بجاه الحسين الخضيب ... سجل اسمي يا حبيب
_________
بحق حبيبك يبن ظاهر والخيم
بحق ابو فاضل وجوده والعلم
للشهيد حسين سجلنه خدم
بلچي اله يمك نصيب ... سجل اسمي يا حبيب
_________
خولك حيدر بهاي المنزلة
بالسجل تكتب الزاير كربله
اترحب بزواره وتنادي هلا
ابكبر سنك والمشيب ... سجل اسمي يا حبيب
_________
يالعشت مرتين من حب الحسين
يالمتت مرتين للغالي الحنين
اسمع الاهات منا والانين
بين رادود وخطيب ... سجل اسمي يا حبيب
_________
انتم الاصحاب وازلام الوفه
موكب الخدام باكتارك لفه
يدور الاحسان ويدور الشفه
انته للعله طبيب ... سجل اسمي يا حبيب
_________
يالگلت افدي الحسين بهالعمر
لوشهادة تنول ولو تلكه النصر
عاجد الشيبات فوگ وتفتخر
طاهر من امك حليب ... سجل اسمي يا حبيب
_________
سجل اسماء الخدم ابن النبي
عربي لو اعجمي لو اجنبي
بجاه ذيچ الراحت بدرب السبي
والخدر منها سليب ... سجل اسمي يا حبيب
_________
الف هنياله التسجل بالسجل
واسمه يقراه الحسين ويبتهل
لطمي وشعري وعزائي ينقبل
وفاطمة تشبعني طيب ... سجل اسمي يا حبيب
_________
خادم ابن مظاهر
مجيد عبد الرضا القريشي
نسالكم الدعاء