فاطمه ايموت العشگ من نفترگ
گلبي يدگ اه وحرگ يافاطمه
ــــــــــــــــــــ ــــــــــــــــــــ
ياباب للطف انفتح شيب وجــروح
واليرد روح الموتى ظل ابلايه روح
وخلّه اليسكْت النايح ايون وينــوح
طحتي ياخيمة علي وطشر العيله الزمـــان
والمعين ابلامعيــــن ابلايه حيل الحيل جان
دمّج الماخله لـــــون بعلي ايشوفه بكل مجان

فاطمه حيدر هوه ايدوّر هَوه
وظهره التوه وراح الدوه يافاطمه
ــــــــــــــــــــ ــــــــــــــــــــ
ماي وتبده بصحـــــــــره شيلمهم بعـــد
يام الحسن دمع الحســـــــن ماخله خد
مدفونه روحه ويمشي ظل بس الجسد
حيدر ايسكته ويـــــون وكلشي صار بعينه ليل
گلـــه سولفلـــي اشّفت گله بويه اعذرني حيل
اگبال عيني امي انولت ومنها شفت الدم يسيل

فاطمه شبعت هظم رفس ولطم
ليش انظلم ليش انحرم يافاطمه
ــــــــــــــــــــ ــــــــــــــــــــ
يازهرة وايشمها علي من يختنــــگ
واتبدلت ريحتها من جوري الحــرگ
والشالن حسين وحسن صارن زرگ
سوط واسيوف وعصي والجذع ماكلته نار
ما استأذن بالصــــــــدر من گعد بسمار حار
طاحت ودمـــها اليصب غيّـــــــر الوان النهار

فاطمه بين الغرب طاحت صعب
دمها يصب ذاب الگلب يافاطمه
ــــــــــــــــــــ ــــــــــــــــــــ
وين الجفوف القلعن الباب الثگيـــــــل
عجزن يشيلن فاطمه ام جسم النحيل
حيدر يدوّر تجوه لا لا مستحيــــــــــل
مو علي ابـــلا فاطمه علي صار اسمه اليتيم
يقره (يس) وينـــوح محد ايرحمه الرحيم
جمّع اولاده ويگـــول الدنيا بعد امكم جحيم

فاطمه ناده علي راحو هلي
بعمري شلي محد الي يافاطمه
ــــــــــــــــــــ ــــــــــــــــــــ
ردي اعله بيتج ساعه يم بيت الشموع
صبح ومسه الوَن مستمر بي والدموع
من صدرج اكثر كســــرو بدارج ضلوع
حسين شابگ عالحسن ايگله خويه اتمنه اموت
وزينب بحضن الغريب علي وتبجي ابلايه صوت
مگبره دارج عليــــــــج مظلمه وعمها السكوت

فاطمه فگدج يشِل گلب الطفل
لا مو سهل ما ينحمل يافاطمه
ــــــــــــــــــــ ــــــــــــــــــــ

علي محسن الزيادي