شرايك نلتقي؟
و ندفن الثار الراح
وجرحَك فوگ جرحي بچفَك تشده
وتاخذني بلهفتك وارجع اتلگاك
واطيحنلَك عِشِگ وبحضنَك تسِده
تخجل وأبتِسم واتلَمسَك وأبچيك
وتِّدنه إعله صدري وراسك تلِبده
شرايك نِنطي فُرصة ننام مِشتاگين ؟
وباب الرَجعة كافي تحاوِل تسِده
ليش تظَل وحيد وآنه اظَل مِحتار ؟
تنازَل مره چفَك حاوِل تمِده !
ليش تريد اعيش لخاطرَك مَتروك ؟
وزارِعلَك وِفة وماتِرجع تحِصده
مَدري الخَلَل بِية وصِرِت مامَرغوب ؟
مَدري الوفه الزايد خير وتبَدَه ؟
مَدري النَاس ظلَت تِعشَگ النِيشان؟
تِندَل الجَرح ماتقبل تضَمده
گتلَك هذا گلبي مفَصَل ومَوهُوب!
واستَنگه اليخدمَك واترِك الخُرده!
خِذت مني اليجرحَك عفِت بيه انسان
أبو الوَگفات لو واگفلَك تعِبده !
مِثل حَسرة طفل وتناوشاه الخوف
وابو جَوه التراب ومحَد يلِمده
هيچ انتَ صرت كِلما اجيك تخاف
وأمد چفي الك بَس ترجع ترِدَه
ظَل لاتِعتقدني
ولاتعوف المات
وخَلْ گلبك نَشِط ويدردم بوحدَّه .