شاعرقاري هلالي آغا

رسنیو ته توصیه

کرکه نفرت څه معنا
بد رد غیبت څه معنا
راشئ چي ټوله ورورولي او اتحاد وکړو
غم د هېواد وکړو
غم د هېواد وکړو
غم د هېواد وکړو

درسره مینه لرو مسلمانانو وروڼو
زموږ د سر سترګي یاست ټول زموږ افغانانو وروڼو
بهتان تهمت څه معنا
بد رد غیبت څه معنا
ولي په یو بل ګومانونه د فساد وکړو

د بي بي سي لپاره لږ صداقت په کاردی
د آزادۍ راډیو ته لږ حقیقت په کاردی
داسي بد نیت څه معنا
بد رد غیبت څه معنا
ولي په نه څه باندي ژر ژر انتقاد وکړو

بس کړی نور مه کاروی دا شیطاني رسنۍ
د انټرنیشنال په څېر غیر شرعي رسنۍ
دا شیطانت څه معنا
بد رد غیبت څه معنا
راځئ د دې کار مخنیوي کي کوشش زیاد وکړو

راشئ چي ودرېږو، د خپل اولس په څنګ کي
هري سختۍ ته تیار، د هر یو کس په څنګ کي
دومره غفلت څه معنا
بد رد غیبت څه معنا
راشئ چي خپله په خپل خلګو اعتماد وکړو

بیا به جګړې نه راځي، بیا به جنګونه نه وي
د (هلالي آغا) په، زړه به غمونه نه وي
غم مصیبت څه معنا
بد رد غیبت څه معنا
که موږ په ګډه له وطن سره امداد وکړو

هلالي آغا

ښکلا لري څه ښکلی مو هېواد دی
په دنګو ښائستو زلمو آباد دی
امنیت ته یې په فکر هر الحاد دی
الحمدلله شکر چي آزاد دی

نه جنګ شته نه چاپې شته نه بمونه
په امن دي اوس ټوله اولسونه
خوشحاله دي زموږ ټول افغانان وروڼه
وروري ده اخوت او اتحاد دی

ښکلا لري جنت جنت وطن دی
د ښکلو ښائستو څهرو مسکن دی
هېواد مي دی او زړه مي پرې مئین دی
ورک شوی ترېنه شکر شر فساد دی

ډېوې د خوشحالۍ پکي بلېږي
ګلونه رنګارنګ پکي ځلېږي
د امن سپین بیرغ پکي رپېږي
په خپلو شازلمیو باندي ښاد دی

لرمه خاص له زړه ورسره مینه
رګو کي مي جاري ده لکه وینه
هرخوا او هره سیمه یې حسینه
غزل د (هلالي آغا) کي یاد دی

هلالي آغا

ملګرو زما د چینل لینک په نورو ګروپانو کي هم نشر کړئ. چي نور ملګري هم زموږ د ګوډو او ماتو اشعارو څخه خوند او پند واخلي

درنو مینوالو!

زه په ټوله معنا ستاسو له بې ساري محبت، مینې او درناوي نه د زړه له اخلاصه مننه کوم. ستاسو په دعاؤ او مینه کې یو ځانګړی قوت دی چې ما ته د خدمت لا زیات احساس راکوي. د ازادۍ د شپې په پروګرام کې ستاسو د تود هرکلي څخه معلومه شوه چې زما خدمت ستاسو په زړونو کې ځانګړی ځای لري.

الله تعالی دې ستاسو دا مينه، عزت او محبت همداسې تلپاتې لري او مونږ ته دې توفیق راکړي چې د دیني خدمت لاره کې لا ډېرې هڅې وکړو.

په درناوي:
قاري هلالي آغا

په نازناز اخلي قدم په ورو ورو پر لاره ځي
نن په خیال فاضل اشنا سپین دستار پر سر تړي

زار زار جانان ړنګ بنګ پر لار روان دی
په نازناز اخلي قدم په ورو ورو پر لاره ځي
په بدرګه ورسره وایاست تکبرونه

زار زار یار مي وارث د پیغمبر سو
په نازناز اخلي قدم په ورو ورو پرلاره ځي
په غاړه ورکړی د لونګو امیلونه

زار زار که پرې مرګي را دربي نکړې
په نازناز اخلي قدم په ورو ورو پرلاره ځي
رانه به ورک کړي بغض حسد جهالتونه

زار زار ټوله محفل پرې ښائسته دی
په نازناز اخلي قدم په ورو ورو پرلاره ځي
پر سر یې خوند کوي د سپیني پګړۍ ولونه

زار راز زحمت تکلیف یې پر ځان تېر کی
په نازناز اخلي قدم په ورو ورو پرلاره ځي
له سپېرو خاورو یې راوه ایستل لعلونه

زار زار خدای دي یې زموږ د سر سړي کړي
په نازناز اخلي قدم په ورو ورو پرلاره ځي
چي د اسلام لپاره وکړي خدمتونه

زار زار څومره خوشحاله غوندي ښکاري
په نازناز اخلي قدم په ورو ورو پرلاره ځي
نن پوره کېږي یې د عمر ارمانونه

زار زار لکه سپین لمر داسي ځلېږي
په نازناز اخلي قدم په ورو ورو پرلاره ځي
سپینه څهره کي یې پراته دي لذتونه

زار زار استاده ژر ژر یې رخصت کړه
په نازناز اخلي قدم په ورو ورو پرلاره ځي
په انتظاردي ورته تږي تږي زړونه

زار زار چي هلالي آغا یې ستايي
په نازناز اخلي قدم په ورو ورو پرلاره ځي
الله ورکړي دې سړي ته عزتونه

زموږ پلار او نیکه انګرېز روسان تر باغو واړول
موږ بیا دا غربیان امریکایان تر باغو واړول

هر سړی یې پېژني ثالث او بت شِکن عمر
نر وو په مېړاني یې بوتان تر باغو واړول

یوخوا ملاسنګین فاتح دښمن ته سخت شِکست ورکړ
بل ملادادالله ډېر جاسوسان تر باغو واړول

څنګه چي راغلې وه مغروره ناټوګۍ دلته
هغسي په زوره طالب جان تر باغو واړول

ور یې کړ چلنج د درست جهان منافقینو ته
پیرآغا بېخي ډېر داعشیان تر باغو واړول

تنګ شول دښمنان د هلمندونو له یاغي څپو
ګران حاجي ناصر حاجي منان تر باغو واړول

موږ هم هلالي آغا څه مسته شاعري وکړه
موږ د جمهورریت ډېر شاعران تر باغو واړول

هلالي آغا

ملګرو لینک نشر کړی چي نورو ملګرو ته هم ورسېږي.

تکل مي کړی دی چي تا آبادومه
صبر وکړه سم دي جوړومه صبر وکړه
افغانستانه هر یو زخم دي ګنډمه
صبر وکړه سم دي جوړومه صبر وکړه

میده میده په کار اخته یم
صبر وکړه سم دي جوړومه صبر وکړه
په هر یو ټپ دي زورور ملهم وهمه
صبر وکړه سم دي جوړومه صبر وکړه

ټول سړکونه به دي جوړ کړم
صبر وکړه سم دي جوړومه صبر وکړه
د سالنګ لار لکه ګوتمۍ سورې کومه
صبر وکړه سم دي جوړومه صبر وکړه

دامي له تاسره وعده ده
صبر وکړه سم دي جوړومه صبر وکړه
چي په اوربل کي دي تازه ګلان ایږدمه
صبر وکړه سم دي جوړومه صبر وکړه

ته مي هېواد زه دي خادم یم
صبر وکړه سم دي جوړومه صبر وکړه
ستا هر خدمت ته یم ولاړ ترڅو چي یمه
صبر وکړه سم دي جوړومه صبر وکړه

هم (هلالي آغا) هم زه یم
صبر وکړه سم دي جوړومه صبر وکړه
دی دي دفاع کړي زه دي ستونزې حلومه
صبر وکړه سم دي جوړومه صبر وکړه

هلالي آغا