انته الماتحيّر وانه محتارك
واضيعن بالوجوه وارجع اختارك

آنه الدخل بيتك وانغوه من الخير
وتوكحت عينه وعاين لجارك

انه الضاع جدمه وضاگ بيه الكون
غشيم وماعرف ماكو بوسع دارك

اعارك روحي بيك وما يفظ اللوم
حلاة العمر بالحب يخلص امعارك

احذر گلبي حتى من الحچي المملوح
واگله اجمل ابياتك اسمه باشعارك

ما شايف غزل بس مستهله ادموع
هو حسين وي كل ماي يتشارك

تمر اسنين عمري وعيني يم الباب
من فتحتها مرّه ادورلي انظارك

يبرودة گلب واحرورتك بالماي
اليروه وما چويته ماعرف نارك

من شعبان تشرق مارضيت تغيب
وكل عاشور تنزف شي من اسرارك

من يوم الصرت يوميه الك ميلاد
واگف والزمان يگلك امبارك

نفرح بيك لن چن تونه مولودين
من ايدگ گلبنه بلحظة اصيارك

وي كل دمعه تنزل تنولد يحسين
من جفن لجفن نتناقل اخبارك

حبك چان علة اول التكوين
وختام الكون كله ينتظر ثارك