەوە، کاتێک کورتانم لەکەڵەبابەکە کردەوە سەیرم کرد سەرشانی کەڵەبابەکە بریندار ببوو، چوم بۆلای وەڵاخداران، گوتم ئەگەر وەڵاخ سەرشانی بریندار بێت چی دەرمانە؟ گوتیان توێڵکی گوێزێ،  چوم گوێزێکی خڕم لەسەر شانی کەڵەبابی بەست، بەیانی کە سەیرم کرد گوێز لە سەرشانی کەڵەبابی شین ببۆوە، حەفتا لەخی دەرکردبوو، هەر لەخەی گوێزوەشێنێکی لەسەر بوو دەیان وەشاند، کاتێک کەگوێز وەشێنەکە هاتنەوە خوار سەیری گوێزەکەم کرد، دوو گوێزی پێوەمابوون، سندەگڵێکم تێگرتن گوێزەکە دەگەڵ سندەگڵەکە هاتنە خوار لەناولکی گوێزەکەدا مانەوە، سەرکەوتم دوو گوێزەکان بێنمەوە خوار، سەیرم کرد،سندەگڵەکە ببوو بەدەشتێک ئەوسەری دیار نەبوو، بەدەشتایەکەدا ڕۆیشتم، شوتی لێکرابوون، شوتیەکم هەڵگرت کێردێکم لەشوتیەکەدا قاشی پکەم کێردم لەناو شوتی دا لێ ونبوو، بەناو قاشی شوتی داڕۆیشتم، گەیشتمە بازاڕی ئاسنگەران کێردێ من بەدەست ئاسنگەرێکی وەبوو، نۆ پاچی لێ ساز کردبوون ئێستا کەمی نەهێنابوو،
مامۆستا گوتی ئەو گەزە خامە بۆئێوە نابێت خودا حافیزتان بێت بۆ مەندیلەم دەوێت.

بەڕەحمەت بێت ئەو چیرۆکەشم لە ئەمەرە ڕەشی بیستووە
لە کۆڕی زایەڵە وەرگیراوە

@mzravilka