انه الكاظم المسموم تدروني
غريب وعالجسر مطروح خلوني
***
ايدي امكيده والكيد بجدامي
ومن سجن السجن كضيتها ايامي
الفرح ما مر عليه حته بحلامي
بدمع ومتون يا شيعه تلكوني
**
جوه الكاع سجني وكلش اظلم جان
وصلت المرحله ما اسمع الاذان
اريد اخذ نفس ما يقبل السجان
اموت واخلص امن الدنيه خلوني
**
انه الكاظم وضاع الهوه عليه
ولهسه اسياطهم الهن اثر بيه
ياربي الفرج كمت ادعي يوميه
بيوم الجمعه اريدنهم يشيعوني
*
من اسجد جنت معروفه سجداتي
وابد ما تنمسح من خدي دمعاتي
جذب ماكو بشر يحمل معاناتي
كظمت الغيض والكاظم يسموني
**




يا شيعه المصايب غيرت شكلي
الي مكتوب اموت بعيد عن اهلي
كلها تصيح يمته نشوفك اتكلي
يتامه وعالجسر ضلو يتانوني
****
من طبع اليروح بعيد ما يرجع
غريب وجبدي والله امن السم اتكطع
شفت روح السجن وي روحي اجت تطلع
وصحت اشلون بس اربعه ايشيلوني
*
انه الكاظم وذاك الالم عشته
وظلم هارون يا شيعه تحملته
عيني مساهره والنوم ما شفته
وبقعر السجون اسنين عافوني
****
تمت
تحسين الخفاجي




@HxzEU1

#قناه_نشر_القصائد_المنبريه