عگب اربعين ايـــــــــام خلصن بالالام
گومولي اصيحن جيت ماواحد الگام
ــــــــــــــــــــ ــــــــــــــــــــ
انا الگضيته افراك عمري وبجي ونوح
وايامي مو ساعات احسبهن اجــروح
الجســــد عنكم راح بس يمكم الروح
مافارگِتكم يوم لو ما هالايتام
ــــــــــــــــــــ ــــــــــــــــــــ
من كثر نار الشـــــــوگ دلالي هايم
كل ديره اطبها تگول وين الهواشم
فوك الفراك ام عون شبعت هضايم
يسمع هلا يم عون دلالي محتام
ــــــــــــــــــــ ــــــــــــــــــــ
مسبيه ميته افراك والنـــاگه تابــــــوت
كربله وكوفه وشــــــام تردوني ماموت
فزّعت صحت الغوث محد سمع صوت
سكتتكم اعله الروح امضه امن الاسهام
ــــــــــــــــــــ ــــــــــــــــــــ
من رحتو ماظل حيل وي الخـــدر راح
يمكم ادعولي المـــوت ياخذني وارتاح
شم ريحتك يحسين گبلي الگلب طاح
سولِف اوياه واجروح شوفه شكثر ضام
ــــــــــــــــــــ ــــــــــــــــــــ
اشبگ اخو رديت مااشبــــــــك اتراب
لو صحت ملگه يريـــــد دلالي يحباب
تتسابگون اركاض ليّه احسب احساب
يهل الشيم جاليش خيبتو الاحلام
ــــــــــــــــــــ ــــــــــــــــــــ
گد ماركضت ابيوم عاشــــــــر بعاشـــــور
اركض گضيت اليــــــــــــوم مابين الاكبور
مامش هله اختي اتريح گلب اخت مكسور
واتجبره واتنسّيه لوعاته بالشام
ــــــــــــــــــــ ــــــــــــــــــــ
كل اخت همها يزول من تنخه اخوها
وزينب اخوتها اهموم شـــــو زودوها
لا كامو امرحبين لا من سبـــــــــــوها
لو بيهم ايفزعون من حرك الاخيام
ــــــــــــــــــــ ــــــــــــــــــــ
ايّسِت والحســــــرات طحنن دليلي
يم گبر اخوي حسين خلصته حيلي
للگومه ماظل حيل وامشي الكفيلي
بادت اعظامي ونار من جدمي للهام
ــــــــــــــــــــ ــــــــــــــــــــ

علي محسن الزيادي