بما إن رمضان جاي وإحنا أصلًا في أيام مفترجة جميلة، فدي ممكن تكون فرصة لينا نستغلها إننا نحسن من نفسنا مش بشكل مؤقت ولكن بشكل دائم،
يعني فرصة ولا أجمل لينا كبنات نضبط حجابنا أكتر، ونعدل في لبسنا،
فرصة عظيمة إننا نبطل نشير أغاني، ولو مبطلين نشير الحمدلله، بس بنسمع فهي فرصة نبطل نسمعها، نبطل نريأكت على فيديو أو أستوري فيه أغاني،
فرصة إننا نصلي النوافل ونثبتها معانا، بحيث نطلع من الأشهر الكريمة بنصلي فروض وسُنن بأمر الله،
فرصة نحط لنفسنا وِرد قرآن بسيط ونتعود عليه وواحدة نزوده ونتعوده عليه ويكون ثابت معانا وجزء من يومنا، وغيره وغيره...
ليه بقول فرصة؟ عشان كلنا دلوقتي بنحاول، محدش هيحس إنه مختلف أو الأنظار عليه تحديدًا، كل اللي حواليك بيغيروا من نفسهم فهتتشجع أكتر وأكتر.
وفرصة عشان إحنا عاوزين الجنة وعاوزين ربنا يرضى علينا ويجعلنا من عباده الصالحين،
فالله يتقبل مننا قليلنا ويثبتنا عليه ويباركلنا فيه، ويجعلنا مِمن لا يضلوا الطريق، ويكتبني ويكتبكم من أهل الجنة يا رب بدون حساب ولا سابقة عذاب.