للعسكريين .. للعسكريين
روحي وحياتي .. للعسكريين
@@@
حبي وهيامي لمن تجدد
سافر الى ابلاد ولد المأيد
ابسامره وهناك بضعه لمحمد
گاع او ثراها كحل الموالين
@@@
لمن تجيها ودجله تشوفه
بين البساتين تلعب جروفه

وعند المواقف وگفت ضيوفه
وللمرقد اتروح تمشي المحبين
@@@
تلمع على الناس گبه ابسماها
من نور لنجوم ازيد ضياها
وانادي بالشوگ يا آلِ طه
وعالهادي والآل نصبح مصلين
@@@
ندخل من الباب وانطب لصحون
وللحظره بالشوگ تتجاره لعيون
ذوله البلاهم ماكنه وانكون
وابلاهم انصير لا دنيه لا دين
@@@
بالحظره والناس تمشي للعتاب
تقره الزياره بس توصل الباب
والعنده حاجه ناده يلطياب
جيت ابونيني حاير عَلَي دين
@@@
ياجنة الله سامره چنها
نبض ابشراين ساداتي لنها
حب ابدمانه شنستغني عنها
واحنه بولاهم مشينه لسنين
@@@

نلثم ضريح العطره نشمه
وضمة طفوله لعوده نضمه
بهاذي المكانه اثنين ايمه
واللي تجيهم مگرورة العين
@@@
وتَم الزياره نرجع الى الباب
وانطب بلشواگ للغيبه سرداب
ونبچي ابمراره على الحاضر الغاب
وانادي عجل يا ثار لحسين
@@@
علي احمد الحمود
١١-١٠-٢٠٢٣
العسكريين ع