خطة ال ٣٠ يوم في رمضان ان شاء الله

١- الـ ٥ صلاوات في المسجد للشباب والـ ٥ صلاوات في وقتهم بدون تأخير للبنات

٢- السُنن الراتبه ( عندك ١٢ ركعه لازم تداوم عليهم يومياً ، ٢ قبل الفجر ، ٤ ركعات اتنين وتسلم واتنين وتسلم قبل الظهر و ٢ بعده ، ٢ بعد المغرب ، ٢ بعد العشاء )

٣- صلاة الضحي ( بتبدأ من بعد شروق الشمس بـ ربع ساعه ... لحد قبل أذان الظهر بـ ربع ساعه ، أقلّها ركعتين لحد ٨ ركعات ، اتنين وتسلم وهكذا ، وإنت وهمّتك ،ثوابها يكتب في ميزان حسناتك ٣٦٠ صدقة )

٤- أذكار الصباح والمساء ( أذكار الصباح بعد الفجر ، وأذكار المساء بعد العصر )
أذكارك بعد الصلاة تزيدك قربًا من الله فلا تغفل عنها.

٥- صلاة التراويح ،للشباب في المسجد مع الإمام واختار إمام يكون صوته حلو علشان تحسّ بالصلاه ، للبنات لو هتصليها في بيتك ده الأفضل ولو هتنزلي المسجد يبقى بكامل حجابك

٦- الصدقه ( يوميا ولو بمبلغ بسيط ولو ربنا موسّعها عليك تصدّق اكتر وهيجيلك الأضعاف إن شاء الله ، وافتكر في النهايه ان انت احوج للصدقه وأجرها من الفقير )

٧ـ قراءة القرآن

- لأصحاب الهمم العاليه مش أقل من ٥ ختمات في الشهر بواقع ٥ أجزاء يومياً ، يعني هتختم كل ٦ أيام مره

- لأصحاب الهمم المتوسطه مش أقل ٣ ختمات في الشهر ، بواقع ٣ أجزاء يوميا ، يعني هتختم كل ١٠ أيام مره

للمبتدئين وأصحاب المشاغل ، مش أقل من ختمه في الشهر ، بواقع جزء كل يوم فقط ما يعادل نصف ساعه او اقل

٨- الدعاء ( عندك ٣ أوقات مفيش فيهم كلام )

- الساعه قبل الفطار
- الساعه اللي قبل الفجر
- اخر ساعه بعد العصر من كل جمعه

٩- ركعتين في جوف الليل ( عارف إنك صليت التراويح ، بس ده ميمنعش انك تصلي ركعتين خفاف في الثلث الاخير من الليل لان الدعوات في الوقت ده مستجابة )

١٠- آيه الكرسى بعد كل صلاة
ورد عن النبيّ - صلّى الله عليه وسلّم - أنّه:(مَن قرأَ آيةَ الكرسيِّ دبُرَ كلِّ صلاةٍ مَكْتوبةٍ، لم يمنَعهُ مِن دخولِ الجنَّةِ،
إلَّا الموتُ).
١٠ خطوات لو داومت عليهم خلال الـ ٣٠ يوم هيكون أحسن رمضان عيشته في حياتك وهتخرج من رمضان إنسان تاني كأنك لسه مولود ، مين عارف مش جايز رمضان السنه دي هو نقطة انطلاقك اللي كنت مستنّيها من زمان
إن لم يكن رمضان بداية جديدة، فمتى ستبدأ ، وإن لم يغفر لك في رمضان فمتى يغفر لك اغتنم رمضان كأنه الأخير، فالأعمار بيد الله والفرص لا تعود
غفر الله لنا ولكم، وتقبل أعمالنا خالصة لوجهه الكريم
نسأل الله أن يتقبل منا ومنكم، وأن يكتب لنا ولكم أجر هذا الشهر المبارك.