🔻 الحارس السوداني وسارق الطليان 🔻


يروي قصة اليوم حارس سوداني يشتغل في أحد المخيمات وفي داخل المخيم شبك الغنم ..
‏يقول كل ليلة يهجمون علي ثلاث أشخاص واحد يجي وأنا نايم ويوقف على راسي
‏بهالسلا!ح !!
‏والثاني والثالث عند شبك الطليان واحد يناول والثاني يثبتهن في حوض الوانيت وياخذون لهم حول اثنين ثلاث !!

‏ومن اليوم الثاني يجي الكفيل وأقوله ياعم أمس طبوا علينا حرامية وأخذوا من الطلي إلي بالشبك ولاقدرت أسوي شيء مسلحـ_ين ، قال أجل ينخصم من راتبك ، ياعم ياعم أبد أنا جايب حارس وفعلاً هذه وظيفتي حارس

‏والمفترض إني أحرس الحلال بس الآن مر شهر على هالوضع ، وكل مرة ينقص من راتبي مبلغ ، خصوصًا إن الطلي الواحد يجي له بـ 1400-1500 زي كذا وزود ..

‏قعد الحارس يفكر يبي مخرج "وش الدبرة وش العلم " مو معقول كل مرة ينخصم من راتبي بسبب هالحرامية ، وهم كل أسبوع طابين علي!!
‏يقول اجتمعت أنا وأصحابي من الحراس إلي في الشبوك الثانية

‏وكلنا نفس الشيء متضررين بخصم رواتبنا بسبب هالسروقين كل يوم يطبون على واحد منا ويسحبون لهم طلي أو اثنين وإلا ثلاث ويهجون ..!!
‏يقول قاعدين نخطط وش الحل وإلا تجيني فكرة وأقول اسمعوا ..

‏هالحرامي مو أذكى مننا ولا أقوى ترى قوته بالسلا!ح إلي معه ، وإلا حتى خطته فاشلة له شهر نفس السالفة يجي وقت نومنا ويحط البندق على روسنا والثانيين أخوياه يجمعون وبس يقضون ينحاشون !!

‏لذلك أول ما أحد فينا يلمح نور سيارة غريبة مقبلة عليه يدق على الثاني والثاني يدق على الثالث والرابع وهكذا ، إلى أن ينتشر العلم عند الكل ممتاز !!
‏كل واحد يجيه اتصال ينطلق مباشرة لشبك خويه ونجتمع كلنا ونفزع له ..
‏اتفقنا ، أي اتفقنا 🤝🏼

‏يجي اليوم التالي وهم بالعادة ينامون بسرير خارجي عشان يحرسون الشبك وكل واحد فيهم معه سلا!حه إلي هو سلا!ح أبيض ، يقول إلا وأنا نايم في نور بعيني وسيارة مقبلة علي ومستحيل الكفيل يجي هالوقت ، وأخذ جوالي من تحت المخدة وأدق على أقرب واحد وأبلغه ،

‏وهو دق على الكل وأقل من دقائق إلا هم محضرين ..
‏طبعًا الأول كالعادة حاط المسد،س على راسي وأنا المكان عندي مظلم بس في نور خفيف يادوب يبين وأشوف رفيقي على أطراف رجلينه جاي من وراه وأنا أحاول ألهيه وأشغله وأطلع صوتي عشان مايسمع صوت رجلينه ،"

‏ياعم الله يخليك أنا زول مسكين مابعمل شيء ياعمي لاتموت،ني " وهو يهاوشني ومنشغل بأخوياه ومبتلش فيني !!

‏ويوم صار خويي قرب 5 أمتار منه ويطب عليه ويحاول يحط السك،ين برقبته وأنا أسحب السلاح والبقية انحاشوا قبل يمسكونهم أخوياي وتنافرت الطليان من الحوض ، ..

‏ونمسكه ونربطه ويقول خويي هذا والله إني أعرفه من الديرة إلي جنبنا ، كل كم يوم أروح البقالة وهو فيه ويناظرني ووجهه ودر مو مريح وأثره هو السروق !!
‏طيب الآن وش نسوي وش الدبرة ، قالوا مالنا إلا نشيله لبيت المحافظ وهو يعلمنا وش نسوي

‏يقول ونمشي وحنا شايلينه على يدينا إلى ماوصلنا بيت المحافظ الساعة 1 بالليل ، وندق الباب ويطلع ولده ، وش هذا ومن هذا وش فيكم شايلينه كذا هو حي وإلا ميىت ؟؟ ونقوله وين الوالد ! قال نايم ، قلنا له صحه قال نايم ، ياولد صحيه هذا شغله هو يساعدنا قال ابشروا وراح ، شوي إلا هو جاي ويقلطنا

‏وش السالفة وش العلم ؟؟ ونعلمه السالفة كلها .. وهو شاف وجه الوليد وعرفه وقال هذا أبوه فلان الفلاني شايب من خيرة الناس ماتفوته ركعة بالمسجد إلا هو مصليها ، وسمعته طيبه بين الناس ..

‏يقول حنا قلنا له نبي الحل وشورك لأنك أبخص عنا بس حنا نبي رواتبنا إلي ما اندفعت ونبي تفكنا من شره هو وأخوياه ، قال لهم المحافظ شوري ازهم على أبوه يجي ودام أنه صغير ما نبي نخرب مستقبله بس نبيه ياخذ درس ويتأدب ، ومنها ما عاد يتعرض لكم مرة ثانية قالوا أجل شورك بعد هداية الله ..

‏دخل علينا رجال محترم وشايب ووجه منور وانصدم يوم شاف ولده وعلمه المحافظ بالسالفة إلا ويقول له سود الله وجهك غربلت هالناس جايين يترزقون وأنت وأخوياك هذه سواياكم !!
‏ويلف عليهم ويقول سامحوني يالربع وامسحوها فيها يكفي إنكم ماخربتوا سمعتي وسمعته وابشروا بحقكم وبالعوض ..

‏قلنا له نبي رواتبنا إلي انخصمت بسبب الطليان إلي سرقها هو وأخوياه ونبيهم يفكونا شرهم ماعاد يتعرضون لنا ..
‏قال بس !! أبشروا وعلى هالخشم وبزيد لكم بعد فوق رواتبكم وأبيكم تسامحوني ..
‏والحمدلله الشايب رجع لنا فلوسنا والولد وأخوياه ماعاد شفناهم من ذاك اليوم ..

‏العبر المستفادة من القصة :
‏•العفو عند المقدرة.
‏•لاتعتدي على حقوق العباد.
‏•مراعاة حق العامل بمايقتضيه الشرع .
‏•الكثرة تغلب الشجاعة .
‏•الظالم والسارق والجائر ستدور عليه الدائرة ويكشف أمام الجميع .

┊┊⇣✧
┊ ⇣✦
⇣ ✧
📚●| https://t.me/k_iss
••┈┈┈❦┈┈┈••