عباس عباس.. يا زود الهواشم
عباس عباس.. يا نـور العـوالـم
حاشا ما مثلك بشـر
گمر واحلى من الگمر
❤️💛🌿🧡💥🧡🌿💛❤️
١/
من نزل عبـاس عالدنيـه هلالـه
باسته إعلى العيـن أنوار الجلاله
بشـر لو گلنـه بشـر هاي استحاله
مـلك لو گلنه مـلك يزعل جماله

عباس عباس.. يـل نـورك إلهـي
عباس عباس.. يشاغل انتباهي
حبّك ابروحي استقر
گمر واحلى من الگمر
❤️💛🌿🧡💥🧡🌿💛❤️
٢/
عباس يا نـور القداسه الحيدريه
الشمس بيك اتنخّت وصارت زهيه
گمـر لكـن أجمـل من الجنه ضيه
و الثريه ابنظرتك صارت ثريه

عباس عباس.. من ربّـك جلالك
عباس عباس.. شنوصّف جمالك
كلـمـن ايشوفه انبهر
گمر واحلى من الگمر
❤️💛🌿🧡💥🧡🌿💛❤️
٣/
أبو فاضل غيرته امعجبه البرايه
ولا شِـعـر يوصفهـا گـادر لا روايه
عنده ويّه السيف من زغره هوايه
و يوم صار أم البنين انطتّه رايه

عباس عباس.. لحسينك وفائك
عباس عباس.. والزينب فدائك
لاختك ابليل الخطر
گمر واحلى من الگمر
❤️💛🌿🧡💥🧡🌿💛❤️
٤/
حيدره من شـاهـد اچفوفك يكفّال
گلك انـت الآل أمـيّـه اتصـيـر زلــزال
كلشي من عندك يخوّف حتى الخيال
سيـل انت وما توگفك حتى الجبال

عباس عباس.. بيك آنه افتخاري
عباس عباس.. يـا وارث فـقـاري
أنـت لـو جــار الدهـر
گمر واحلى من الگمر
❤️💛🌿🧡💥🧡🌿💛❤️

٥/
نزل ع الماي وفرض فوگه الزعامه
و النهـر منّـه ارتجف من فك لثامـه
علّمـتــه الحرّه زيـنـــب ع الشّهامه
و سوّه بجيوش الكفر يوم القيامه

عباس عباس.. يمـشـرّد أمـيــه
عباس عباس.. يليث الغاضريه
الزمن مثلك ما ظفر
گمر واحلى من الگمر
❤️💛🌿🧡💥🧡🌿💛❤️
٦/
سر فدائك ما حصل بالدنيا مثله
و الوفى لزنودك بهل الليله صلّى
أصبحت طول الدهر للخوّه قبله
ويوم ميلادك ترى الهلهوله تحله

عباس عباس.. ميلادك فخرنـه
عباس عباس.. يا عزنه وگمرنه
اليحب مثلك ما خسر
گمر واحلى من الگمر
❤️💛🌿🧡💥🧡🌿💛❤️

✍🏼علي نوري الحلفي