❤️ قصة حب :

طلعت بالتاكسي و عرفني جنوبية، خبرني انه كان مزوّج بنت شيعية من الجنوب اسمها سميرة..

".. كنا انا وسميرة جيران وصارت الاحداث ببيروت وتهجّرنا، بس الصدف رجعت جمعتنا وتزوجنا..

حبّيتها كتير لسميرة وعشت أحلى أيام عمري معها، ٦ سنين كانت الدنيا كلها ورد بنظري..
عم يحكي هو وعم يضحك وعيونه لحالن بيحكوا..

سألته شو صار بعد هالسنين؟

قال اسباب كتيرة وهي اخدت القرار انه تترك، صرت احكيها كتير وحاول اقنعها وقلها انه بعد فترة رح تندمي.. بس هي ضلت مصرّة..
ومن بعدها كل شخص راح بطريقه..(مع ابتسامة)

- و نِدمِت سميرة؟

- طبعًا و حاولت ترجع تحكيني لنرجع بس ما قبلت، أنا انسان عندي مبادئي وكرامتي..

سكت شوي، بس بعدني بحبها، رغم كل شي

- قلتله ما عندك مشاعر غضب تجاهها؟

- اللي بحب عنجد يا بنتي ما بيحمل بقلبه غضب وخصوصا انه بعرفها انضغط عليها..
بس الحب الأوّل مستحيل ينتسى ..

الله أنعم عليي وتزوجت وجبت اولاد وصار عندي أحفاد،  وبحترم مرتي كتير..

بس بعدني لهلأ ببتسم لما جيب سيرة "سميرة" وبتذكر كل لحظة مرقت بالست سنين…

بيني وبين حالي قلت شو بدك فيي تخبرني هيك خبريات عند الصبح، توجّعلي قلبي.. بس يلا شو بدي اعمل ..

دفعتله وأنا وعم بنزل من السيارة
قال لي شكرًا للطفك والله يبعتلك قد نيتك، مبيّن عليكِ بنت ناس ومحترمة..

يا ريت بقدر شوفها لسميرة واعرفها منيح لخبرها انه بعده بحبها😍😃

طاقة إيجابية عند الصبح بين ازدحام فوضى المدينة..