لكن ينصح البدأ قبل عمر سنتين ونصف لان الدماغ يكون باعلى مستويات المرونة حتى يكدر يميز كميات بشكل لحضي

وإني كشخص بالغ تمنيت لو متعلمها.. يعني كمثال شخصي اني بالمدرسه متفوقه جدا بالرياضيات🧮 وحل المسائل وغيرها .. لكن مافد يوم كان عندي تصور حقيقي عن الارقام ب"كميتها" مثل ماهو معلم الطفل.. 👶

احنا تلعمنا الرمز .. وهملنا كميته الحقيقه..

"نتطرق بالبوستات القادمه عن الحساب الكمي بشكل تفصيلي اكثر أن شاء الله"

🤔زين هل الدين الاسلامي يعارض هذا المنهج ؟ مثل ما قريت بعض الاراء؟

💡حسب علمي البسيط لا اتوقع ذلك ..والدلين يحث على طلب العلم بكل زمان ومكان .... 'اطلب العلم من المهد الى اللحد" ولم اجد نص يدل على كراهيه تعليم الاطفال مبكرا.

🤔زين مو الطفل صغير شي اكيد حينسى كلشي !

الهدف الرئيسي من منهج جلين دومان مو أنه يتعلم أو لا

مو أنه يتذكر أو لا

مو أنه تتفاخر بي يعرف كذا وكذا

الهدف الرئيسي هو تمرين دماغ الطفل في الفتره الذهبيه (من عمر سنه الى ٣ سنوات)

هذا العمر اذا الدماغ ماتدرب الكثير من الوصلات عصبيه ستختفي من غير رجعه .. يعني فعليا تمرين الدماغ يخلي يصير اذكى بكثير من كل النواحي.. سريع البديهة.. سريع الفهم سريع الحفظ سريع التعلم وغيرها من معالم الذكاء

🤔زين يعني هسه لازم نسوي لاطفالنا؟⁦⁉️⁩

ماكو شي اسمه لازم .. اكو شي اسمه رغبه ..

اذا هيج شي يسلط ضغط على الام او الأهل ويخليها متوتره طبعا لتسوي وماله داعي ..

الاساس هو الحفاظ على العلاقه الجميله بين الاهل والطفل.

اني شخصيا بديت أقره واطبق قريبا من باب اللعب فقط.. يعني اعاملها معامله باقي الالعاب الي يلعبها.. مرح وحب وتسليه وليس كما يتصور البعض جلسه تعليم على رحله وصبوره وعوده 😆

🤔زين طريقه تعليم القراءه فاشله لان تخلي يحفظ شكل الكلمه وليس الحروف؟⁦⁉️⁩

غير صحيح .. تعليم القراءه الها اكثر من طريقه منها طريقه الكلمات ومنها طريقه الحروف..

اتذكر حتى بالمدرسه جانت اكو قراءه نوع حروف وقراءه نوع كلمات..

الطريقتين صحيحه. . لان تعليم الكلمات حتخلي يستوعب اكو مقاطع تتشارك .. وبالتالي يبدي يستوعب اكو حروف ومن ثم يفكك الحروف ويتعرف عليها حرف حرف.. الطريقه الثانيه بالعكس .. النتيجه الطريقتين صح

🤔زين انتي جربتي ؟

نعم جربته اول مرة على ابني الاكبر بعمر سنتين واخته بعمر 7 شهور واخته الاخيرة من الولادة والنتائج ما شاء الله مبهره حرفيا والحمد لله والصغيرة طبعا الي بديت من الولادة اذكاهم كلهم رغم بعدها 3 سنوات لكن عقلها يوزن بلد هههههه

وكلما اتماهل بي واشوف نتائج يوميه جديدة على ابني الكبير ارجع اتشجع واكمل مع الصغيره.. وهاي من مزاياه انه من تقدمي وتخلصين يبقى تاثيره مستمر وسنه وره سنة يبين على الطفل اشياء تعلمها وهو صغير ويضيف علها خبرات ومعلومات اخرى يعني ابد ابد مايضيع الجهد الي تسوي ...مصيره يبين ولو بعد حين

ملاحظة : التعليم بشكله التقليدي (مدرسه ورحلات وحاجزين الطفل وامتحانات واحفظ وعيد ويلا ) هاي الي تسبب ضغط وهي اصلا تسبب أن ينخفض عدد الوصلات العصبيه لان تحصر طريقه التفكير ..

أما التعليم بطريقه مرحه دون تلك الضوابط يختلف تماما ولايسلط الضغط على عقل الطفل ولايحصره.. ولا اقصد فقط منهج دومان وانما اي طريقه اخرى مرحه ⁦♥️⁩

وهسه بكروبات الامهات حرفيا حرفيا بدون مبالغة (الامهات تلطم) علمود امتحان صف اول ابتدائي!!!!!

وهذا شي مو منطقي ولا عقلاني نهائيا

وللتوضيح ابني صار صف ثاني ولا فد يوم كعدنا نقره علمود (امتحان) يقرا ويتعلم يوميا وبشكل طبيعي بدون اي اهتمام ب(الامتحان) لان المهم يتعلم مو مهم يدرس للامتحان فقط 😊والحمد لله مستواه فوق الممتاز وهذا من فضل رب العالمين والجهد الي بذلناه اله من جان صغير

وحاليا ماعندي معركة الواجبات ولا الامتحانات لان واثقه من فهمه واستيعابه وما احتاج اي اثبات ثاني 🙏🏻

🤔شنو رئيكم لحد الان بالمقدمه؟ عدكم اسئله ؟ خلوها بالتعليقات ونجاوب عنها قريبا ان شاء الله

وانتي تحبين التعليم الحر لو المنهجي؟

مودتي 🌷

د.اسماء