قصيدة مولاي الحسين ص


محبوب ماخذ روح محبوب
بس اخذ روحة وجسمة متعوب
لكن ارد افهم بعد
امنين اخذ روحة وصعد
محبوب ماخذ روح محبوب



منين اخذت الروح كلي يا اله العالمين
وانه سامع وذرة وذرة كطعو جسم الحسين

راسة بي كسر _ وحلكه منطبر
وخدة بي حافر عثر من هدت الخيل
نحرة بي رمح _ ثغرة بي جرح
وختنك من الذبح ما ضل بعد حيل

من شفتة نايم وجهه مكلوب
كعدتة لو حسيتة متعوب
بيا صورة لو شفتة كعد
امنين اخذ روحة وصعد
محبوب ماخذ روح محبوب



صعبة من ايدة الاهي روحة تاخذهه ترة
خايف من تريد تطلع ينلجم من خنصرة

شفافة مفطرة _ عيونة غايرة
بين عينة وشفتة مرسومة الخيام
من صدرة يون _ بكلشي منطحن
حافر ورمح وسهم ومدافع ازلام

بس اليعرف حسين يلكاه
محد يميز صدرة مكفاه
وجروحة ما الهن عدد
امنين اخذ روحة وصعد



جسمة من كد ما تكطع واصل لحد الخيم
روحة من يا وصله تطلع حته تشبكهه الحرم

حيرة لو مشن _ المن يشتكن
وهو تارس جسمة طف الغاضرية
ايكعدن يم نحر _ لو ظهر انكسر
بجسمة ما سالم كتر من ال امية

ما ضل مكان لبنتة ترتاح
اخذن مكان رقية الرماح
حرموهه من ذاك المهد
امنين اخذ روحة وصعد
محبوب ماخذ روح محبوب



كلبة متعوب عالابنه وظهرة مكسور عالخوه
حيلة عالقاسم تبدة وابنه بحضانه اذبحوه

ضل لوحدة _ بآلاف العدة
بطيحتة ميدان سوت فوكه الخيل
عشرة كلبتة _ عشرة سحكتة
واستمرن بالسحك حد ما اجه الليل

شمسوية بيك الخيل يحسين
ما ضل ظلع سالم ببو الدين
بهدومة للوادم زهد
امنين اخذ روحة وصعد
محبوب ماخذ روح محبوب




جروحة الف وتسعمية كلهن اينزفن دمه
بيا وسيله روحة تطلع والجرح ما تلجمة

من كلهن يون _ ذبلان الجفن
ونزلن دموعة دمة لطلعت بناتة
ركضن واستحن _ والصعبة اعثرن
عندة اشد من الذبح ركضت خواتة

الركضن بناتة كبال الازلام
كاملهن ورد عالرمل نام
من هل جرح ماكو اشد
امنين اخذ روحة وصعد
محبوب ماخذ روح محبوب


خادم خدام زينب صلوات الله وسلامه عليها
حميد كاظم الشمري