من الجروح والندوب اللي مش بيقدر ينساها الإنسان أبدا ، لما بيحس ان ابوه او أمه بيحبوا حد تاني أكتر منه ، اذا كان بقصد او بدون قصد

وناس كتير مننا كانت بتعاني من ده وهم صغيرين ، فمفيش داعي نكرر ده مع ولادنا .

وده بيحصل لما تفضل تقارن إبنك بحد من اقرانه طول الوقت [حتى لو من باب التشجيع ] ، او لما نعامل ولاد الناس بلطف وتشجيع ونعامل ولادنا معاملة كلها شخط و زعيق و هجوم وانتقاد ومفيش اي حنية او تشجيع او تقبل .

ساعتها ولادنا ممكن يتوهموا اننا بنحب ولاد الناس أكتر منهم [حتى لو ما نقصدش ده ] ، وساعتها بيتزرع جوه الابن او البنت مشاعر الحزن من ابوه او امه ، ومشاعر الحقد والغل والحسد من الحد اللي بنقارنه بيه ، ومقاومته لينا في إصلاح عيوبه بتزيد مش بتقل بسبب المشاعر دي.

ولادنا لازم يكون مستقر جواهم وبشكل واضح فكرة إننا بنحبهم أكتر من أي حد ، حتى لو احنا علانين منهم ، او لو أثناء واحنا بنبدي اعجابنا بحاجة بيعملها ولاد الناس التانيين .
استقرار الفكرة دي جواهم رغم الاحتكاكات اللي بتحصل بينا وبينهم أثناء تقويمهم ، ده بيحميهم من أمراض نفسية كتير وبيخلي مقاومتهم لمحاولات تقويمهم أقل

#دفا_البيوت
#محمد_فتحي