الشاعر حيدر مطر العبادي

صفكه وهلاهل وفرح كل البشر مسروره ..
الليله الامام المنتظر يسطع علينه بنوره ..
هلال الفرح شع وبان ..
بخمسطعش من شعبان ..
الليله الامام المنتظر يسطع علينه بنوره ..
.............................
نحتفل نملي الصواني ياس وبخور و شمع ..
الليله للعتره الشريفه ينولد آخر فرع ..
تضوي دنيانه زهيه نور أبو صالح  يشع ..
يزرع بأيده أبتسامه وعنه يمسح كل دمع ..
عم الفرح أنس وجان ..
بخمسطعش من شعبان ..
بهذا الحفل خل تبتهج وتشارك المعموره ..
الليله الأمام المنتظر يسطع علينه بنوره ..
.............................
كل موالي الليله يشعر ينفتح للجنه باب ..
نودع أيام المواجع والمدامع والعذاب ..
بكل فخر جبريل باسه وخله يم راسه الكتاب ..
القسط والعدل بيده وكل دعائه مستجاب ..
رتّل حروف القرآن ..
بخمسطعش من شعبان ..
نرجس تعاين عالمهد بيه شافت أحلى أسطوره ..
الليله الامام المنتظر يسطع علينه بنوره ..
.............................
أستبشر الكون بحفلنه ورفرف بجنحه الحمام ..
ونزف أيات التهاني للنبي خير الانام ..
المهدي نور الله بجبينه يمحي أيام الظلام ..
الليله لأنوار الهدايه ينولد مسك الختام ..
ب قّرة جبينه الأيمان ..
بخمسطعش من شعبان ..
البلمهد أبن العسكري مولود بأجمل صوره ..
الليله الامام المنتظر يسطع علينه بنوره ..
................................
زينه وأفراح ومشاعل يحتفل هذا الحضور ..
ويفرح بهاي الولاده كلب كل شيعي غيور ..
احنه للأعمه بصيره واجب نوضح الامور ..
االارض يمليهه عدلا باجر بعصر الظهور ..
قسط وعدل بالميزان ..
بخمسطعش من شعبان ..
بماي الذهب خلي الزمن يكتبهه بين سطوره ..
الليله الامام المنتظر يسطع علينه بنوره ..
.................................
الليله بحساسي وشعوري وياه يلتم الشمل ..
بمولد الحجه أمامي تحله صفكات  الحفل ..
باجر بايدك يمهدي كل صعب يصبح سهل ..
بعد جور وظلم تملي هالارض قسط وعدل ..
وتكسر خشم كل طغيان ..
بخمسطعش من شعبان ..
كل الخواطر لو طلع وي طلعته مجبوره ..
الليله الامام المنتظر يسطع علينه بنوره ..
................................
حيدر مطر العبادي

بميلادك يمهدي الشيعه فرحانه
.................................
ليلة نص شهر شعبان محلاهه
نورك يالأمام المهدي ضواهه
بالمولود كل الدنيا تتباهه
الليله الكون كله يفرح ويانه
بميلادك يمهدي الشيعه فرحانه
................................
هوسات وهلاهل نسمع الليله
كل هم وحزن بكلوبنه نشيله
مولود الفرج والناس تدعيله
يا محله حفلنه ويزهي بألوانه
بميلادك يمهدي الشيعه فرحانه
.................................
كل الشيعه هاي الليله مسروره
شعشع بالأكوان المنتظر نوره
للمهدي مهج وأرواح منذوره
الما ننساه أبد معقوله ينسانه
بميلادك يمهدي الشيعه فرحانه
.................................
فدوه أعمارنه للمنتظر فدوه
نتعب بأنتظاره والتعب يسوه
عطشانه الكلوب بشوفتك تروه
وتروه بشوفتك كل عين عطشانه
بميلادك يمهدي الشيعه فرحانه
...................................
مولود القسط والعدل بجفوفه
هنياله اليكحل ناظره يشوفه
يمته يصلي بينه بمسجد الكوفه
يانور الشمس يمضوي دنيانه
بميلادك يمهدي الشيعه فرحانه
..................................
الليله بكل مكان نعلّك الزينه
جكليت الفرح تارس صوانينه
لحيدر والنبي نبعث تهانينه
بنص شعبان مولود الفرح جانه
بميلادك يمهدي الشيعه فرحانه
................................
حيدر مطر العبادي

فرحنه واليحبنه يفرح ويانه ..
وعيون الموالي الليله سهرانه ..
صفكه وزينه وأعياد .. الليله أحله ميلاد
بميلادك يمهدي تضوي دنيانه
.............................
الليله كل موالي يمسح أدموعه
أناشيد الفرح بالحفل مسموعه
واليقره قصيده المهدي موضوعه
ممنوعه الأحزان الليله ممنوعه
ليلة بهجه وأفراح .. ودعنه الحزن راح
يطوي كل موالي صفحة أحزانه
فرحنه واليحبنه يفرح ويانه
..............................
بهاي الليله كل الشيعه تتباهه
ليلة نص شهر شعبان محلاهه
نور المهدي كل الدنيا ضواهه
خل تفرح الزهره ونفرح وياهه
جانت مظلمه الدار .. وهسه تزهي بأنوار
الليله آخر فرع ظل يزهي بأغصانه
فرحنه واليحبنه يفرح ويانه
.......................................
يا قلب المحب يالعايش بروحه
والمجروح أسمك بلسم أجروحه
يبو وجه العذب والضحكه مملوحه
بدر ليلة تمامه ومحد يلوحه
خل نستقبل العيد .. نحط الأيد بالأيد
ياعيد وكبل عيد الفطر جانه
فرحنه واليحبنه يفرح ويانه
.......................................
شحلاته بالمهد والشامه بخدوده
بالكاروك هاي الشمس موجوده
ثغره مبتسم كلش ترف عوده
من زغره بيمينه الرايه مشدوده
صفكه وأحتفالات .. هلاهل تعله الأصوات
اليشاركنه بحفلنه يرتفع شانه
فرحنه واليحبنه يفرح ويانه
....................................
المهدي أتشرف التاريخ بحروفه
مولود القسط والعدل بجفوفه
يالتعشك ضواه النجف والكوفه
باجر حتى الأعمه نورك يشوفه
خل تشوف العيون .. ضواك منور الكون
والتاريخ بسم المهدي عنوانه
فرحنه واليحبنه يفرح ويانه
........................................
حيدر مطر العبادي

ما خضع يوم . رغم دوم . وسط زنزانه
...................................
رض كيده العظام .. عام بأثر عام
مثل الجبل عاش مادنك الهام
رغم بسجن جان .. وتضمه حيطان
الكاظم للأجيال ظل أسمه عنوان
ظل عالي . ميبالي . لوكضه العمر
مايركع . مايجزع . ميمل الصبر
أسد بغداد .والأمجاد . بقت عنوانه
ماخضع يوم . رغم دوم . وسط زنزانه
..................................
ظل صبره مقياس .. لا مايطخ راس
غيره وعزم بيه من عمه عباس
نور الشمس فيض .. من كاظم الغيض
لوغابت أشهور ظل نوره تعويض
يشع نوره . بطاموره . لا ماينحبس
بسجن أظلم . ماينضم . نورج ياشمس
أبن الأبطال . بالأغلال . قهر سجانه
ماخضع يوم . رغم دوم . وسط زنزانه
..................................
خطواته منهاج . وظل خصمه بأحراج
أنواع الأحكام من موسى يحتاج
حكم الملاعين . مكيوده الأيدين
يوميه الغروب يبجي أعله الحسين
يشيل أيده . من قيده . بركان الألم
ميفاوض . ظل رافض . ما كلهم نعم
تخسه السيوف . والصفوف . تهز أيمانه
ماخضع يوم . رغم دوم . وسط زنزانه
.................................
خيط الفجر بان . ياصوت الآذان
ويخلص الليل بس يقره قرآن
تشهدله الأفعال . ثابت ولا مال
سجن أظلم أسنين ماغير الحال
يحب ناسه .وظل راسه . عالي ومرتفع
كل لحظه . كل نبضه . بكلبه تنسمع
ساكن العين . والحسين . سره بشريانه
ماخضع يوم . رغم دوم . وسط زنزانه
....................................
نزلتله الاملاك . وكالتله حياك
خالد تظل دوم ما لحظه ننساك
ياراهب البيت . للعتره وفيت
عمرك والسنين بطاموره كضيت
انهد حيله . بكل ليله . يدعي بالفرج
وبصبره . كل عمره . ثابت عالنهج
جعفري الروح . والجروح . يضمها ألسانه
ماخضع يوم . رغم دوم . وسط زنزانه
.....................................
للذله هيهات . ب سم الغدر مات
أهل النعش وين تتعاله الأصوات
من طلعت الروح . عطر الوفه يفوح
يبجي على تشييع ظل نعشه مطروح
وين أهله . تفزعله . أجنازه أعله الجسر
يشيعونه . يدفنونه . بنعشه ومنتصر
ماكو فزّاع . والوداع . يصير أهنانه
ماخضع يوم . رغم دوم . وسط زنزانه
.......................................
حيدر مطر العبادي

يا أبو الرضا والينخاك لا ما تخيب أظنونه
....................................
ياسيدي ويامولاي انت الطبيب الشافي ..
لو يعتنيلك معلول منك يرد متعافي ..
لزيارتك هذا اليوم أمشي بطريقك حافي ..
بهذا الدرب كلمن مات والله الف خيعونه ..
...................................
بهذا الدرب كلمن مات والله يظل يتباهه ..
بالجنه وي الانصار يم حيدر ويم طاهه ..
لاتعتقد يمولاي هاي الزياره انساهه ..
كلبي بمحبتكم ذاب والعقل جن أجنونه ..
.................................
مشاي أجيتك وأنخاك أنطيني بيدي مرادي ..
من الفتن والأحقاد أحفظ شباب بلادي ..
بسدكم يلوذ المحتار يانسل طاهه الهادي ..
بحبكم يقاضي الحاجات روحي تظل مرهونه ..
................................
صرختنه وبعالي الصوت خل تسمع المعموره ..
واليسد عينه وميشوف مغثوث من هالصوره ..
وأهل المواكب خدام ما قصرّت مأجوره ..
بهذا الطريق أحنه نذوب بزيارتك يدرونه ..
.................................
نلطم وندمي الصدور بالكاظميه الليله ..
نقره الزياره بالباب عالخد دمعنه نسيله ..
بالصحن عدنه تشييع والنعش كلنه نشيله ..
حبكم لغز كل الكون ما كدرو يفسرونه ..
..................................
يالكاظم انه أتعنيت أسجد وابوس أعتابك ..
وأشجم بعيد ومظلوم يتمنه يوصل بابك ..
تطلك العاجر وتجيب لمن تشم ترابك ..
والما يزورك هاليوم تهمل أدموع أعيونه ..
.................................
حيدر مطر العبادي

شلون نور الباري عايش بالظلام  ..
وجمرة السم تسعر بجبد الإمام  ..
بقيد مجتوفه الأدين .. مثل زين العابدين
وجمرة السم تسعر بجبد الإمام  ..
..........................................
موسى بن جعفر أنيس البسمله..
بصبره حيطان السجن تشهد أله..
بدمعه شيباته الكريمة مبلله ..
ونال من الباري أشرف منزله  ..
مرت اللحظات حسبالك شهور  ..
شما طغه الطاغي الزمن لابد يدور..
بدمعه وأهات وأنين  .. مثل زين العابدين
وجمرة السم تسعر بجبد الإمام ..
......................................
من طوامير السجن صوت أرتفع  ..
موسى بن جعفر صبور وماجزع  ..
وأبن شاهك سد أذانه وما سمع  ..
الجبل صح ينثلم بس ما وكع ..
أنت بجيت السلاسل والحديد  ..
والعليل بخطبته بجه يزيد  ..
كالاسد وسط العرين  .. مثل زين العابدين
وجمرة  السم تسعر بجبد الإمام  ..
.....................................
بحفره ظلمه وابد ماشاف الضوه..
ولو بديهم كطعو عليه الهوه ..
بالسجن زهد وعلم عاشن سوه..
وبسموم الطاغي دلاله انجوه..
اتحير السجان من شاف السجين  ..
رغم قيده وهوه ثابت مايلين   ..
وخلص كل عمره حزين  .. مثل زين العابدين
وجمرة السم تسعر بجبد الإمام ..
..........................................
الوجه أصفر من مرارات السموم ..
وجسمه ناحل هدمت حيله الهموم..
ويعثر بقيد السلاسل من يكوم..
وعالسجن طير المنيه ظل يحوم  ..
وبجنح جبريل تصعد للسماء  ..
روح ناموس الفخر باب الرجاء..
شكد قست بيه السنين  .. مثل زين العابدين
وجمرة السم تسعر بجبد الإمام  ..
.....................................
جبده بالسم انطحن طحن الرحه  ..
وينعى مأساة الحسين ومذبحه  ..
وظلت مصلايته والمسبحه  ..
ياهو عالمسموم يقره الفاتحه..
انعادت أيام الطفوف ومن جديد..
بس يزيد تغير بوجه الرشيد  ..
وعاش بين الحاقدين  .. مثل زين العابدين
وجمرة السم تسعر بجبد الإمام  ..
.........................................
ياوهج وسط الحفيره وماطفه..
والحلم عند الإمام أعظم صفه  ..
والله كل معلول يم بابك شفه ..
والحمام يبات بحضانك غفه..
انت علمت السجن ابلغ دروس  ..
كتله لاجل الدين رخصنه النفوس..
وثابت لحد اليقين  .. مثل زين العابدين
وجمرة  السم تسعر بجبد الإمام  ..
.........................................
حيدر مطر العبادي

مشايه .. يبقه شعار بكل سنه نعيده
مشايه .. والكصد ياخذ حاجته بأيده
مشايه  ..  مشايه
.......................................
أعتنيلك حافي والدمعه جريه
بيدي رايه ترفرف بعلو الثريه
أخذ مني هالعهد حد المنيه
كل سنه زيارة رجب بالكاظميه
والرايه .. منشوره سوده والحزن بيهه
والرايه .. للغيمه توصل حيل أعليهه
مشايه .. مشايه
.......................................
برهن بخطواته كل شيعي وموالي
يطوي هذا  الدرب  أيام  و ليالي
واليشوف  الكبه  بأنوارك  تلالي
هذا دنيا وآخره يظل راسه عالي
أهوايه .. أفضالك من الجدم للهامه
أهوايه .. باب الحوائج وأحنه خدامه
مشايه .. مشايه
.....................................
تمشي أملاك السمه وخجلانه منه
كاصده الباب الحوائج ويّ أهلنه
تشتم  بهذا  الدرب  ريحة الجنه
زياره وحده بالعمر  جانت  تمنه
أحجايه .. كلمة وفاء و مانرد  بيهه
أحجايه .. بحضرة أسد بغداد نحجيهه
مشايه  .. مشايه
..................................
كل معانات  الدرب  نشعر قليله
مانوافي صاحب السجده الطويله
مثل غربة  زينب الحره العقيله
نعشه ظل مطروح ما واحد يشيله
تجايه .. محتاج نعشه وتنظر أعيونه
تجايه .. شيعة الكاظم خل يشيلونه
مشايه .. مشايه
...................................
أعلن اليوم المحب صرخة ولاءه
مثل ما عاهد حسين  بكربلاءه
جعفري  تبقه الهويه  وأنتماءه
ويلي عالمسموم ظل عالي نداءه
وفايه .. شما يصعد وينزل نفس بينه
وفايه .. موسى بن جعفر يبقه والينه
مشايه ..  مشايه
................................
بالزياره كل محب يوصف شعوره
لو وصل باب المراد يشوف نوره
الليله كلمن بالصحن سجّل حضوره
بكبره باجر فاطمه تحضر تزوره
الغايه .. باب المراد أنقبل أعتابه
الغايه ..يروح التعب من نوصل البابه
مشايه .. مشايه
.................................
حيدر مطر العبادي

كعديه لوفاة الإمام موسى الكاظم ع
على موسى بن جعفر تربي العيون
شيطلع الشمس من سجن  هارون
ظلمه بلا ضوه أسنين .. جا خيط الفجر وين
شيطلع الشمس من سجن هارون
..................................
مرت اسنين ونناطر     والهموم شكد ثجيله
يطلع ويجبر خواطر     شيعته والهم يزيله
عالسجن تربي النواظر   بحسره والمدمع تسيله
تنتظر كل الرافضه
البالقيد رجله مرضرضه
بالسجن كل عمره كضه
صاحب السجده الطويله
خلّص بالسجن كل عمره ياناس
بس للطاغي أبد مادنك الراس
بين اربع حياطين .. جا خيط الفجر وين
شيطلع الشمس من سجن هارون
......................................
اللا رشيد يريد يفرض    حكمه ويصدّر قراره
الأمام بسجن يبقه         وعنه ممنوعه الزياره
ماجزع موسى بن جعفر   صابر ودمعه يتجاره
بالغيظ ظل يكظم كظم
أنطبع قيده على العظم
لا بد نهايه لهل الظلم
ويطلع الكاظم نهاره
أعله حر من الجمر نتنطر يعود
ال بوكت الشدد نلكاه موجود
وين أبن الميامين .. جا خيط الفجر وين
شيطلع الشمس من سجن هارون
...................................
ماخضع لحظه وتراجع    ثابت ومايحني هامه
ذل غرور الطاغي صبره   ولابس أثياب الكرامه
للأمان تشوف صوره      بنت عش يمه الحمامه
رغم السلاسل مؤلمه
وتتكاطر من أيده دمه
من يذكر أمه فاطمه 
يبجي ويذب العمامه
على تربة صلاته تطيح الدموع
ينعه أمه الزجيه وكسر الضلوع
يجري الدمع صوبين .. جا خيط الفجر وين
شيطلع الشمس من سجن هارون
.....................................
صابت السجان حيره         منالأمام ومن صموده
خطر صار اعله بن شاهك   راهب العتره ووجوده
الطاغي بالسم غدر قرر        الكاظم يموت بقيوده
السم مرد جبده مرد
والكربله وجهه يصد
ذبلان ياغصن الورد
الدنيا كلها بعينه سوده
الطبيب يكول جبد الغالي مسموم
خل أهله  و أعمامه تحضر اليوم
ظل يصفك بالأيدين .. جا خيط الفجر وين
شيطلع الشمس من سجن هارون
..........................................
نام بفراش المنيه         بعد ما أيس طبيبه
محد بليلة وداعه     حاضر وينعه المصيبه
أهل ماعنده وعشيره   جنازته ظلت غريبه
من طلع نعشه من السجن
محد وراه يبجي ويوّن
ترتجف دمعات الحزن
راح والراح أشيجيبه
الكاظم عالجسر ظل نعشه مطروح
حتى  و هو  ميت  يبجي  و ينوح
يصب دمعه عله حسين .. جا خيط الفجر وين
شيطلع الشمس من سجن هارون
............................................
المصيبه
..............
ظل نعش موسى بن جعفر   حاير بجسر الرصافه
يصيح وين أجتاف أهلنه     ومحد يجاوب وسافه
هالغريب ألمن يعالم          صوت عالي بكل صلافه
ظل النعش فوك الجسر
خاطر أمامي منكسر
ميت ولاكن منتصر
وأندفن راهب العتره .. وتزهي بيه الكاظميه
........................................
حيدر مطر العبادي

تسألني أرض الشام .. جا وين الخدام
جا وين الخدام .. تسألني أرض الشام
أتلفت والمدمع جاري .. وين أحبابي ووين أنصاري
تسألني أرض الشام
.....................................
ماجاوبت .. شيحجي الغريب أعله البعد
ماجاوبت .. أعله أحبابه عينه تظل تصد
ماجاوبت .. يم صحني كل أهل الحقد
ماجاوبت ..المنجل أشجابه أعله الورد
ذوله أولاد الليل .. منهم شفت الويل
منهم شفت الويل .. ذوله أولاد الليل
يردون يهدمون أسواري .. وين أحبابي ووين أنصاري
تسألني أرض الشام
......................................
بدمع الألم .. عشت بوضع كلش صعب
بدمع الألم .. مزروعه عيني أعله الدرب
بدمع الألم .. أسمع حجي بديرة غرب
بدمع الألم .. بحيدر علي الشامت يسب
عشت بأصعب حال .. مابين الأنذال
مابين الأنذال .. عشت بأصعب حال
عاجل توصل كل أخباري .. وين أحبابي ووين أنصاري
تسألني أرض الشام
.......................................
صوتي أرتفع .. ما أرجع أركب عالهزل
صوتي أرتفع .. ولا أيدي يخنكها الحبل
صوتي أرتفع .. وما ينرفع سوط النذل
صوتي أرتفع .. ولاحرمه تبجي ولاطفل
ما أصعد عالنوك .. وميفروني بسوك
ميفروني بسوك .. وما أصعد عالنوك
ولا يجويني الرمل الذاري .. وين أحبابي ووين أنصاري
تسألني ارض الشام
.....................................
حرك الخيم .. ظل باقي بأطراف العبي
حرك الخيم .. يرجع يريد الناصبي
حرك الخيم .. ولاجني بت روح النبي
حرك الخيم .. مرتين أبد ما أنسبي
ما أقبل مرتين .. ينحز نحر حسين
ينحز نحر حسين .. ماأقبل مرتين
تاخذ ثار حسين وثاري .. وين أحبابي ووين أنصاري
تسألني أرض الشام
...........................................
يبجي الصحن .. بهاي السنه محد حضر
يبجي الصحن .. يعطش وزواره المطر
يبجي الصحن .. من القهر كلبه أنفطر
يبجي الصحن .. وشباجه يشعر بالخطر
يظل ثوب الكفار .. بس الذل والعار
بس الذل والعار .. يظل ثوب الكفار
عالظالم دوم أدعي الباري .. وين أحبابي ووين أنصاري
تسالني أرض الشام
.......................................
أدري الوضع .. تعبان أشعر بيه وأحس
أدري الوضع .. ليل أظلم بعازت شمس
أدري الوضع .. تتماده بيه أهل الرجس
أدري الوضع .. الوالانه حتمن ينحبس
بالشام المكروه .. تحكم غير وجوه
تحكم غير وجوه .. بالشام المكروه
وين الما كاتب لا قاري .. وين أحبابي ووين أنصاري
تسألني أرض الشام
......................................
حيدر مطر العبادي

تلجم أجروحي الأحلام .. بالغربه جفني مانام
مرتين ماريد أنسبي .. وما عندي كافل بالشام
.........................................
أظل آنه الأبيه وما أدنك راس
برض الشام صبري أتعده كل مقياس
جندوب أحتمل غربه وظلم ياناس
تربي أعيوني هلبت يحضر العباس
يم صحني غربان تحوم .. وين النذل والمسموم
زينب أظل مثل الجبل .. وكل النواصب أقزام
...........................................
شكد حسره وهضيمه من ترد أردود
تسبيني النواصب والحشد موجود
بعد للموت مايرجع حكم نمرود
ماتمحي ذكرنه أهل النوايه السود
شمس الحقيقه لكل جيل .. ما تنحجب بالغربيل
باقي ذكرنه للأبد .. شما تمضي وتمر أعوام
....................................
ما أشرح بعد وأدري الوضع معروف
مثل طير الحمام وطاح بين أسيوف
منظر صحني وحشه وخالي مامألوف
عكب ما جانت الزوار بيه تطوف
يسمعني خل ذاك الصوب .. ما أركب الناكه النوب
لاتنجتف أيدي بحبل .. ولارمل يجويلي أجدام
..........................................
مثل أرض الطفوف وكل زمن عاشور
العدو نفس الوجه رغم الزمان يدور
خل يسمع كلامي الناصبي المغرور
الظلام الدامس أبدن ما يطفي النور
نور الشمس أصله منين .. ماخذ ضواه من حسين
ويتلاله عباس الكمر .. وبعينه وبصدره أسهام
..........................................
المامفهوم أصبح هالوكت مفهوم
يكتب أرحلي كل حاقد ومسموم
عالحيطان أعاين والكلب مهموم
وتسبّني النواصب ياخلك كل يوم
أسمع حجي أشكال ألوان .. وحدي انه وبلا وليان
يأذيني ياناس الحجي .. من اليدّعون الأسلام
......................................
أظل لبوة علي وخليهم يسمعون
كل أهل الكفر كل ظالم و ملعون
ما أقبل يزيد و زمرته يرجعون
لومسني الخطر كل شيعتي يفزعون
من تفزع أزغار أكبار .. شيعة علي حامي الجار
أنسه عذابي وغربتي .. من شيعتي تشد أحزام
.....................................
حيدر مطر العبادي

زينب وياج مننساج نظل وفايه
..............................
يارفعت الراس . خل تشهد الناس
بالموزمه نصير كل أحنه عباس
يازينب الصوت . يظل عالي للموت
لو دربج أخطار نتعنه ونفوت
للجنه . نتعنه . منهاب الخطر
بس نظره .للحضره . لو نوصل وذر
ندوس الأرهاب . والركاب. رخيصه هوايه
زينب وياج . مننساج . نظل وفايه
...............................
رغم المسافات . مرفوعه الأصوات
لا مانطخ راس للذله هيهات
كل أحنه حراس . زينب متنجاس
باقي العهد دوم حد كطع الأنفاس
يازينب . بالمذهب . أبطال الحشد
ماتكدر . تتجسر . كل أهل الحقد
هناك الأفعال . والرجال . تدك الثايه
زينب وياج . مننساج . نظل وفايه
................................
شما مرت أيام . يا درة الشام
نكصدلج نزور يابنت الأكرام
غيمه الدمع صار . مشتاكه الأنصار
يم كبرج تنوح والله البعد نار
ونزورج . ونطوفج . يا لبوة علي
لترابج . لأعتابج . فدوه آنه و هلي
فوك الغيوم . واللنجوم . نعلي الرايه
زينب وياج . مننساج . نظل وفايه
...........................
ياكرة العين . يا روح الحسين
كل شيعي للموت مطلوب ألج دين
يومج مننساه . بالحسره والآه
نلطم على الراس نصرخ حسيناه
بكل مأتم . تتحزم . وتهشم الضلع
أحبابج . بمصابج . وتهل الدمع
يجري نهرين . تره العين . دمعهه حجايه
زينب وياج . مننساج . نظل وفايه
............................
نحجيهه كل يوم . نظل عالعهد دوم
لمصابج يعيش كل شيعي ملجوم
وبكل الأعمار . خل يبقه تذكار
من هالأسم دوم مايخله كل دار
تتباهه . شمحلاهه . الشالت هالأسم
من فدوه . والقدوه . زينب والنعم
ترفع الهام . بالأحرام . عالمصلايه
زينب وياج . مننساج . نظل وفايه
....................................
يوم الأجل حان . منتظره الأخوان
وبغربة الشام محتاجه دفان
ميته من الطفوف . من جانت تشوف
كافلهه عباس مكطوع الجفوف
من عالتل . تتأمل . سبع الكنطره
ظل يزئر . والعسكر . صارو دائره
سمعت الصوت . تره الموت . سباهه سبايه
زينب وياج . مننساج . نظل وفايه
....................................
حيدر مطر العبادي

يالهادي زوارك .. يالهادي زوارك
وقعت بالدم العهد للموت أنصارك ..
...........................
يالهادي زوارك أجت والرايه بيديهه ..
مرخوصه ألك ياسيدي الأرواح تفديهه ..
تتحدى كل أهل الحقد وتغيض أعاديهه ..
وتقيم مجلس بالصحن وتعازي مهديهه ..
لو شافت أنوارك .. لو شافت أنوارك
التعب والهم ينجلي لو شافت أنوارك ..
............................
عندك كرامات شكثر يالهادي مشهوده ..
ياسيدي ووكفات ألك بالشدد معهوده ..
كل عام بتلاثه رجب تلكاهه موجوده ..
زوار سامره أعتنت بثيابهه السوده ..
تلطم وسط دارك .. تلطم وسط دارك
وعللمصاب بكل حزن تلطم وسط دارك ..
.................................
هاي الزياره واجبه شما دربك أبعيده ..
والوصل صحنك سيدي بخيراتك تزيده ..
طالب الحاجه بالعجل تنطيهه أله بأيده ..
واليعتبرهه من البدع دوم أحنه منريده ..
يالتعرف أحرارك .. يالتعرف أحرارك
ما تخلف وياك الوعد يالتعرف أحرارك ..
.................................
ظل مرقدك لوحة عشك بالكلب منقوشه ..
وعصر المعاصي والفتن جنحانه مفروشه ..
والباغي فرصه ينتظر ومحضّر جيوشه ..
غربان وبهيئة حمام الصوره مغشوشه ..
من نوصل أسوارك .. من نوصل أسوارك
بلهفة العاشك سيدي من نوصل أسوارك ..
...............................
كل اليزورك سيدي من يوصل الحضره ..
بالدفتر أسمه ويه الخدم يم فاطمه الزهره ..
من الأمام المنتظر رايدله بس نضره ..
وياك باقي عالعهد باصمهه بالعشره ..
وياك يتشارك .. وياك يتشارك
حزن وفرح ياسيدي وياك يتشارك ..
...................................
الماعاشو أحساس المحب خلهم يلومومنه ..
كل ظالم وكل ناصبي نظل شوكه بعيونه ..
زرعو مشانق بالدرب خاطر يمنعونه ..
نكصد نزورك سيدي وخلهم يفجرونه ..
ماعرفو أسرارك .. ماعرفو أسرارك
ذوله الفكرهم جاهلي ماعرفو أسرارك ..
.................................
حيدر مطر العبادي

كعديه ليلة وفاة  أم البنين ع

وين أهل المحّنه .. شالو كل أهلنه
لا عباس بيده يغمض العيون
لا عبد الله لاجعفر  و لاعون
شالو كل أهلنه
...........................
ياخلك ثكلت أنفاسي     والأجل كرّب عليه
مابقه من أولادي واحد  كضو برض الغاضريه
راح أموت بوجه أبيض    راضيه عني الزجيه
تمنيت أموت بكربله .. ويّ الحسين وكل هله
أربع شباب أنطيت أله .. فدوه للغالي هديه
سهري والتعب راح .. كشخت بيهم رماح
الجانو من أحشّمهم يفزعون
لا عبد الله لا جعفر ولا عون
شالو كل أهلنه
.................................
أعيوني مفتوحه وتناطر   تحضر الأولاد ظنها
موتت الأم شحلاها         لو حضر يمها أبنها
تكول أهلا بالمنيه         وأبد ماينسمع ونها
من كرّب عليّه الأجل .. لآخر نفس عندي أمل
عباس أبن خير العمل .. اليطبك أعيوني جفنها
ظل بطلعت الروح .. جفن العين مفتوح
أموت وعيني تربي أعله اليشيعون
لا عبد الله لا جعفر ولا عون
شالو كل أهلنه
................................
بالدفن محد حضرني     وأم اللبنين انه أسمي
شكد جنت أتمنه حاضر     أبن من لحمي ودمي
لو يوسدني ابو فاضل   باللحد ينزاح همي
العباس لو حاضر دفن .. يهيل التراب يظل يوّن
ماعنده جفين الأبن ..   يكلها يمه بعيني سهمي
سهم بعيني ماشوف .. ومكطوعات الجفوف
لبّ أحشاج يمه ما يرجعون
لا عبدالله لا جعفر ولا عون
شالو كل أهلنه
...................................
هاي أول ليله أليه        والقبر موحش ظلامه
حالة اليفكد أعزازه      حال الأطفال اليتامه
الأنتظر يشعلي شمعه      راح مارد بسلامه
كل قبر ينرش بدمع   ..   بلاماي قبري ولاشمع 
أبجي وونيني ينسمع .. على حسين وعالنشامه
وحشه المقبره وليل   ..  ويضغطني الكبر حيل 
أصيح بصوت عالي وما يسمعون
لا عبد الله لاجعفر  ولا عون
شالو كل أهلنه
.....................................
ردت يم حسين قبري     ماردت بأرض المدينه
هو أعز من ولدي كلهم   يدري بيه شكد حنينه
بكربله جمعتنه حلوه      ونرجع نلم الضعينه
شمحلاهه من نرجع سوه  .. وأندفن يم راعي اللوه
كلمن ضريحه يشع ضوه .. وباب قبلتنه السفينه
مراقد تزهي بأنوار .. بيها تطوف زوار
للمهدي الفرج من صحني يدعون
لا عبد الله لا جعفر ولا عون
شالو كل أهلنه
...............................
المصيبه
...........
الفاتحه ياهو القراهه   والدمع عالوجنه يجري
شيعه لا تكطعون بيه    لو وسط شمات قبري
موحشه ديار الغريبه      والفراك يزيد كسري
أعيوني عليكم شابحه
كلمن قرالي الفاتحه
ويسيل دمع النايحه
حاجته يلكاهه بيده .. الطلب حاجه ونخاني
....................................
حيدر مطر العبادي

خادم الزهره وأظل أتباهه ..
              وأبقه دوم على العهد وياهه ..
          يالزجيه  .. يالزجيه
.....................................
انه خادم وابقه رافع راسي ..
فاطمه انتي الهوه البنفاسي ..
أغلى من اخواني وهلي وناسي ..
ونبض كلبي حيدري وعباسي ..
دوم مأساتج تعيش ويانه ..
             ياأساس المذهب وعنوانه ..
        يالزجيه .. يالزجيه
......................................
هالهويه بحب علي مختومه ..
وبصمة العباس سبع الحومه ..
وبيهه دمعه عالوجه مرسومه ..
عالذبيح السلبوله هدومه ..
للزجيه خادم وتدروني ..
               دوم ماينشف دمعهه اعيوني ..
       يالزجيه .. يالزجيه
....................................
انه مابطل ابد وناتي ..
عالوجن حفرن نهر دمعاتي ..
عالزجيه الطاهره مولاتي ..
ادري بيهه تقضي كل حاجاتي ..
خيرج مغطيني حد الهامه ..
                       نظره يامولاتي لللطامه ..
يالزجيه .. يالزجيه
..............................
الليله عالزهره لطم وقرايه ..
وكلنه نحضر مجلسج وفايه..
كوثر انتي والشرب من مايه..
غرف منج  مكرمات هوايه ..
مكرماتج فاطمه مشهوده ..
                       اي وحك الكطعوله ازنوده ..
يالزجيه .. يالزجيه
.................................
الحضر مجلس فاطمه هنياله ..
لابس اسود واللطم يحلاله ..
الليله تجري دموعنه هماله ..
جن شهر عاشور هل اهلاله ..
هالليالي الفاطمه نحييهه..
                      أبوصالح ندري حاضر بيهه ..
يالزجيه  ..  يالزجيه
.................................
الليله حتى المنبر يهل الدمع ..
عالزجيه الطاهره وكسر الضلع ..
كل موالي الليله خل يعلك شمع ..
من قره الرادوود نبجي ونستمع ..
الخدمه كلمه والعرف معناهه ..
                          هامته بعلو النجم علاهه ..
يالزجيه .. يالزجيه
.....................................
الزجيه عاشت بوجداني ..
ابد مافارك اسمهه الساني ..
ابقه للموت أبغض المرواني ..
ألعن الاول وأسب الثاني ..
الظلم بضعة طاهه والوج ناره ..
                             بصدر كل شيعي غرز بسماره ..
       يالزجيه  ..  يالزجيه
......................................
حيدر مطر العبادي

على طور سؤالي بياسبب الحاج باسم الكربلائي
بابك يانبي لو غاضريه .. فاطم هاذي لو زينب سبيه
الأمس بالغار.. حركهه بنار
خيانه .. خيانه
..........................
حرب بيبان سوتهه السقيفه ..
حته يصير فاجرهم خليفه ..
أصحاب النوايه المو نظيفه ..
ظلمو فاطمه البضعه الشريفه ..
توّن وتنوح ظلت أم أبوها .. صحبانك يطاهه السلبوهه
ظلمهم جار  .. حركهه بنار
خيانه .. خيانه
.......................
فعلتهم أبد لا مو غريبه ..
جمر بالباب ظل يسعر لهيبه ..
مثل مافاطمه بدمهه خضيبه ..
باجر زينب تعيش المصيبه  ..
تذكر أمهه وتشاكف بديهه .. سوط المارحم غربة سبيهه
وسط أشرار .. حركهه بنار
خيانه .. خيانه
.....................
أبد ماينوصف حقد العصابه ..
الخله الدار أشبه بالخرابه ..
التجسر عالزجيه بلا مهابه ..
حرك روح النبي ودينه وكتابه ..
يدرون بحرك عش الحمامه .. رماد تصير أحلام اليتامه
صفت طشار .. حركهه بنار
خيانه .. خيانه
.......................
الظلم والجور يعتبروه شجاعه ..
وخبر موت النبي سَرهم سماعه ..
الخله الناصبي ينزع قناعه .
ويحرك عتبة الهادي أبشاعه ..
الماعدهم ولا ذرة رجوله .. حرك باب النبي عدهم بطوله
الخزي والعار .. حركهه بنار
خيانه .. خيانه
..........................
الخان المصطفى بايع ضميره ..
سطر وجه الشمس وكت الظهيره ..
نزل نجم السمه يواسي الأميره ..
العاشت لوعة الراحت أسيره ..
نفس الزمره كلهم ناصبيه .. ونشوف بكربله حقد آل أميه
الزمن غدار .. حركهه بنار
خيانه .. خيانه
...........................
اليوم الزهره باجر صدر الحسين ..
تسحكه خيول أميه ونبله بالعين ..
وزينب لوبقت تنطي الوجه وين ..
والكافل رميه بلايه جفين ..
تظل محتاره ياعظم الفجيعه .. حالة فاطمه تعيش الوديعه
فرق بسمار .. حركهه بنار
خيانه .. خيانه
...........................
حيدر مطر العبادي

كعديه لشهادة مولاتي السيده فاطمه الزهراء ع
بدموع العيون .. هاي المسيه ..
تتوادع أم عون .. ويه الزجيه ..
البيها ريحة طاهه .. آخر وداع وياهه
هاي المسيه هاي المسيه
.....................................
الليله آهات ومدامع واضح بزينب قهرها
كابلت أمها الزجيه وبالكلب يسعر جمرها
بين باب وبين حايط نعصرت وظالم سطرها
تبجي وتنوح من الألم .. رافضه وماكالت نعم
ماركعت أمنه لكل صنم .. رغم بسمار بصدرها
نظرات الأوداع .. هاي الأخيره
ندفن سمه بكاع .. حيره جبيره
كسر الضلع ألّمها .. متسامح الظلمها
هاي المسيه .. هاي المسيه
.....................................
زينب تعاين لأبوها والحزن يشرح وضعها
تشوف ذاك القلع خيبر أيده بالكوه رفعها
يودع بزهرة حياته وخاف لا يلجم ظلعها
أصعب وداع ويّ الولي .. فاطمه صوته يعتلي
الله اليعينك ياعلي .. أعيونه غركانه بدمعها
والقالع الباب .. مايرفع أيده
تتشمت أحزاب .. بحزن الصميده
يذبح حجي الشماته .. وين الرديه ذاته
هاي المسيه .. هاي المسيه
........................................
بالحزن هالليله عايش االحسن يا حال حاله
أمه أعز من روحه جانت يذكر أيامه ودلاله
ربي خليي أمنه خيمه يدعي يا رب الجلاله
ياربي خلينه سوه .. أمي أعز من الهوه
ننصر حسين بنينوه .. والكمر راعي الكفاله
ونعيش الأحساس .. حسين وشعوره
والكمر عباس .. من يطفه نوره
من تحترك خيمنه .. نريد الزجيه يمنه
هاي المسيه .. هاي المسيه
..........................................
هاي لحظات الموادع وأمي ليلتها الأخيره
صوتها الخافت أسمعه والوجه ليه تديره
زينب تظلين باجر بلا أهل وبلا عشيره
بخيمتج نار وتشتعل .. جم حرمه يمج جم طفل
مسبيه مجتوفه بحبل .. عالهزل للشام أسيره
روس أعله الأرماح .. كل الغوالي
واليحدي ذبّاح .. ياوسفه تالي
ضعن الخدر سبايه .. مجتوفه آيه بآيه
هاي المسيه .. هاي المسيه
........................................
صعبه هاي الليله وأدري باجر الأصعب صباحه
قهر وفراك ومواجع بكل كلب ياخذ مساحه
السمه بلا شمس باجر والحزن فارش أجناحه
باجر الدنيا مظلمه .. وبلا شمس وجه السمه
لو راحت أمنه فاطمه .. وداعها بآآه ومناحه
بعيون الحسين .. عبره شكبرها
ينطي الوجه وين .. ومخفي كبرها
أمه وأعز من روحه .. وحجاية المملوحه
هاي المسيه .. هاي المسيه
........................................
المصيبه
.............
نعيش ليلتها الأخيره وبعد ما بالأيد حيله
هاي لحظات الموادع صعبه والمدمع نسيله
وصف هالليله وحزنها شما أريد أوصف قليله
ماقصرت أم الحسن ..
للفاكد أم جانت وطن ..
نودع السر المؤتمن ..
بعد ياهو النشتكيله وراحت أمنه من أدينه
...........................................
حيدر مطر العبادي

قناة خادم الحسين الشاعر سيد أياد الغالبي
للأشتراك
https://t.me/fydyi

ضلعي أنكسر وبصدري بسمار .. وجفوف أديه أحتركت بنار
ياوسفه أطيح على الترب .. مهضومه والمدمع يصب
وجفوف أديه أحتركت بنار
...................................
هجمت أعليه العصابه        من رحل نور النبي
صوت أسمع وإن فاطم     صاح حيل الناصبي
زمره ملعونه وخبيثه       من الحرق حد السبي
وعلي مجتوف بوصيه     والحسن بعده صبي

هاي الضغينه والحقد ليش .. أباب النبوّه أهل الغدر جيش
حسبالك بساحة حرب .. مهضومه والمدمع يصب
وجفوف أديه أحتركت بنار
...................................
يانبي الله ورسوله            أشلون بابك يندفع
دمي عالحايط تناثر           وأثر عالخد منطبع
الظالم بأيده سطرني      عيني دم تجري ودمع
وطاح من عندي جنيني     أوّن مكسورة ضلع

ما أكدر أنهض أزحف زحوف .. ريتك محمد حاضر تشوف
ترضه أم أبوها تنضرب .. مهضومه والمدمع يصب
وجفوف أديه أحتركت بنار
...................................
صحت يافضه أسنديني    أتوجه عالحايط وأطيح
حيل هدتني الرزيه           ربي سترك كمت أصيح
أنهض وأعثر وأطيحن      مثل طير ملاكي ريح     
جني أشوف الغاضريه       حسين عالغبره ذبيح

كلما يأذيني الضلع حيل .. أبصدره أشوفن تسحك الخيل
محروم من ماي الشرب .. مهضومه والمدمع يصب
وجفوف أديه أحتركت بنار
......................................
تآمرت أهل السقيفه        والنبي على المغتسل
كل قناع أنشال عنهم      من مشه الهادي ورحل
على تشييعك محمد         أبد ما واحد سأل
أتكفل بغسل الجنازه         والدفن خير العمل

وكت الكلافه أتبين الناس .. ياهو الصديق وياهو وسواس
حتى العرف صارو غرُب .. مهضومه والمدمع يصب
وجفوف أديه أحتركت بنار
.........................................
سِمَعت الصوت وأجتني      وشافت آثار الرفس
ركضت وشبكتني زينب      تشعر بأمهه و تحس
وين حماي الحميه           تهمس  بأذني  همس
خل أبوي يسل فقاره       خل يرد أهل الرجس     

أهل السقيفه أتمادت هواي .. بالنار رادت تحرق الماي
رادو خلافتهم غصب .. مهضومه والمدمع يصب
وجفوف أديه أحتركت بنار
......................................
  لو متت باجر يحيدر    كبل مايطلع فجر
بليل تدفني وصيتي      وتخفي آثار الكبر
ما أوصييك أبنيني        والعقيله أم الخدر
خاف بأرض الغاضريه    بسوط يضربهه الشمر

لو راح محسن تلكه عباس .. نعم الأخو بي ترفع الراس
وخلافه للمجلس تطب  .. مهضومه والمدمع يصب
وجفوف أديه أحتركت بنار
.......................................
حيدر مطر العبادي

ويلي عالزهره المظلومه
عاشت وماتت مهضومه
.....................
على المظلومه نبجي ونلطم بحسره
ظل على الوجه مطبوع أثر سطره
خاطرهه  أنكسر  وأضلوع  منكسره
أباب الدار نار الحقد مضرومه
...........................
ليالي فاطمه كل ليله نحييهه
بدموع الحزن نحضر لياليهه
نلطم عالصدر والهامه ندميهه
تظل بكل عزه الهامات مدمومه
.........................
لحد يوم المنيه دموعنه عللخد
تسعر  بالكلب  نارج  فلا تبرد
نلطم عالزجيه ونلبس الأسود
جروح كلوبنه بفركاج ملجومه
...........................
هنياله  اليموت  ودمعته  بعينه
يخلص بالمجالس عمره وسنينه
خادم فاطمه وخادم لأبو سكينه
مثل عابس بيوم الشكك هدومه
.............................
ندك عالراس حيل ونطبر الهامه
وأنواسي علي المحتار بيتامه
وحسين وحسن يبجون كدامه
منالأم زينب بهاليوم محرومه
............................
باجر نبني حضره ونكصد نزورج
مناره وكبه منهن خل يشع نورج
برواياتج  يزهره  أنقيم عاشورج
بعاشور الزجيه صدور مهشومه
................................
حيدر مطر العبادي

ماصخه الدنيه بلهاته    الفاكد أمه
دافن  وياهه  أمنياته     الفاكد أمه
فاكد الحيل      والدمع سيل
الفاكد أمه
........................
كل  كتر  بالدار  يسأل  عن  ضواهه
البيت مدري شلون شمس الله حتواهه
أمي  ياقطب  الرحه  وكوكب  سماهه
هيه  بنت  وهيه  أم  الجدنه  طاهه
ليش  روح  المصطفى      كسرو ضلعهه
ونور شمس الله أنطفى     كسرو ضلعهه
وجلجل الليل       والدمع سيل
الفاكد أمه
  .................................
ودّعتهه وراحت  أحله أيام عمري
عليهه حيلي منهدم ودموعي تجري
ضاكت  عليه الوسيعه وربي  يدري
كمت من أمشي أحّط أيدي على ظهري
اليعيش بلايه أم        شله بحياته
دنيته دمعه وألم        شله بحياته
بآآه وبويل      والدمع سيل
الفاكد أمه
.........................
أبجي وأعيوني علبوي الصعبه حاله
ذاك  المتعّب  الحروب  بكل بساله
رجع  مكسور  الظهر  دافن  حلاله
يخط  بجدامه  وعثر حتى بخياله
ليش  عفتينه  يزهره        مو وكتهه
الفركه صعبه وحيل مره    مو وكتهه
فارك الهيل        والدمع سيل
الفاكد أمه
........................
الله  يجبر  خاطر  أخواني اليتامه
حسين يبجي والدمع سولف كلامه
والحسن من  اللطم  مطبوره هامه
دار  الأحزان أصبحت دار  الأمامه
ألج  نشتاك  شكثر      يمنه الحنينه
الورده مو مالت كبر        يمنه الحنينه
الشامت يعيل     والدمع سيل
الفاكد أمه
........................
أنه وحسين وحسن صابتنه حيره
أصغار بس عدنه أماني شكد جبيره
أمي  كالت  ويه الأنفاس  الأخيره
باجر  تروحين  يازينب  أسيره
جم  يتيمه  وجم  جرح       عينج تشوفه
حسين راسه على الرمح      عينج تشوفه
وعالصدر خيل         والدمع سيل
الفاكد أمه
............................
باجر  الديرة  غرب امشي  سبيه
يجوي بأجدامي الرمل مجتوفه أديه
أبخرابه  أنبات  أنه  و سكنه  ورقيه
هناك  أريدج  حاضره   يأمنه  الزجيه
السوط لو زورك أجتافي      أحتار بأمري
لو رقيه  تمشي  حافي         أحتار بأمري
صراخ وأعويل       والدمع سيل
الفاكد أمه
....................................
حيدر مطر العبادي