الملاريا مرض طفيلي بيسببه طفيل من مجموعة Plasmodium group ، عدوتها بتنتقل عبر الباعوض mosquito-borne infectious disease ..

يعني بتسببها طفيليات Parasites فمافي حاجة اسمها الملاريا إتقلبت تايفويد او جاتو ملاريا عشان ما بياڪل او شغال شغل حار ..

وفي تقريباً 5 أنواع مڪتشفة للطفيليات بتاعت الملاريا واشهرها في السودان والأخطر والمرتبط بالموت هو الفالسيبروم P. falciparum ، والانواع الاربعة التانية فيفاڪس "الحبشية" P. vivax واوفيل P. ovale وملاري P. malariae ونوالزي P. knowlesi ..

وما ڪل الباعوض بينقلا ، بتنقلا أنثى الباعوض الإسمها (الأنوفيليس) Anopheles mosquitoes ..

الباعوضة لمن تتغذى على دم زول عندو ملاريا طوالي الطفيل بيمشي يقعد في غدة جوة جسم الباعوضة زي الغدة البتفرذ اللُعاب في البشر ..

وبيقعد الطفيل عايش جوة الباعوضة ومنتظرها تمشي تعضي زول تاني عشان يطلع من لُعاب الباعوضة mosquito's saliva ويدخل مجرى الدم بتاع الزول العضتو الباعوضة ..

وبيڪون الطفيل في المرحلة دي إسمو sporozoites ..

واول ما يدخل الطفيل للجسم بيمشي مع مجرى الدم عشان يقعد في الڪبد hepatocytes ودي المرحلة الأولى للملاريا بيسموها exoerythrocytic phase ، وطبعاً بيتڪاثر جوة خلايا الڪبد hepatocytes وبيعيش أجمل أيام حياتو ويتڪاثر ويظبط أمورو ، وخلال الفترة دي ما بيڪون في أعراض مرضية ..

وممڪن ياخد مابين 8 لي 30 يوم وهو بيتڪاثر جوة الڪبد ، وغالباً في معظم الناس من 10 لي 15 يوم ..

وطبعاً طور sporozoites بعدما يتڪاثر جوة الڪبد بيتحول لي merozoites وبيدمر خلايا الڪبد الإتڪاثر جواها وبيطلع منها للدم ..

ومن هنا بتبدأ الأعراض تظهر والمرحلة التانية للملاريا في الجسم erythrocytic stage وهي مرحلة غزو الطفيل merozoites لڪريات الدم الحمراء ..

وبعد يدخل جوة ڪريات الدم الحمراء بتڪاثر تاني جواها ويبدأ يدمرها وتدميرها بياخد مابين 48 لي 72 ساعة ، وڪل ما يدمر خلية دم حمراء بيمشي عشان يصيب الخلية التانية والتالتة والرابعة والخامسة ...الخ

وهنا المصاب بتجيهو حمى شديدة ..

وخلايا الدم الحمراء الماتت والدمرها الطفيل وإتڪاثر فيها بتمشي طوالي الطوحال spleen عشان تندفن هناك يعني الطوحال زي المقبرة بالضبط ..

وبسبب تراڪم خلايا الدم الحمراء الميتة جوة الطوحال بيحصل فيهو تضخم Splenomegaly ، وبيحصل فقر دم Anemia ودا بيسبب التعب والإرهاق والفتور ..

دا بالمختصر الشديد بدون تفاصيل ..

وطبعاً الأعراض بتبدأ بي الرعشة او الإنتفاضة والحمى والعرق والصداع والغثيان والقيء وآلام في العضلات والبراز بيڪون فيهو دم أحياناً ، وإيرقان وتشنجات واغماءات ، وإرتفاع درجة الحرارة بيڪون معاهو قشعريرة وعرق غزير وصداع ..

وبحسب الأعراض وترڪيز او ڪمية الطفيليات الموجودة في الدم بتنقسم الملاريا لي uncomplicated ملاريا بسيطة غير وخيمة ، وملاريا خطيرة severe ..

وطبعاً شدة الأعراض وفترة الحضانة بتختلف حسب نوع الطفيل المسبب للعدوى ، بس بتشترك ڪلها في إنو سيناريو المرض بيمر بثلاث مراحل بتحصل مابين 6 لي 10 ساعات :

المرحلة الأولى : cold stage وبيشعر المصاب بإنو بردان وبيقعد يرجف حتى لو الواطة مسخنة في عز الصيف ..

المرحلة الثانية : hot stage المصاب بيشعر بحمى وسخانة شديدة بعدما ڪان بردان وبيرجف ..

المرحلة الثالثة : sweating stage وهنا بيبدأ يعرق ڪتير ويقول ليك زي الدفقوا فيني موية ..

وطبعاً البيقولوهو الناس عن إنو فلان طلعت ليهو الملاريا في راسو دا ڪلام صحيح ، والطفيل بيعبر مع الدم وبيوصل المخ وبيسبب ملاريا في المخ بيسموها Cerebral malaria ودي بيحصل فيها هلوسة وتشنجات وفقدان وعي ونوبات من الهضربة ..

وما ننسى إنو لمن الزول يصاب بالملاريا لو إستخدم علاج غلط ، او جرعات غلط ، او اتناول طعام ولا شراب بيفسد الدواء او بيمنع إمتصاصو ممڪن تفضل طفيليات دافنة دقن في الڪبد والدواء ما بيصلها وبعد فترة الأعراض بتبدأ ترجع تاني عشان الطفيليات بتنشط من جديد ..

وعادة ممڪن خلال اسابيع يشعر الزول برجوع الأعراض ومن الصعب تفريق العدوى الجديدة من الطفيليات الڪامنة "الإنتڪاسة" ، اما بعد إسبوعين من تناول العلاج وإختفاء الاعراض خلال فترة تناول الدواء بتعتبر عدوى جديدة ..

ومن الضروري قبل تناول العلاج معرفة نوع الطفيل المسبب للعدوى عشان خطة العلاج ممڪن تتغير مع تغير الطفيل ..

عينة الدم للفحص مفروض تتأخد مرتين في فترة بتتراوح بين 6 لي 12 ساعة للتأڪد من وجود الطفيل في الدم ..

والفحوصات البتتعمل نوعين اما تتشال عينة دم ويصبغوها بصبغة الجيمسا ويفحصوها تحت المجهر BFFM ويفتشوا الطفيل بشوف العين عديل ، بس الفحص دا عيبو بيتأثر بڪفائة وخبرة التقني البيحضر ويجهز ويفحص العينة يعني لو ما خبير او ما مرڪز او ما بفتش برواقة ومستعجل ممڪن يخطئ النظر وما يشوف الطفيل ، بس دا أڪتر فحص مضمون وممتاز