إستشارة طبية

صدك لو جذب الكلينس المرطب مو زين لو زين؟
الكلينس المرطب صار جزء من حياتنا سواء عدنا اطفال او ما عدنا اطفال
صار ملازم لحقائب النساء
صار مهم لتغيير الحفاظ
صار مهم بعد العشاء و بعد الغداء
🔷️ هو شنو هذا الكلينس المرطب ؟
عبارة عن محارم من القطن الناعم اللمبلل بالماء و العطور و الكحول و المواد الحافظة و يعود تاريخ صناعتها الى عام ١٩٥٦ حيث تم انتاج اول محارم معطرة من قبل شركة Nice-Pac الأمريكية و لم تلاقي هذا الرواج الكبير حتى عام ١٩٩٠ حيث قامت شركة Kimberly-Clark الأمريكية المتخصصة بصناعة حفاضات الأطفال بإضافة علبة محارم لكل عبوة حفاضات فلاقى إستخدامها رواجاً كبيراً
🔷️ هل فعلا هي خطره لو امينه على الاطفال؟
حقيقةً بحثت كثيراً من المراجع للوصول الى كتابة هذه المقالة و سأذكر لكم أهم الملاحظات و التوصيات فيما يخص المحارم المعطرة :-
١- تحوي المحارم المعطرة على المواد الحافظة مثل مادة Methylisothiazolinon و هي مادة تسبب تفاعلات تحسسية و اكزيما للوجه و منطقة الحفاض خصوصاً لكون الجلد رقيق و حساس فيهما .
٢- تحوي المحارم المعطرة على الكحول الذي يسبب جفاف جلد الطفل لكون الطبقة الدهنية التي تفرز و تغطي الجلد رقيقة و هشه مما يسبب زوالها بسهولة و بالتالي تحسس الجلد بسهولة لأي عامل مخرش .
٣- تحوي بعض أنواع المحارم المعطرة على مادة Phenoxyethanol و هي مادة حافظة سامة للكبد و الدم و قد أوعزت هيئة الدواء و الغذاء الأمريكية FDA على أن لا تتجاوز نسبتها ٠.٤ ٪ لخطورتها .
٤- قامت شركات راقية مثل شركة بايولاين بإنتاج أنواع من المحارم لا تحوي على الكحول و المواد الحافظة و مكتوب عليها تستخدم منذ الأيام الأولى
مما سبق توصي الأكاديمية الأمريكية لطب الأطفال بما يلي :-
١- عدم إستخدام المحارم المعطرة للأطفال قبل الشهر الأول من العمر إطلاقاً .
٢- يفضّل إستخدام المحارم العادية و الماء الفاتر لمسح الوجه و منطقة الحفاض .
٣- قراءة مكونات المحارم المعطرة جيداً قبل شرائها و الإبتعاد عن الأنواع الحاوية على الكحول و المواد الحافظة .
٤- عدم تعريض العلبة للشمس خوفاً من حدوث أي تفاعلات كيميائية قد تؤذي الطفل بعد إستخدامها .
٥. هذه هي بايولاين الخاليه من الكحول و من مثلها

منقول من صفحة pediatrics skin care ع الفيسبوك

الحمد لله الجو للان لطيف و امراض الشتاء الفايروسيه لاعبه بينا طوبه من الانفلونزا لالتهاب القصيبات للاسهال الشتوي للكورونا للدزنتري
نراجع كم شغله خاف مقصرين بيها و ما مسويها
💖 السعال و الرشح ( النشله ) مرض فايروسي خفيف يطول ١٤ يوم اهم شي بيه تنظيف الانف و ترطيب جو الغرفه باستخدام المبخره و وضع الماء فقط فيها و شويه عسل اذا بدا السعال و عمر الطفل اكثر من سنه
المبخره غير مفيده للاطفال اللي عدهم تحسس قصبات
💖 اذا استمر الرشح مستمرا اكثر من ١٤ يوم مستمرا مو يقطع يوم واحد لا مستمرا يوميا اكثر من ١٤ يوم و عمر الطفل اكثر من سنتين نراجع طبيب و راح يكتب بخاخات انفيه جدا تقلل الرشح لان هذه حساسيه انف
💖 جماعة ضيق النفس و تحسس القصبات و الربو فحان الان الوقت لتغيير العلاجات من الشرابات و الابر الى البخاخات اليدويه او اجهزه التبخير ( النبيولازر ) بعد مراجعه طبيبك و الاستعلام منه عن الافضل لك او لطفلك ( جماعه يتعود عليه شكرا لمجهودكم تكفينا خرافاتكم )
💖 شرابات السعال اللي بيها عسل هي الافضل و هي الامن اذا طفلك ما عنده تحسس
💖 شراب الالتهابات ما يفيد للنشله و لا راح يفيد و الافضل ما تنطيه انت الا بوصفه طبيب
💖 النشله او اي سعال عند طفلك بدت اليوم لا تودي طفلك للمدرسه بهذا اليوم
💖 اي سعال مرافق لحراره شديده او ضيق نفس او ازرقاق او صوت صفير او عدم القدره على الكلام للمستشفى الان و من دون انتظار
💖 ماكو اي فايده من شراء البخاخ او جهاز التبخير المنزلي و انت تدخن
شنو الفايده الجهاز يفتح القصبات و انت تسدهن
و انت كذلك عزيزتي باستخدامك للبودره
💖 اذا طفلك عنده تحسس ابتعدي عن الفرو و الصوف و الياقات اللي بيها فراء
💖 استمروا بالتباعد اذا تكدرون بالأخص اذا طفلك عنده ربو قصبي او عندك طفل اقل من ٣ اشهر عمره
💖 الاطفال اللي ياخذون البروبايوتك تكون عدهم الأمراض التنفسيه اخف فإذا امكانيتك زينه اشتري لطفلك بروبايوتك زين و خليه عليه وقائيا الشتاء كله بس تأكد انه امين للاستخدام المطول
💖 ادعم فيتامين دي اما بالشمس او قطرات فيتامين دي

د. سيف سمير البياتي اخصائي طب الاطفال

شنو يريد منك طفلك؟
1. شوفني احسن مما تعلمني : شوفني شنو الصح و اني اسويه
مو تشرب بيبسي و تكولي ممنوع
مو تدخن و تكولي لا تدخن
مو تكذب كدامه و تكوله لا تكذب
2. بينلي حبك !
الحضنه و القبله ما راح تاخذ منك وقت بس فهمني انه انت تحبني
3. عاقبني بلطف
بعدني دماغي بتطور و ما افهم الامور جيدا
4. دائما حسسني بالامان
دائما خليني اعرف انه انت موجود لاجلي و اني اهم من كل مهم
5. احجي ويايه مو تحجي عليه
6. اسمعني
7. تقبلني مثل ما انا لا تقارني باي احد مهما يكن
8. خليني العب لان احب العب
9. ثق بي بخياراتي بحياتي
10. شجعني قدر الامكان احب المدح
11. انطيني اكل صحي ما اريد اكل سكريات و حلويات


د. سيف سمير البياتي اخصائي طب الاطفال

نسمع و نقرأ و الاطباء ينصحون
لا شاشه قبل ال ١٨ شهر
لا تلفون او آيباد او تلفزيون او اي شي قبل ١٨ شهر
طيب ليش؟
ليش ممنوع ؟
زين اني ابني ما ياكل الا كدام التلفزيون
قابل يموت من الجوع احسن لو يشوف تلفزيون او موبايل احسن؟
خليني احجيلك عن دماغ الطفل
دماغ الطفل لا يكتمل إلا بعمر سنتين
يعني اول سنتين مهم جدا للتطور العقلي و الذهني
ما يخالف نحجي بالدراسات شنو تكول؟
تكول انه مشاهده التلفزيون قبل ١٨ شهر تؤثر على تطور لغه الطفل و قراءته في المستقبل و الذاكره قصيره المدى
و حتى تؤثر على الانتباه و تؤدي إلى مشاكل في النوم
.
.
حتى اقربها الكم الطفل يتعلم من منو الحجي و حركات الشفه و حركات اليد للتعبير ؟
من امه و ابوه و المحيطين
انت تجي تنطيه مجموعه الوان و صخب و بدون اي مشاعر انسانيه و تعرضها كدامه و تخيل صدمه الدماغ
.
.
مجرد وجود التلفزيون في مكان لعب الطفل راح يقلل التواصل
احجيلكم هاي الدراسه
من الاب او الام موجود مع الطفل راح يحجي مع الطفل معدل ٩٦٠ كلمه بالساعه
بس من يكون اكو تلفزيون مفتوح راح تقل الكلمات إلى ٧٧٠ كلمه بالساعه
و هسه شون راح يتعلم الكلام بهذا العدد الاقل؟
طبعا هاي الدراسه كانت تحجي على التلفزيون فكيف الحال هسه
و كل ام و اب داخلين بتلفوناتهم و اصلا ما يتكلمون مع الطفل ؟
و تكول ابني ما يحجي ؟
.
.
دراسه أخرى اجريت على الأطفال اللي يشوفون تلفزيون بعمر اقل من ٤ سنين
انه من اختبروهم بعمر ٤ سنين
انه كلما يشوفون تلفزيون أكثر
كلما الكلمات اللي يحجوها اقل !!!
.
.
التفاعل الاجتماعي و العاطفي
وجدوا انه يقل مع وجود اب او ام مع جهاز لوحي و بهذا منين يتعلم يعبر عن نفسه ؟
.
.
السمنه
ببساطه دراسه ممتعه تكول كلما يزداد معدل مشاهده الأطفال اللي عمرهم من سنه إلى ٣ سنين للشاشات تزداد سمنتهم
و السبب معروف بسبب قله الحركه
.
.
مشاكل النوم و بالأخص اذا شافوا تلفزيون العصر و المغرب راح يقل وقت النوم
.
.
زين دكتور مو ابني يبجي من ما انطيه التلفون او من يزعل انطيه التلفون و أسكته شاسوي؟
المعلومه أردها عليك بدراسه تكول انه الأمهات و الآباء اللي يعتمدون هذا الأسلوب اسوء مما لو تركوه وحده يزعل و يرضى لوحده
و ذلك بسبب ان التعرض للتلفزيون بمثل هاي الظروف راح يؤدي إلى اضطرابات سلوكية في المستقبل القريب و نوبات غضب صعبه السيطره
.
.
بالأخير دوختنا دكتور سيف شنو توصياتك؟
لا شاشات قبل ١٨ شهر
و من بعدها من عمر ٢ سنه إلى ٥ سنين
ساعه واحده فقط فقط فقط
شكرا الكم
د. سيف سمير البياتي
اخصائي طب الأطفال

طعام الاطفال للمره الالف
كلاكيت عاشر لقطه
كل الاسئله جوابها بهذا البوست تقريبا
😜 شوكت ابدي اوكل ٤ اشهر لو ٦ اشهر ؟
منظمه الصحه العالميه تكول ٦ اشهر
بس غير منظمات تكول علامات الاستعداد للاكل يكون من عمر ٤ الى ٦ اشهر
بحوث جديده قديمه تسمي فتره من ٤ الى ٦ اشهر فتره ال
Window period
اي فتره الشباك
لذلك من نوكل بيها يقل التحسس الغذائي !
😜 قررت ابدي اوكل شنو اسوي؟
اكو شروط معينه؟
طبعا
1. طفلك ضاعف وزن الولاده
2. طفلك عبر عمره ١٢٠ يوم
3. طفلك مسيطر على راسه
4. من تضعين طفلك على بطنه يرفع راسه و اعلى صدره
5. يستمتع بالنظر للطعام و ما يرفض الملعقه تروح لفمه
🙄 شنو اول وكله انطيها؟
براحتك بس اني افضل الرز و تسويه كمحلول مو مي الرز و انما الرز و كانما محلول بسيط
🙄 ليش مو سيريلاك؟
نريد نبدي صح و ما نعوده على طعم حلو السريلاك ناجله قدر الامكان
🙄 شون ابدي و الكميه ؟
ابدي بكميه صغيره مثل ملعقة طعام او نصفها و رضعيه قبلها و كملي وراها رضاعه
😀 شنو رايك اخليها بالمميه؟
لعد شسوينا؟
الغرض من اكل الطفل هو تعليمه على الاستقلاليه حتى نغادر المميه مبكرا بعمر السنة او قبلها
المميه للحليب فقط
حتى ماء ممنوع ننطي بيها
😀 على شنو اكمل بعدين ؟
يعني خلص الرز شنو ادخل الان؟
براحتك عادي وجبه اثنين من اختيارك
موز تفاح شوفان براحتك
☺ زين انطيني جدول ؟
ماكو شي اسمه جدول انت ابدعي و نوعي قدر الامكان
☺ كل شكد اضيف شي جديد ؟
كل ٣ ايام
☺ اكلات اؤجلها بعد ٦ اشهر ؟
البيض و السمك و اللبن علمود التحسس
و الموز؟ لا ممكن من عمر ٥ اشهر عادي
☺ شنو بعد ممنوع الى عمر سنه ؟
عسل
عصير
ملح
شكر
☺ اكدر اجرب اخليه يوكل نفسه بنفسه ؟
يا ريت حتى يكون طفل مستقل يعرف الجوع و الشبع
🙄 تغييرات متوقعه ؟
1. استهلاكه للحليب يقل
2. اهلا بالامساك
3. لون الخروج و قوامه يتغير
☺ شوكت اوكل الطفل؟
العادات الجيده تبدا مبكرا
وقت غداء او عشاء ثابت
مكان طعام ثابت مثلا كرسي الطعام
☺ البيض اللبن الجبن السمك شوكت؟
البيض و اللبن ٦ اشهر
السمك ٨ اشهر الى سنه
الجبن ٨ اشهر
🙄 العصير؟
سيء و ما انصح بيه و مانعته الجمعية الأمريكيه لطب الاطفال لان ما بيه محتوى غذائي مهم
🙄 و بعد السنه شنو ياكل ؟
حاله حالك اشجعك على انه ياكل اكل بيت بعمر السنه
🙄 ليش تكتب هوايه بوستات عن الاكل ؟
لان تعبني منظر الاطفال الاصفر و شحوبهم بعد عمر السنه بسبب نظريه مغلوطه تكول ان الحليب غذاء كامل
في الحين بعد عمر السنه الحليب فقط مرتين و بالكوب
بسبب نظريه مغلوطه ان العصير زين في حين كل العالم يقلل العصير
بسبب اهمال الاباء و الامهات لتغذيه اولادهم بحيث اصبحنا من اكثر الدول اصابه بفقر الدم و تسوس الاسنان و و و للحديث تتمه
اتمنى هذا البوست يفيدكم
صحتهم اهم من تكاسلنا
د. سيف سمير البياتي اخصائي طب الاطفال

من يصير عندك طفل لاول مره

حتعرفين انتي شكد قويه
عمرك ماتخيلتي ممكن تتحملين الم الولادة
سواء الطلق الطبيعي
او الم جرح القيصيرية

حتعرفين انك انسان عنده طاقة صبر جباره
وانك مصدر لتغذيه انسان ثاني لاحول ولاقوه

التغذيه هايه مو فقط بالمعنى الحرفي كالرضاعه
وانما ايضا تغذيه روحيه بالحب والاحتواء

حتعرفين انك تكدرين تسوين هوايه اشياء عمرك ماتصورتي انك ممكن تسويها
حتشوفين نفسك تعتنين بطفل، وتسوين اكل، وتنظفين، وترتبين ، وتخططين ، وتقرين
وتحضنين
وتطبطبين
وتواسين
وتفكرين لامور بالبعيد
وتباعين للامور بغير منظار

حتصير عندك قوى خارقه
مثلا
استخدام الاقدام لسد الابواب
استخدام اصابع اليد ال5 لحمل الاكواب
اصدار اصوات الوشه لتهدئه الطفل لساعات
كتم رغبتك بالبكاء والصراخ
تتحملين الم انتزاع خصله شعر من رأسك
تسوين كل مهامك حتى وانتي مريضه
تسهرين بشكل يومي ومتواصل وتبقين على مستوى عالي من العطاء
القدره على الاحساس بالخطر قبل وقوعه
الاحساس بحاجات الطفل حتى وانتي نايمه
القدره على استخدام ايد وحده بهواي مهمات خصوصا قبل ما تكتشفين شياله الاطفال

من يكون عندك طفل تحسين كل لحضه هي مهمه وكل ثانيه هي وقت مهم

ايامك ماتكون فارغه
ابدا
ايامك حتكون ممتلئه جدا جدا حد الاختناق 😂
ماحتكون عندك رفاهيه انك تشكين من الفراغ 🤪

من يكون عندك طفل مجرد تباوعين عليه وهو نائم وصحته زينه ومرتاح انتي ترتاحين
من يكون شبعان انتي تشبعين

حتترفعين عن الانانيه
حتكونين شخص بمرتبه عاليه

وبالحقيقه هواي بعد كلام
لكن اذكر واكول
ما يمكن تحصلين هاي الامور اذا ماتنازلتي عن ماسبق

لان الدنيا اخذ وعطاء
ماكو واحد ياخذ كلشي بنفس الوقت

ننطي من صحتنا وعمرنا ووقتنا
حتى الله يوفقنا مع اطفالنا

من يكون عندك طفل
حتكونين ام

ومو كل وحده ولدت
هي
ام ♥️

الله يرزق كل محروم بما يتمنى 💕

د.اسماء

35 طريقه حتى تعززين الحب بينك و بين ابنك !!!
1. دائما اخبريه انه انت راح تحبيه مهما صار و لو شنو صار
دائما كوني انت من أكبر فانزاته.
2. علميه على احترام والده حتى لو كنت منفصله عن والده و حتى لو كنت ما تحبين والده
3. ابدا لا تحرجين طفلك أمام الاخرين و لا تعاقبيه كدام اي احد
4. دائما اسمعيه حتى لو كان ما مهم اللي يحجيه
5. كوني طالبته و تعلمي منه شنو يحب و شنو يكره
6. دعيه يحلم بما سيكون و كيف سيكون
لا تخططين حياته دعيه يحلم
7. الله يخليك خليه يتصرف كولد يعني يقفز و يكسر و يلعب و يضحك و يتطين و يتوسخ
8. ثقي به و بانجازاته
9. يوميه كوليله انت ذكي انت قوي انت لطيف
10. ادعي مواهبه مهما كانت بسيطه
11. احضنيه حتى لو ١٠ مرات بالساعه اي عادي احضنيه
12. صلي لاجله و ادعيله
13. علميه كيف يحب و يكون محبوب
14. كوني بجانبه يوميا
15. اسمعيه من يكول وين وصل بالليكو مثلا او وين وصل من لعب شطرنج او وين وصل بحل الحزوره
16. خلي هو ينظف غرفته بنفسه و هنا اني اكولك زوجته راح تشكرك بالمستقبل
17. العبي وياه مصارعه
18. العبي وياه طاولي او شطرنج او اونو او اي لعبه يحبها
19. علميه كيف يعامل البنات بحب و احترام
20. احجيله عن لطافه و جمال وجهه و كيف ان الخالق احسن صنعه
21. علميه كيف يساعد الاخرين و دائما كوني له مثال
22. ابدا لا تكسري روحه القويه
يحب اللعب بالطين خليه يلعب بالطين
23. دعيه يكون قوي و ما يخاف
24. احبي زوجك اكثر مما تحبين ابنك
25. دعيه يحميك و يخاف عليك
26. دائما خليه يسمع شكد انت مقدره افعاله و حسن تصرفه
27. اعتذري له اذا بدر منك خطأ
راح يتعلم انه من العادي ان يخطأ
28. تحملي الهوسه و الضوضاء اللي يسببها عادي
29. اخبريه دائما قصصا عن والدك او اخوك او زوجك و كيف هم رجال جيدين
30. اضحكي معه او على نكاته
31. دعيه يقع راح يتاذى اي بس راح ينهض و يكمل طريقه
32. شبهيه بابوه اذا اعتبرتي ابوه مثال جيد طبعا
33. خليه يتحمل نتيجه افعاله لا تبالغين بالحمايه
34. اقراءي له كتبا عن الرجال الجيدين
35. لا تبالغين بسقف طموحاتك و تبالغين بالتوقعات فالله وحده يعلم كيف تدار الامور و كيف سيصبح هذا الولد فيما بعد
د. سيف سمير البياتي اخصائي طب الاطفال

ما اريد يوكع شعري من جديد دكتور !!!
دكتور اريد اعيش مثل الناس مابيه شي !!!

تنعاد هاي الجمل عليه بشكل يومي من المرضى واني عاذرهم والله يعينهم ،،،
بس اكوللهم انتو احباب الله ، وانتو باختبار صعب انتو واهاليكم وعوائلكم واحبابكم ،، ميصير تفشلون بهذا الاختبار، تحتاجون الصبر ، تحتاجون تحافظون على تفاؤلكم ، ياما ويا ما احنة نشوف حالات صعبة وبعدين الله يزرع بيهة الشفاء ...

بعدين انت اذا تركت علاجك وين تريد توصل ؟ ترى المرض ما ينتظر وما يرحم وما راح يجاملك ، بالعكس راح ينتشر ويتحرك ويصير اقوى واقوى ،، خليك قوي ، خليك بطل ومحارب حقيقي ، وبالنهاية الله يحب المؤمن القوي ،،

واذكرك بقول الامام علي ع
لاتكثر من الشكوى فيأتيك الهم
ولكن اكثر من الحمد تأتيك السعادة

وصلوا المنشور اكل المرضى
دزولهمياه بالواتس اب او شاركوه


د.فرات يحيى محسن أخصائي الاورام والغدد

حتى تفهم طفلك صح
تخلي نفسك بمكانه بكل مره
شوفولي هالامثله
❤ تريد الطفل لا يتحرك و لا يلعب و لا يكمز و لا يكسر و لا يخرب و لا كلشي يسوي و عفيه ابني بيه فرط حركه
يمه انت بعمره كنت لابسه روب ستن و تحتسين القهوه و تقرأين الجريده
اي طبعا كلنا ضد العبثيه و تكسير الالعاب
بس يعني طفل غير يتحرك ؟
و لما يتجاوز الحدود يتأدب
❤ لو سمحتي لطفلك ياخذ العاب ابن عمته من راح لبيت عمته
شنو راح يصير ؟
و هم اصلا كالولي عادي خل ياخذهن
و قابل هي شنيه
مو هيجي تقاس الامور يا عيوني
السماح للطفل بأخذ ألعاب الأطفال الأخرين عند زيارتهم بدون إذن أو إفسادها وعدم تعليمه إحترام البيوت راح يخليه كلشي يريده ياخذه حلالا أو حراما
❤ طفل مراهق أو قريب المراهقه محد يسمع رأيه و ترديه يطلع مهندس أو قاضي أو طبيب ؟
كيف ذلك و انت حددتي تفكيره
❤ احترامك لجسدك ابا أو اما راح يخلي الطفل يحترم جسده فابدي من عمر سنه و نصف و سنتين ما تبدل أمام طفلك و طفلك ما تغيرله حفاظه او ملابسه الداخليه كدام اخرين من عمر سنتين .
❤ اذا شافك انت ع الموبايل ٢٤ ساعه عادي هو هم راح يباوع موبايل ٢٤ ساعه
اذا انت ما تصلي و تريده يصلي مثلا !
اذا انت تكذب و تريده ما يكذب مثلا !
التربيه بالقدوه احسن و اسلم طرق التربيه
من تشوفين اكو خلل باطفالك راجعي تصرفاتك ممكن منك الخلل
❤ قبل فتره انتشر فيديو لاطفال اثنين واحد يكول لابو الحانوت استاذ و الاخر يكوله يا ...... هذا هذا مو استاذ هذا
زين هو الطفل منين يتعلم الكلام اللطيف و الكلام السيء ؟
صاير عدنا ترند عدم تعليمهم إحترام الكبير والكلام الطيب والإستئذان عند دخول البيت وإلقاء السلام علي الناس
و نكملها بعدم تحذيريهم من الشتائم والألفاظ الخبيثه او البصق علي الناس او قذفهم بالحجاره
❤ الاولاد اللي دخلوا مراهقه و بدوا بالتدخين و النركيله
الولد ما تعلمها وحده
أما تعلمها منك أو من صديق السوء
و خوفك من صديق السوء لا يدليه على درب المخدرات و السرقه
كلها تكدر تعرف منين جتي لو بس تخلي نفسك بمكان طفلك
❤ قله تواصلنا وبه اهلنا و تعريف أولادنا بأقاربهم و متخيلين كل الناس تغار منكم و كل الناس عينهم عليكم
راح ينشأ طفل ما يحترم اي أقارب
❤ كلامك على الناس بصوره سيئه راح ينطبع بمخه ان كل الناس سيئين و انه فقط هو الصح
❤ مبدأ ما اطلعهم اخاف عليهم
أو ما اوديهم مدرسه اخاف عليهم
راح ينتج عنه طفل صعب الاندماج بالمجتمع
المجتمع اللي راح يكون مسؤول عن اطعامه و تكوين شخصيته و تكوين نفسه
❤ مبدأ اخر كاعد يصير ترند و الله ما احاسبه و اني كلشي اسوي و اني انظف غرفته و اني ألم العابه و عادي لا يغسل ايده قبل الطعام و عادي يأكل بغرفته
اشياء و أشياء تعلمه على عدم احترام الروتين و الأدب العام
❤ لما تخلين طفلك يكسر كرسي عام
توقعي جدا بعد كم يوم يكسر كرسي ببيتك
او بالعكس
دوم اكول الأطفال سهلين جدا
بس خلي نفسك بمكانهم
و راح تعرف ليش هيجي يسوون
دمتم بود
د. سيف سمير البياتي اخصائي طب الاطفال

التحضير لاول شتاء لطفلك حتى ما يفوتنا شي و نبدي مبكرا
و يارب شتاء خالي من الامراض التنفسيه و المعويه
.

اول شيء نؤكد عليه هو غسل اليدين
غسل اليدين مو فعاليه صحيه و بس
غسل اليدين يحمي طفلك من الجراثيم بشكل كبير
تكولك ال cdc اللي هي منظمه السيطره على الامراض الامريكيه انه غسل اليدين يحمي ١ من كل ٥ اطفال من الالتهابات التنفسيه !!!!!
اذا طفلك عمره اقل ٦ اشهر ما بيها شي اذا طلبتوا من الخطار يغسلون ايدهم
بس لا تبالغ بالكيمياويات و الصوابين على يد طفلك و بالتالي يصير عنده جفاف بشره
.
.
ثانيا يحتاج اكول شون لو ما يحتاج؟
اكيد الرضاعه الطبيعية
و كل فوائدها و مناعتها و البروتينات المصاحبه الها
.
نكمل الموضوع
ملطف الجو البارد اللي هو ال humidifier
اللي نفسه نستخدمه كمبخره بس بدون عطر مجرد نخلي بيه المي مو اكثر
يقلل جدا من فرصه انتقال العدوى
و هوايه منزل عنه بوستات و هم راح انزل
.
.
حضري المعدات من بخاخات الانف الملحيه
اللي هي بخاخات يتخلى بيها النورمال سلاين اللي هو المحلول الملحي
ممكن موجود جاهز و ممكن تصنعيه بالمنزل
و ممكن تاخذين بطل مغذي مالح و تخليه بالبخاخ و بس
.
.
لقاح الانفلونزا هذا وقته
اذا كدرتي تحصليه لطفلك الاكبر من ٦ اشهر
على الرغم انه ما ينطي وقايه كامله بس يبقى هو وسيله وقايه من الانفلونزا
.
النظافه هي اهم ركن للوقايه و ضروري جدا تغسلين الشراشف و البطانيات و الالعاب كل فتره
.
.
حاولي قدر الامكان الابتعاد عن الازدحام و الناس المرضى
.
.
قلل عدد مرات الاستحمام لصحه جلد الطفل لان الجو راح يكون جاف و بالتالي الغسل راح يجفف الجلد اكثر
.
.
دائما رطب جلد طفلك باستخدام اي مرطب جلد امين و اكو شركات مختصه بهذا الموضوع مال اطفال و كريمات الاطفال
.
من تاخذ طفلك بالجو البارد اخذ كل الاحتياطات و لبسه ملابس مناسبه
هي كقاعده فوق اللي تلبسه بطبقه وحده
و دائما خلي جاكيت احتياط بالسياره
.
.
اذا البيت بارد فاحسن طريقه للتدفئه هي الكماط و بالاخص الكماط الصحي اللي ماله علاقه بالرجلين و بس يربط الايدين
لا تبالغ بالاغطيه و كثرتها
.
.
حافظ و التزم بجدول اللقاحات
.
اكل صحي بعيد عن السكريات
البروبايوتك طريقه للحصول على المناعه بالأخص اطفال الروضات و الحضانات و المدارس ويه الفطور
البروبايوتك يحتاج اسبوعين إلى ٣ يلا نحصل مناعه قويه ابدي هسه لا تتأخرين
فيتامين دي لا تنسوه بالأخص الاطفال اللي عدهم تحسس و اللي ما يتعرضون للشمس
.
اخر شي اذا طفلك عنده تحسس صار الوقت حتى تشتري جهاز بخاخ nebulizer
احسن و اامن من الشرابات و الابر
و لا يسوي ادمان
و لا يسوي مي ع الصدر
و لا هاي الاشاعات مال زمن اجدادنا
احنا وصلنا 2024 و عيب نحجي بمثل هذه الخرافات مال يتعود عليه و ما اعرف ايش
و بس


د. سيف سمير البياتي
اخصائي طب الأطفال

الي ترضع طبيعي يرادلها عيشه ملكية 👑😏

كاعده بسريرها لاشغلة ولا عمله

ترضع وتنام ... من ينام الطفل

ولمن تكعد حتكون ميته جوع ولازم تجيها سفره ملكية 👑😏

ويستلمون الخدم والحشم منها الطفل يبدلوله ويغسلوله ويلعبوه حتى هي تكدر تاكل 😏

وين هاي عدنا ؟ الام تركض منا ومنا حتى اللكمه ماتلحك تحطها بحلكها وتردوها تكعد ترضع !!! طبعا تلجأ للممه لان هالشي شبه مستحيل 🤷🏻

صحيح ما انكر هذا المثال اساسا هو الطبيعي والي جان يصير على مر الاجيال والعصور السابقة

من الام تولد تعيش حياة ملكيه حتى تتفرغ للرضيع والي حولها يسوون كل المهام الاخرى

وحتى الدين الاسلامي من اجى شجع على هذا الشي وكال الام مو شغلتها طبخ ونفخ وحتى الارضاع من حقها تحصل اجر عليه

لتبيان اهميته ولتبان شنو الها وشنو عليها

ناخذ نفس ونرجع للواقع

مثل ما اكو حياة مرفهه وملكيه اكو حياة بسيطه الام تسوي اغلب الاشياء بنفسها واذا هي واعيه حتختار الاهم ثم المهم

يعني طفل رضيع اهم شي يرضع طبيعي

وجود طفل رضيع يعني شويه نتنازل مو الهدوم كلها تنكوي

نفكر بكل حل وبكل خدمه تشيل عن كاهل الام حتى تتفرغ لرضاعة الطفل

ليش؟

لان حليب الام مايتعوض

ولان هاي اهم شي الام تسوي

الاب بنفس الوقت تلكي يشتغل شغلتين و3 حتى يسد الاحتياجات والكماليات

هم الله يعينه وهم نحاول نخفف من الكماليات لان مثل ما الام مو من واجبها تنظف وتطبخ لكن 99.9 من الامهات هي ماخذه هاي المهمه على عاتقها تطوعا وحبا للاسره

الاب كذلك مو من واجبه يجيب فستان جديد لكل مناسبه ولا من واجبه يجيب حلويات وكل مايشتهي اهل البيت ولا احدث موبايل ولا كل فتره سفره

واجبه يسد الأساسيات من ماكل ومشرب ومسكن وكذلك اغلب الرجال ينفقون مايزيد على ذلك تطوعا وحبا للاسره

رباط الموضوع

الاسرة حتى تنجح تحتاج تعاون وتحتاج ننطيها المطلوب بالوقت المطلوب

وقت رضيع... المهمه رقم 1 رضاعة طبيعيه واي شي عداه نخلي على قائمه التعاون وقائمة الانتظار

وكل النساء ملكات حتى لو كانت تشتغل بايد وترضع بايد

مدام ترضع وتنطي من نفسها فهي تغذي طفلها ذهب

وغذاء الذهب للملوك 😍

.

.

.

.

د.اسماء

هوايه اسأله وردتني البارحه بخصوص القمل
شنو هو شلون يعيش ويتكاثر وينتقل وشنو المخاطر الي يسببها واهم شي شلون نقضي عليه

القمل موجود من قبل 120 الف سنه وظهر اول مره بأفريقيا و يشمل اكثر من 3000 نوع والي يهمنا منها هو قمل الشعر
يعيش القمل على فروة الرأس ويظل ينمو ويتكاثر، ويعيش حوالي 40 يوم وتضع الانثى يوميًا بين 5 إلى 10 بيضات ) على الاقل
( اللي تثبت على شعر الرأس وما تروح بالغسيل العادي.
شلون ينتشر؟
قمل الرأس ميطير، بس ينتقل بالتلامس من شعر لشعر،او الملابس وهذا يصير بسهولة لما الأطفال يلعبون سوا، أو يستخدمون نفس الادوات ويجلسون بنفس المكان ،وخصوصا اغطية الرأس، أو حتى من ياخذون سيلفي! وحتى لو كان طفلك يهتم بنظافته، هذا ما يمنع من الإصابة، لأن القمل مرتبط بالاتصال المباشر وما له علاقة مباشره بالنظافة.
لذا مهم نعرف إنو القمل مشكلة طبيعية ممكن تصيب أي طفل، وما تستحي لو صار وياكم.
مليارين انسان انصابوا على الاقل مره وحده بحياتهم وخصوصا بال 70 سنه الاخيره لان زادوا السكان وكثرت المدارس⁶غغ٦

تأثير القمل على الأطفال والعائلة
تخيلوا الطفل كاعظد يحك راسه كل دقيقة، ويبدأ يظهر تقرحات وجروح صغيرة من كثرة الهرش،وعض القمل اله وبالليل يصير مؤلم اكثر لأن القمل ينشط بالليل وممكن جدا ينتقل لاخوانه ولكل افراد الاسره

شنو يسبب القمل؟
القمل يسبب حكة شديدة بسبب تفاعلات تحسسية من لعاب الحشرة لما تمتص الدم ووحده من الشائعات اللي تخص القمل انه يتغذى على الدم الفاسد !
هذه وحده من تعليقات البارحه على البوست اللي يخص القمل و علاجه
و كأنما القمل خوش ولد و كيوت و يسحب الدم
الحقيقه العلميه هي :
يسبب القمل فقر الدم كونه يتغذى على دم الإنسان
هذا ملخص تجربه شملت ٢٧ شخص مصاب بالقمل تمت مقارنتهم مع ٨١ شخص غير مصاب و لكوا انه الدم بهوايه اقل 10.4 مقابل 12.9
لذلك القمل اي يسوي فقر دم !
وعدا انو ممكن يسبب تساقط بالشعر والتهابات بفروة الرأس مو بسهوله تتعالج اذا انترك الموضوع

اما الوقايه وشلون نحمي اطفالنا الغالين
ميصير يستعملون حاجات غيرهم خصوصا اغطية الرأس والمشوطه وابد ميصير ينامون بفراش غيرهم وحاولوا تقللون الذهاب لاماكن اللعب المكتظه بالثلاث شهور القادمه لان بدا موسم انتشار القمل

د. سيف سمير البياتي
اخصائي طب الاطفال

٢٠ شغله لا تسويها بعد الولاده
١. لا تتوقعين ابدا انه الامور راح تمشي مثل ما مخطط لها
ممكن انه ماكو اي قانون طفلك راح يمشي عليه
حاولي انت قدر الامكان
بس النتيجه مو الا تكون مرضيه
و حتى تكون مرضيه لازم تصرين على موقفك
و تذكري اساس التربيه هي الروتين
٢. لا تكثرين الزيارات المنزليه
اعتذري عن الزيارات المنزليه او اقبلي باعداد قليله من المباركين و المهنئين
و السبب واضح للمحافظه على الطفل من الجراثيم
و لاعطائك الوقت الكافي من الراحه
و حتى تتعرفين على طفلك اكثر
٣. لا تنسين انه تاكلين و تشربين
و اكلي اكل متوازن صحي غني بالفواكه
لا تستعجلين بالريجيم
ينزل الوزن ينزل
و الحليب يحتاج الى اكل و شراب جيد
٤. لا تاخذين كل الامور على عاتقك
بالاخص اذا عندك احد يساعدك
حلو هذا التقليد و راقي مال ام اللي والده جديد تهتم بيها
ما بيها شي
اطلبي معونتها
بس لا تاخذين ارائها اذا كانت من الاراء القديمه الباليه مال الثوم و سكر الكلوكوز و الكحله و هاي السوالف
المهم نكمل
٥. لا تخالفين امر طبيبتك النسائيه او طبيبك للاطفال بخصوصك او فيما يخص طفلك
طبيبك ما يريد الا الافضل الكم
٦. لا تغادرين المستشفى مبكرا الا ينسمحلك بالخروج
بعمليات زوجتي اتذكر الا نسال طبيبتها يلا نخرج من المستشفى
و لا مره خالفنا اوامرها
٧. لا تنسين تسالين كل الاسئله
جيكي فيتامين k اخذه طفلك ؟
ابدي فيتامين دي من اول يوم
و طهري الولد باول ايام بعد الولاده
و سوي فحص الغربله
و وديه لطبيب اطفال يفحصه باول ايام
و روحي لقحي الطفل
و غيرها من اجرائات الوقايه
اللي ياما نصحتكم بيها
٨. لا تتحرجين من طلب المساعده
زوجك والدتك اختك
اي احد متوفر
ما بيها مشكله
انت محتاجه الها
٩. لا تنظفين البيت ( 🤣🤣🤣 )
لا تجهدين نفسك
انت بحاجه للراحه
انتظري شويه شويه و تلحكين على بيتك
١٠. لا تغيرين كورسات العلاج اللي كتبته طبيبتك الك
و لا تنسين تاخذين مسكناتك
١١. لا تتمادين بالكمال
ماكو شي كامل
الكمال لله وحده
ما راح يتم كلشي كامل
تمهلي
١٢. لا تكونين غير مستعده
يعني ما معقوله ما عندك محرار او مرهم حفاظات وقائي للطفل
ما معقوله ما عندك كل احتياجات الطفل
كوني مستعده
لا تكونين غير مستعده لتشقق الحلمه اللي يصير بعد ما طفلك يرضع منك
منزل بوست عن هذا الموضوع بالصفحه
١٣. لا تخافين من البجي
عادي جدا انه راح تبجين و تخافين و ترتعبين من المسؤوليه الجديده
عادي جدا يصير عندك بعض الاكتئاب
١٤. لا تسكتين عن حقك بحمايه طفلك
مو تشوفين عمتك مخليه ثوم لطفلك و تسكتين و يصعد ابو صفار و يكتله للطفل
مو تشوفين طفلك رجليه مربطه بالكماط و تكولين اي شكو بيها تعدل رجليه
و هو عامل خطوره للاصابه بخلع المفصل
مو تشوفين الكحله بعينه و تكولين الله حلو ابني
تره و الله ما حلو و تقتل برائته و هذا عدا التسمم بالرصاص اللي يسويه
مو تشوفيهم يعصرون صدره و تسكتين
لان ممكن يؤدي الى خراج و المتضرر انت و طفلك
١٥. لا تهملي نفسك
انت المتعبه بال ٩ اشهر اللي مضت
ارتاحي قدر الامكان
من يتوفر وقت
الطفل السعيد هو اللي امه سعيده
١٦. لا تهملي طفلك
ما عليك بكلام فلانه و علانه من تكولك لا تشيلين طفلك يتعود
و خلي يتعود
الطفل يحتاج للحمل و الحب مثل ما يحتاج حليب امه
١٧. لا تنسين الصور
الكثير الكثير الكثير الكثير من الصور للقطات لا تنسى
١٨. لا تشككين ابدا بقابليتك كام لطفلك
تحملتي اللي تحملتي علمود طفلك
و انت الام المثاليه راح تكونين
الامهات يعرفون اللي يسووه باغلب الحالات
١٩. لا تنسين هذا البوست و خزنيه يمك و اقريه كلما ضجتي
٢٠. لا تنسين هذه الصفحه
اقريها يوميا
اعرف صارلها 8 سنوات تقريبا
و طرحت بيها الكثير من المواضيع
بس صدكيني يوميه الاف المرات يجيني اشعار على اول بوست نزلته بالصفحه
يعني امهات تقرا و تقرا و تقرا
ابدا ماكو شي اسمه متاخره
و هذه الصفحه تختصرلك الكثير من امور التربيه
جهدت أكتبها من خبره 20 سنه من قراءه و دراسه طب الاطفال
د. سيف سمير البياتي
اخصائي طب الأطفال

ما بقى شي للدوام
و حتى لا تكولون فاتنا الموضوع
حبيت انزللكم من هسه حتى نتحضر
من اليوم
المهم هي خطوات التحضير للمدرسه و النوم هو اهمها
اولا ابدي من اليوم نوميهم من وكت يعني اذا ما نايمين إلى الآن فالوقت جدا متاخر
و باجر نوميهم بأقل بنص ساعه
و بعده بأقل و اقل
يعني اليوم بال ١٢ ينام
باجر بال ١١ و نص
بعده بال ١١
و هكذا
الى ان تحصلين وقت كافي للنوم كان يكون بال ٩ او بال ١٠ مساءا كل يوم هو موعد النوم
٢. نهايه الاسبوع الجاي اللي هي الخميس و الجمعه استمري بالروتين نفسه لا تقللين و لا تسامحين استمري حتى يتعودون
٣. لا تنسين روتين روتين روتين
اغلقي التلفزيون و الايبادات من العصر
ماكو تلفزيون مفتوح او حتى صوت مزعج قبل النوم بساعتين
٤. قطعه بسكت بالشوفان و حليب او موز قبل النوم تضمن نومه هانئه و طويله
٥. اكيد يتعلمون الأطفال منكم فلا تنسون تنامون انتوا مبكرا كذلك
٦. لا تنسين كلما نام طفلك أكثر كلما نموه و صحته و استيعابه يزيد أكثر
7. حتى يصعد البروبايوتك للحد الوقائي ابدي اسبوعين قبل المدارس يعني من هسه
و لا تنسون المنشنات للامهات اللي عدهم اطفال بالمدارس
و بدايه سنه دراسيه سعيده عليكم
و قبل لا انسى
ابدا لا تتململون كدام اطفالكم حول المدرسه خلوهم يحبوها حتى يرتاحون و يبدعون بالدراسه
الله يوفقكم
و يوفق اولادكم
د. سيف سمير البياتي
اخصائي طب الأطفال

التهاب الجلد التأتبي
سامعين عنه؟
اغلب الاطفال من الولادة والى عمر السنة وممكن تستمر لمدة اكثر
نلاحظ بشرتهم يصير بيها احمرار وتتقشر خاصة منطقة الوجه والرقبة
وببعض الاحيان يصاحبها حكة مزعجة والم 😢

هذه الحالة هي التهاب الجلد التأتبي (atopia) وهي نوع من انواع الاكزيما

اذا ردنا نعالج الحالة او نمنع حدوثها لازم الماميات يتبعون
ببعض الخطوات:

👶🏻لتسبحين الطفل يوميا
👶🏻استخدام ملابس قطنية
👶🏻تقليم الاظافر حتى نمنع احتكاك الجلد الملتهب باظافره وتتفاقم الحالة
👶🏻استخدام غسولات ومرطبات تكون مكوناتها طبيعية وغنية بزيوت النباتات الطبيعية حتى تحافظ على رطوبة الجلد وتمنع الجفاف
👶🏻استخدام روتين خاص من شامبو وسائل استحمام ومرطب يحتوي على مواد ملطفة ومهدئة للحكة والاحمرارات حتى يخفي احساس الالم والازعاج للطفل
👶🏻استخدام مرطبات للجلد تكون مغذية وتزيد من سماكة الجلد وتقضي على الخشونة على الاقل مرتين يوميا

منقول من صفحة pediatric skin care ع الفيسبوك