ستا په شونډو کې سندرې شوې خبرې
چې مسکۍ شـوې ملغلرې شـوې خبرې

چې له نازه ډکې سترګې دې کړې برندې
تـاو راتـاو شـوم رانـه لـرې شـوې خبـرې

زمـا د اوښـکو بــدرګـه شوه سـتا خبرې
نـن دې ځـکه بختــورې شـــوې خبــرې

نن مې ستا نامه په شونډو تېریدله
نن مې خوله کې خوندورې شوې خبرې

د بیلتون د قېصو زغم مې زړه کې نشته
درنـه ګـوره زورورې شـوې خبـرې

پرې مقصد ته دې لالیه نه رسیږم
درنه تاندې او ژورې شوې خبرې

چې د ستا د حسن مخکې غږیدلم
رانه بیرته مهاجرې شوې خبرې

چې یې غوږ کیښود کلیم الله ذاکره
پرې ډاډه شه ستا خبرې شوې خبرې