درب السبي
وكت السبي ابتده يا عمه
شِمر بينه الحده يا عمه
صوت وي كسر الخواطر
تحجي مبحوحه الحناجر
يا عمه يا عمه
...............
جابو احبال الاعادي للأيادي البيهه جويات المخيم
جتِفو الاطفال كلهه وسال من اجفوفهم فوك الحبل دم
غربه وازغار اشذنبهم والشمر للشام بالهزل تقدم
واليطيح ايرجعونه بالسياط لكل ظهر ناكَه وتألم
بعد ذيج الخيم للعيله
درب السبي ألم للعيله
وينطق احساس المشاعر
تحجي مبحوحه الحناجر
يا عمه يا عمه
...............
بالبجي وكل دمعه توكع ترسم ابوجنات الاطفال المئاسي
صاحو الزينب يعمه هذا حادينه حقود وكَلبه قاسي
من كثر ما لوعوهم رقم ضرب اسياطهم جازي القياسي
ابيا جريمه اطفال ذوله زينب اتحاجي الضربهم خاف ناسي
ذرية النبي لا تكَرب
مو الهم السبي لا تكَرب
وكل طفل بالهم يكابر
تحجي مبحوحه الحناجر
يا عمه يا عمه
...............
واحد ايطيح اعله واحد واليمشيهم زجر طاغي ومعادي
شكد بجو من شتم ابوهم ما تعب من الشتم ذاك المنادي
اتحملو كوه المصايب يحجي كل منهم أنه اتفطر فؤادي
ها يعمه اشباقي نوصل والعذاب من الاعادي اعلينه سادي
درب شام الكفر سابينه
خولا وي زجر سابينه
وين جا سبع الكَناطر
تحجي مبحوحه الحناجر
يا عمه يا عمه
...............
وي رقيه وسكنه طاحو كل طفل مشدود باحبال اليتامه
يلتوي السوط اعله ديهم وزركه من السوط ضلت هالعلامه
بالسلامه الراح يرجع ولا أهل همه ولا رجعه ابسلامه
لوله ما الحسين رحمه جان اصبح بالسبي يوم القيامه
مايبقه عالارض كل ضالم
مصلح اجه الفرض كل ضالم
ياوسف تحت الحوافر
تحجي مبحوحه الحناجر
يا عمه يا عمه
...............
رحله ابد مابيهه راحه مشو بايتام الحسين الهضمة الشام
ابعيد وادروبه غريبه مو ابيومين انتهه لا اكثر ايام
كل طفل مبحوح صوته ايصيح بس محد يسمعه ايعاني الآلام
زينب اتعاين عليهم وكبرت من القهر جن مرت مئة عام
يحاجوهه ابهمس يا حره
صعب حر الشمس يا حره
ماكو رحمه من ايد كافر
تحجي مبحوحه الحناجر
يا عمه يا عمه
الشاعر ياسر العارضي
https://t.me/zaidHassan0
