المكان اللي كل شيء فيه يشبهنا، فوضته، حطّة الحاجات فيه، رِيحته، والطريقة اللي نقدرو نكونوا بيها داخله، "البيت الذي لا يتغير عنوانه" .. العنوان اللي مستحيل نريحوا في طريقنا ليه!

ينقلّب العالم : عَادي
فيه ملاذ آمن نقدرو نولوله.. لما نحتاجوا "نولوا" مِش نكملوا القدام!

دفء معهود.. نقدرو نرقدو مطمنين لأننا فيه أو لكوننا (عنده)
مهما تغيّرت ملامح القصة،
وزاد صُوت العياط.. وأضطر حد مننا يسكر الباب
بالقوية باش يحسس الثاني قداشه (يغلّي)!

المكان اللي فيه دُوشة دماغتنا تسكت،
أروحنا تهدأ وفجأة كل صعب يولي هيّن!

المكان الواسع برغم صُغره، الحنيّن برغم قسوة مُحطيه
اللي حني فيه بوجه واحد.. ومليون فكرة

اللي مهما مشينا عليه.. في النهاية نرجعوله
مِش لأنه مافيش غيره؛
لكن لأنه مهما أجتهد غيره في إنه يحتوينا
حني ما نقدروش نكون آمنين إلا هني .. فيه، معاه، داخله
بَس ..



٢٧.٤.٢٠٢٤
١:٤٨ صَ