لليلة الدفن

معصوم ويبجي لمعصوم
بحسين شسوت هالگوم
حاير ابنه شلون ايدفنه
==========
من الغري رد بتعب هذا العليل وحاله
عاف الضعن وي عمته هيه كفيل عياله
لمن وصل للطف وكف نار اشتعل دلاله
شاف الهواشم بس جثث والطف جبيره اهواله

ويدور جثت المذبوح
وين وبالطف مطروح
راد ايحظنه شلون ايدفنه
معصوم ويبجي لمعصوم
=========
لمن وصل يم والده يم الجسد ظل حاير
بصدر الابو شاف الاثر وبصدره ساحك حافر
حد الظَهر جان الاثر الحافر ظلوعه عابر
سحكات بحسين شكثر خيال بي جن عاثر

حاير والسجاد يصيح
ساعه يگوم وساعه يطيح
يسمع ونه. شلون ايدفنه
معصوم ويبجي لمعصوم
==========
حاير يجفنه بيا جفن بالطف وكع كل حيله
صاح اوكع من الالم جيبوا حصيره إنشيله
ايشيل الصدر طاح الظهر ولوالده ايتجيله
وشلون خلاه بالگبر ودم الدمع يبجيله

يابويه ودفنك حسرات
نار بگلبي ولوعات
گلبي وحزنه. شلون ايدفنه
==========
والصعبه خلاه باللحد وبلايا خد توسيده
سبل اديهه بيمنته وبجفوفه عَدّلْ ايده
راس الحسين اعل الرمح والجثه عنه بعيده
وبيا علي ياابا الحسن يحظر اله ويريده

يتوسد صعبه المذبوح
ياروح وظل وبلا روح
يگطع ظنه. شلون ايدفنه
معصوم ويبجي لمعصوم
==========
والاصعب واكثر الم لمن يهيل اترابه
خاف النحر لايلّجم ويزيد جرح صوابه
جمر الگلب ماينطفي نار الگلب لهابه
ينعئ العليل بحسرته كلش ثكيل مصابه

ينعى بصوت المخنوگ
ويون بگلبه المحروگ
تبجي الجنه. شلون ايدفنه
معصوم ويبجي لمعصوم
==========
الشاعر علي النائلي