🌟 لذَّة ومُتعة وخشوع الصلاة في كلمتين هما :
▫ " المناجاة و القرب " نفهم معناهم الحلقة القادمة ان شاء الله..

🌟 لذَّة ومُتعة وخشوع الصلاة في كلمتين هما : ▫ " المناجاة و القرب "

📌المناجاة هي كلمة السر في الصلاة .. وأساس أي لقاء هو المناجاة ... والصلاة أصلاً كلها عبارة عن مناجاة .. بداية من دعاء الاستفتاح لحد السجود والتسليم ..

👌 فاستشعر إنك بتكلم ربنا ، وإن ربنا بيخاطبك .. لأن ده هيحرّك الانفاعلات في قلبك ، غير لما يكون الخطاب من جانب واحد .. وده واضح جداً في الحديث القدسي اللي ربنا سبحانه وتعالى قال فيه: (قـَسَمتُ الصلاة بيني وبين عبدي نِصفين ) ..

✨ وكل ما تناجي أكتر ، كل ما تحس وتستمتع أكتر .. فحاول تطوّل المناجاة والدعاء على قد ما تقدر .. وبالذَّات في السجود .. زي النبي صلى الله عليه وسلم ما قال: (فأكثروا من الدعاء فيه) ..

📌 أما القُــرب فإنت هتلاقيه وتحسّ به أوي أوي في السجـــــود ..كما قال تعالى ✅وَاسْجُدْ وَاقْتَرِب✅ .. وكما قال النبي صلى الله عليه وسلم : (أقرب ما يكون العبد من ربه وهو ساجد) ..

🌟 اسجد وتصوّر كأنك ساجد تحت عرش الرحمن .. واستشعر وقتها إن القرب في السجود هو ثمرة الركعة .. هو الجائزة الختامية ..
👌 السجود هو آخر حاجة بتعملها في الركعة .. يعني التكبير والفاتحة والركوع والقيام فيهم تمجيد وتعظيم وحمد لله ، وكل ده مقدمة علشان تقرب أكتر من الملك وتطلب كل اللي إنت عايزه في السجود ..

👌 أهم نقطة عملية واقعية على الإطلاق في موضوع الاستمتاع بالصلاة هي إنك تستعد للصلاة من قبل الأذان ..

🌟 يعني حاول تظبط 5 منبهات في الموبايل على قبل معاد كل صلاة بربع ساعة أو 10 دقايق ، أو الأسهل إنك تستخدم أي تطبيق على الموبايل زي صلاتي – My Prayer أو Athanotify ، أو My Prayers أو المؤذن ، أو غيره من البرامج اللي بتذكّرك قبل معاد الصلاة بفترة ..
👌 برنامج المؤذن https://play.google.com/store/apps/details?id=com.parfield.prayers.lite

🌟 ده غير إن التطبيقات دي فيها خاصية بتخلِّي الموبايل صامت أثناء كل صلاة ، علشان ميكونش سبب في ضياع خشوعك وخشوع بقية المصلِّين في المسجد !

🌷 وأول ما تسمع المنبّه ، استحضر معنى "لبّيك اللهم لبّيك"
يآآآآآآآآآآآه 😍 .. مين فينا مش نفسه يردّد الدعاء ده فى الحرم كل سنة بس مش بيكون له نصيب ؟؟ أهو لك نصيب تقولها ولو بقلبك كل ما تسمع آذان الصلاة بينادى عليك ..
فتقوم وتسيب كل اللي في إيديك وتقول "لبّيك اللهم لبّيك" ..
"لبّيك" يعني جايلك يارب بقلبي روحي وعقلي وكل كياني ..

🌟 وتروح تتوضا أو تجدّد وضوءك ، وتلبس من أحسن لبس عندك ، وتحط عطر ، وتتهيأ زي ما اتفقنا قبل كده ..

✅ وبالنسبة للبنات ، هتتوضي وتلبسي إسدال فضفاض ، وتكوني مستعدة على سجادة الصلاة ، في مكان هادي مناسب في البيت بعيد عن المُلهيات زي التلفزيون والأطفال والحاجات اللي ممكن تشتّت تركيزك ..

👌 وبعدها تستحضر النيّة وتنزل للمسجد اللي بتستريح فيه ، وتدخل تصلِّي ركعتين خفيفتين ، وتقعد في الصف الأول على يمين الإمام ، وتذكر ربنا لحد الأذان ، وبعدين تردّد الأذان ، وتقول دعاء ما بعده ، وبعدين تصلّي السُّنة ، ولما تخلَّص تفضل تدعي ما بين الأذان والاقامة ، وبعدها تصلّي الفرض ، وتقول أذكار ما بعد الصلاة ..

✅ويبقى إنت كده فزت بغنيمة كبرى متتفوتش في كل صلاة ..كل الفضل ده ، ومعاه كمان حديث النبي صلى الله عليه وسلم :
(إنْ العبد إذا جلَس ينتظر الصلاة ، صَلَّتْ عليه الملائكة ، وصلاتهم عليه : اللهم اغفرْ له ، اللهم ارحمْه ) رواه البخاري..


🌟 جرّب كده ، هتلاقي موضوع الاستعداد للصلاة اللي اتكمنا فيه ف الحلقات السابقة هيفرق معاك وهيساعدك على الخشوع بشكل لا تتخيله ..
👌 وأيضاً من الحاجات اللي هتخلِّيك تصلِّي بشكل مختلف وتخشع في صلاتك وتحس بها ، التنويع في أذكار الصلاة ، وسور القرآن اللي بتقرأها ..

🌟 لأن بدون التنويع إنت أصبحت عبارة عن آلة مُبرمجة إنها تقول كلام معين وتعمل حركات معينة ثابتة !!

✅ فأصبحت حتى لو إنت سرحان ودماغك في حتة تانية بتلاقيك بتقول الفاتحة وبعدها "قل هو الله أحد" وتركع وتسجد عادي جداً مع إن دماغك في حتة تانية خالص !!
📌ولو حد سألك بعد الصلاة إنت قرأت بسورة إيه ممكن تكون مش عارف!! وده لأنك اتعودت خلاص على كده وبقيت بتردد كلام وتعمل حركات بشكل تلقائي ، لا إراديًا !!

👌 التنويع في الأذكار هيخلِّيك مركِّز وإنت بتقول كل ذكر ،وهتحاول تفهم اللي بتقوله وتتدبَّر معناه وتخشع ..
👈نوَّع من أول أذكار الاستفتاح وصيّغ الاستعاذة وأذكار الركوع والرفع من الركوع لحد أذكار ما قبل التسليم ..
👈وكل الأذكار دي هتلاقيها موجودة في كتاب حصن المسلم أو مُختصر النصيحة أو ابحث عنها على النت وهتلاقيها بسهولة جداً ، وكل يوم حاول تحفظ ذكر جديد منها وتقوله في صلاتك لحد ما تحفظها كلها..