فەزڵی وەرزی زستان و چاکەکردن تیایدا
ـ
زستان باخچەی خواناسان ، و مەیدانی خواپەرستانە ، ڕۆژەکەی کورتە ، و شەوەکانی درێژە ، هەل و فرسەتێکی گەورەیە بۆ موسڵمان بۆ خۆ نزیک کردن لە خواى گەورە بەئەنجام دانی نوێژ و ڕۆژوو ، قورئان خوێندن و هەموو جۆرە عیبادەتەکانى تر .
باوەڕداری حەقیقی هەوڵی بەکار هێنانی دەدا لەچاکەدا ، و هەموو دەقە و چرکەکانى ژیانی لەگوێڕایەڵی خودادا بەسەر دەبات ، و هیچ هەلێک لەدەست نادات.
جا زستان دەرگایەکی خێرە لەبەرانبەر موسوڵماندا بۆ بەدەست هێنانی خێر و پاداشتى زۆر .
هەندێ فەرمودە و وتەى هاوەڵان و پێشینانى چاک دەخەینە ڕوو سەبارەت بە زستان :
یەکەم: پێغەمبەرى خوا ﷺ فەرموویەتی (الصوم في الشتاء: الغنيمة الباردة)
واتە : ڕۆژوو لەزستاندا دەسکەوتێکە بە ئاسانی بەدەست دێت .
دووەم : عومەری کوڕی خەتاب رضي الله عنه فەرموویەتی : (الشتاء غنيمة العابدين).
واتە : زستان دەسکەوتی عابیدان و خواپەرستانە .
سێیەم : حەسەنى بەصری رحمه الله فەرمویەتى: باشترین زەمانی باوەڕدار زستانە ، شەوەکەی درێژە بۆ شەو نوێژ کردن ، ڕۆژەکەشی کورتە بۆ ڕۆژوو گرتن .
چوارەم : عوبەیدی کوڕی عومەیر کەیەکێکە لەگەورە تابعیەکان کاتێ زستان بهاتبایە دەیگوت : (يا أهل القرآن، طال ليلكم لقراءتكم فاقرؤوا، وقصر النهار لصيامكم فصوموا). واتە : ئەی ئەهلی قورئان ، شەوەکەتان درێژە بۆ خوێندنی قورئان و دەی قوڕئان بخوێنن ، و ڕۆژیش کورتە بۆ ڕۆژووەکەتان و بەڕۆژوو بن .
پێنجەم : معاذ بن جبل رضي الله عنه لەکاتی سەرەمەرگدا دەگریا ، پێیان گوت : ئایا لەمردن دەترسیت وا دەگریەیی ؟!
گوتی : چۆن نەگریم ، کێ لەمن لەپێش ترە بۆ گریان ، سوێند بەخوا لەترسی مردن ناگریم ، و دونیاکەی ئێوەم خۆش ناوێ ، بەڵکو بۆ بەڕۆژوو بوون لەهاویندا دەگریم ، و شەو نوێژ لەزستاندا .
شەشەم : یەکێک لەو شتانەى کە ئه‌بێته هۆى سڕینه‌وه‌ى تاوانه‌كان ، بەرزبونەوەى پلە لە به‌هه‌شتا بریتی یە لە ده‌ستنوێژ گرتن بە چاکی و تەواوى له كاتى ناڕه‌حه‌تى و ساردیدا .
--------------------------
بۆ زانیارى زیاتر
https://walamakan.com/2571
