رضوان الله فيضاني

د دلوې شپږ ويشتمه ٢٦ هغه تاريخي او مبارکه ورځ ده چې په دې ورځ باندې د روسانو لويه فرعوني امپراطوري له خاورو سره خاورې شوه.

دا ورځ د نيږدې يو نيم ميليون شهيدانو، د يو میليون زخمیانو، د نيږدې شپږ ميليونه هېوادوالو
د هجرتونو په بدل کې ګټل شوې او اخيستل شوې قېمتي او زرينه ورځ ده.

دا ورځ د افغانستان د مؤمن او غیور ملت لپاره يوه ویاړمنه او تاريخي ورځ ده، ټول مېړني ملت ته دې ډېره ډېره مبارک وي.

ليکوال : م رضوان الله فيضاني

د یرموک درې زخميان صحابه کرام

حبیب بن ثابت (رضی الله عنه) وايي:
د یرموک په جنګ کې درې صحابه، حارث بن هشام، عکرمه بن ابو جهل او عیاش بن ابی ربیعه "رضی الله تعالی عنهم" له سخت جنګ کولو وروسته زخمیان شول او په ځمکه را پریوتل، هر یوه یې د اوبو غوښتنه کوله، یو صحابي په منډه اوبه ور وړې او لومړی یې حارث بن هشام ته ونیولې، هغه چې عکرمه ته وکتل صحابي ته یې وویل: هغه ته يې ور وړه، هغه په منډه عکرمه ته جام وروړ؛ خو عکرمه چې وکتل حضرت عیاش یې څنګ ته پروت دی او د اوبو جام ته راګوري؛ نو صحابي ته یې وویل: هغه ته یې وروړه، صحابي چې تر څو عیاش ته ورتللو هغه سا ورکړې وه، بیرته چې عکرمه او حارث ته راوګرځيده هغوی هم روحونه سپارلي وو
(رضی الله تعالی عنهم اجمعين).

مأخذ: د ایماني ژوند ځلانده بېلګې.
منقول

رسول الله ﷺ فرمايلي:
فقیران به جنت ته له مالدارانو څخه پنځه سوه کاله مخکې داخلیږي چې دا به په آخرت کې نیمه ورځ وي.
(سنن الترمذي)
ـــــــــــــــــــــــــــــــــــــــــــــــــ
اللَّهُمَّ صَلِّ عَلَى مُحَمَّدٍ، وَعَلَى آلِ مُحَمَّدٍ، كَمَا صَلَّيْتَ عَلَى إِبْرَاهِيمَ وَعَلَى آلِ إِبْرَاهِيمَ، إِنَّكَ حَمِيدٌ مَجِيدٌ.

١- همېشه دي ورځ په لمانځه او سهارنیو اذکارو سره پیلوه.

۲- لمونځ، تلاوت او اذکار ډېر کوه، ځکه دا دې سینې ته روښاني بښي.

۳- همېشه لمونځ کوه، ځکه هغه ستا سره قبر ته تلونکی دی.

۴- دعاء ډېره کوه، هیڅکله یې مه پرېږده، ځکه همدا د نجات رسۍ ده.

۵- تل خوشبینه اوسه، که څه هم د طوفان په غېږه کې یې.

۶- ګوتې دې په تسبو سره ښکلې کړه (تسبیحات) وایه.

۷- کله چې غمونه او پرېشانۍ در باندې چاپېره شي، نو (لا إله إلا الله) ډېره ډېره وایه.

۸- صدقه کوه، ځکه صدقه تر ټولو ښه کار دی او تر نورو ښه صدقه، ښه او نېکه خبره کول دي.

۹- اوږدې سجدې کوه، ځکه اوږدې او له وېرې ډکې سجدې، بهتره دي له دنګو ماڼیو څخه.

۱۰- تر خبرو کولو مخکې فکر کوه، ځکه ځیني کليمې وژونکې وي.

۱۱- د مظلومانو دعاوې خپلې کړه او له حاله یې ځان خبر کړه.

۱۲- د مجلې او کتاب ویلو نه مخکي، د قران کریم تلاوت وکړه.

۱۳- د خپلې کورنۍ د استقامت یو لامل اوسه.

۱۴- خپل نفس ښو کولو ته وهڅوه، ځکه نفس خو بدۍ ته هڅونکی دی.

۱۵- د خپلو والدینو رضاء تر هر څه مخکې خپله کړه.

۱۶- خپلې جامې فقیرانو ته ورکړه، ځکه ستا زړې هغو ته نوې دي.

۱۷- هېڅکله مه غصه کېږه، ځکه د دنیا ژوند تر هغه څه چې ته یې فکر کوې، لنډ دی.

۱۸- له تا سره همېشه د ځواکمنو، ځواکمن او د غنیانو، غني؛ الله تعالی مل دی، هیڅ وېره مکوه.

۱۹- هېڅکله د ګناه کولو لپاره چا ته دروازه مه پرانیزه.

۲۰- لمونځ تر هغه ټولو بهتر دی، چي له تا سره د ستونزو او مصیبتونو په وخت کې مرسته کوي.

۲۱- الله تعالی ته ځان نیږدې کړه، ځکه د ټولو مشکلاتو سبب، له الله تعالی څخه په لیري والي کې دی.

۲۲- همېشه په یاد ولره، چي ټولې خبرې دې ملائکې له ځان سره لیکي.

۲۳- کله چې دې له چا څخه خپل غیبت واورېده، نو هغه ته ووایه ” له خدایه ووېرېږه”.

۲۴- د الله تعالی او د نبي کریم ﷺ مینه اختیار کړه.

۲۵- دومره استغفار وایه، چې شیطان له ډېره غمه وچوي.
ـــــــــــــــــــــــــــــــــــــــــــــــــ

اللَّهُمَّ صَلِّ عَلَى مُحَمَّدٍ، وَعَلَى آلِ مُحَمَّدٍ، كَمَا صَلَّيْتَ عَلَى إِبْرَاهِيمَ وَعَلَى آلِ إِبْرَاهِيمَ، إِنَّكَ حَمِيدٌ مَجِيدٌ.

زرين باب شوې فلسطينه

زخمي شولې، شهيد شولې، کباب شوې فلسطينه
په ډېر غټ امتحان کې ته کامياب شوې فلسطينه

د عصر لوی فرعون دې په ګونډو کړ مبارک شه
سرلوړی شوې، د فتحو سپين کتاب شوې فلسطينه

په ننګ، غیرت، مېړانه او همت دې آفرين شه
کفري وحشي بندونو ته سېلاب شوې فلسطينه

سپرلی د شهادت درباندې تېر شو بختوره
ته څومره لوی اعزاز ته انتخاب شوې فلسطينه

مونږ لرې يو کومک ته درتلای نه شو ملامت يو
پوښتنې زمونږ سختې د حساب شوې فلسطينه

په نره، په يواځې، په ميدان وجنګېدلې
د وخت په نمروديانو لوی عذاب شوې فلسطينه

دي ډنډ د (فيضاني) سترګو کې بيا د خوښۍ اوښکې
نن بيا د تاريخونو زرين باب شوې فلسطينه