أحسنت يا عقيل العرد
.................................
خفف لا تدوس براسي حقل احلام
بيدك بندقية وبيدي خمس اقلام

ونيشن باليعجبك والكصص نيشان
واني اكتب بكيفي لكصص ماتنسام

والثامك الاسود شيلة ليش تخاف
انا غير العلم ماعندي اي لثام

حزبك داس فوك حجاية القرأن
وتنظيمك بلع مستقبل الايتام

اني ابن الجنائن والمآذن ذيج
زرعت احلام بيهن ما زرعت الغام

هد جيب الوطن فرهدت حتى النوم
مسؤولك حرامي ولبس ثوب احرام

حزبيتك عمالة وطائفيتك ثوب
حية غدر مايرهم لجلدك خام

الحرية تصنع وطن للشجعان
والحزبية سوت شأن للخدام

ومذمومة الرعية الما تشيل حجار
اذا شافت قصر حامي الشعب من جام

شنو ذنبي نهر بولاية الصبير
گلب واكف شكو، ونية الناس اسهام

نفاق المجتمع للشمس واصل ليش
القتل صاير حلال، الراي صار اجرام

الحقد كلش مقدس والعداوة ايمان
واليعترض خارج ملة الاسلام

الله اليعرفونه يحلل التفجير
وين الله الگبل فوك الرموش ينام

قريش تأسلمت ما ضل وثن ينعاب
وما ظل علكمي ما طاح بيه ايمام

مذكور العراق بسورة الاحزاب
قل انا حكمنا الشعب بالاعدام

دين الخوف شفناه بينا صورة وصوت
صورة (.......) وصوت مال اقسام

هنانه اليعترض مولانا بعثي يصير
ومن الإيمان ان نقتدي (ببعث الشام)

نحجي بمالة الله البعث مو فد نوب
(بعث الشام) اطيب من (بعث صدام)

عصابة مال تحكم بسم رب الناس
ورب الناس مل وعطل الاحكام

عذرا يا محمد بينا ماضل دين
شفنا عمامتك شرعية للحكام

وابشرك بالاطفاء اتعين النمرود
وابراهيم يحركَ بالمصانع گام

وابشرك كلهم يصومون ويصلون
مفطرة حلوكهم و بطونهم صيام

عقيل العرد