څښتنه ستا قربان سم/ش🍃خَاَلِدْأنَسَ🍃

کم اصله دي مالداره کړه څښتنه ستا قربان سم
بس دغو ته دي‌سپک کړلو!؟ مننه ستا قربان سم

بټوه که دي خالي وه آن په شړکنده باران کي
خپل کورته به در نه کړي څوک بلنه ستا قربان سم

د اوښکو بېوسۍ او بېکسۍ سره زما خدایه!
ساتلې مې ګيلي د زړه دننه ستا قربان سم

ښه! پلار دي د وطن په ننګ شهید دی ماشوم جانه؟
نو خامخا کوم به دي پالنه ستا قربان سم

صرف تاته مې اُمید دی ته مې مه شړه له دره
جانانه زه دي نیسمه لمنه ستا قربان سم

دا ژوند راباندي بوج سي توبه مرګ ته مې زړه وشي
خَاَلِدْأنَسَ ته وکړه نور بخښنه ستا قربان سم